काठमाडौं- गत फागुन १८ गते जिल्ला समन्वय समितिका कर्मचारी होमबहादुर राउत र रन्जन रेग्मीको कोठामा चोरी भयो। काभ्रेको धुलिखेल नगरपालिका-७ का सूर्यप्रसाद देवजुको घरमा कोठा लिई बसेका उनीहरुको कोठाबाट सुनका गरगहना चोरी भयो।
सुनको सिक्री दुई थान, सुनको एक तोलाको झुम्का एक थान, सुनको एक तोलाको छड्के एक थान, सुनको औँठी तीन थान, सुनको सानो तलहरी एक थान, सुनको सिरबन्दीलगायत चोरी भएको थियो।
घरको कोठामा लगाएको ताल्चा फुटाएर चोरी भएपछि पीडित परिवारले जिल्ला प्रहरी कार्यालय काभ्रेमा उजुरी दिए। त्यसपछि अनुसन्धानमा खटिएको प्रहरी टोलीले विभिन्न भौतिक प्रमाण, प्राविधिक पाटाको विश्लेषण र घटना भएको समय र त्यस आसपास मुभभेन्ट भएका व्यक्तिहरुको निगरानी सुरु गरेको थियो।
त्यसपछि प्रहरीको सिनमा देखिए हेमबहादुर तामाङ। सिन्धुपाल्चोकको इन्द्रावती गाउँपालिका-४ का २७ वर्षीय हेमबहादुरको पृष्ठभूमि प्रहरीले केलाउन थाल्यो।
उनको पृष्ठभूमि केलाएपछि अनुसन्धानमा खटिएका प्रहरी नै चकित परे। उनी थिए प्रहरीको 'मस्ट वान्टेड' सूचीमा रहेका चोर। चोरीकै ११ वटा घटनामा त उनी यसअघि नै पक्राउ परिसकेका थिए।
अनुसन्धानमा खटिएको जिल्ला प्रहरी कार्यालय काभ्रेको विशेष टोलीले हेमबहादुरको सूक्ष्म निगरानी सुरु गरेको थियो। सीसी टीभी फुटेजको सूक्ष्म अध्ययन र हेमबहादुरको हुलिया र चोरीमा प्रयोग भएको मोटरसाइकलमार्फत हेमबहादुरको पहिचान प्रहरीले गरिसकेको थियो। सो क्रममा हेमबहादुरको उपस्थिति काठमाडौं बौद्ध देखियो। महानगरीय प्रहरी वृत्त बौद्धको वडा क्षेत्रमा लुकिछिपी बसेको भन्ने गोप्य सूचना पाएपछि काभ्रेबाटै खटिएको प्रहरीको विशेष टोलीले हेमबहादुरलाई पक्राउ गर्यो।
हेमबहादुर पक्राउ परेपछि नै उनैमार्फत चोरीमा संलग्न भएका थप दुई जनालाई पक्राउ गर्न प्रहरी सफल भएको थियो।
उक्त टोलीले चैत १२ गते भक्तपुरको मध्यपुर ठिमी नगरपालिकाको गट्ठाघरबाट सोही स्थानका २७ वर्षीय कर्मा भनिने कर्म तामाङ पक्राउ परे भने त्यसको चार दिनवपछि चैत १६ गते सोही स्थानका ३२ वर्षीय राजकुमार भनिने बेलबहादुर नकर्मी पक्राउ परे।
२७ पटकसम्म चोरी गर्दा पनि खुलेन चेत
पक्राउ परेका तीनै जना पटके चोर रहेको अनुसन्धानबाट खुलेको। उनीहरुविरुद्ध लागुऔषध र चोरीका २७ वटासम्म मुद्दा लागेको पाइएको जिल्ला प्रहरी कार्यालय काभ्रेका प्रमुख तथा एसपी भूपेन्द्र खत्रीले बताए।
११ वटा चोरीको घटनामा मुद्दा चलेका हेमबहादुरकोे पहिचान भएपछि झस्किएको प्रहरी २७ वटा चोरीको घरमा पक्राउ परेर मुद्दा चलेका व्यक्ति पक्राउ परेपछि झनै चकित परेको थियो।
उनीहरुको चोरीको सिलसिला २०७१ सालबाट सुरु भएको प्रहरीको रेकर्ड छ। सुरुमा २०७१ भदौ १८ गते महानगरीय प्रहरी परिसर काठमाडौंले हेमबहादुरसहित आठ जनालाई लागुऔषधसहित पक्राउ गरेको थियो। त्यसबेला लागुऔषध मुद्दामा उनीहरुविरुद्ध कारबाही भएको थियो। त्यसपछि भने यो समूह चोरीलाई नै पेसा बनाएर चोरी गर्दै आएको पाइएको एसपी खत्रीले बताए।
हेमबहादुरविरुद्ध अहिलेसम्म ११ वटा मुद्दा चलेका छन् भने कर्मविरुद्ध दुई र बेलबहादुरविरुद्ध २७ वटा मुद्दा चलेको प्रहरीको रेकर्डमा उल्लेख छ।
प्रहरीका 'मस्ट वान्टेड', समूह बनाएर दैनिक चोरी
पक्राउ परेका तीनै जना प्रहरीको मस्ट वान्टेड सूचीमा रहेका चोर हुन्। काठमाडौं उपत्यकामा कुनै ठूलो चोरी हुनेबित्तिकै प्रहरीले उनीहरुलाई अनुसन्धानमा तान्ने गरेको छ।
उनीहरुले समूह नै बनाएर विगत आधा दशकदेखि काठमाडौं उपत्यकामा चोरीको आतंक मच्चाउँदै आएको प्रहरी अधिकारीहरु बताउँछन्। पछिल्लो समय भने निस्क्रियजस्तै देखिएको यो समूह प्रहरीको खोजी सूचीमा रहे पनि पक्राउ पर्न भने सकेको थिएन।
यो समूहको चोरी गर्ने शैली भने दिउँसोमात्रै छ। दिउँसो घरमा मान्छे नभएको वा अफिस भएको मौका छोपेर उनीहरुले घरमा भएका नगद तथा महँगा गरगहना चोरी गर्ने गर्छन्। केही दिनसम्म मान्छेको रेकी गर्ने, को कतिखेर अफिस जान्छ र कतिखेर फर्कन्छ? घरमा अन्य व्यक्ति हुन्छन् कि हुँदैनन् भन्ने यकिन गरिसकेपछि बल्ल उनीहरुले चोरी गर्ने गरेको पाइएको एसपी खत्री बताउँछन्।
यस्ता छन् चोरीका घटनाहरु
अहिले पक्राउ परेका तीनै जना पहिलोपटक २०७१ भदौ १८ गते महानगरीय प्रहरी परिसर काठाडौंले लागुऔषध मुद्दामा पक्राउ गरेको थियो।
२०७६ माघ २६ गते काठमाडौंको चन्द्रागिरिस्थित सन्सिला पुजारीको घरमा भएको चोरीको घटनामा उनी त्यसको दुई दिनपछि पक्राउ परेका थिए। त्यसबेला चोरीको कसुरमा मुद्दा चलेको थियो।
महानगरीय प्रहरी वृत्त नयाँ बानेश्वरले चोरीको कसुरमा २०७१ कात्तिक १६ गते मुद्दा चलाएको थियो। काठमाडौं ३५ स्थित दुर्गाकुमार भट्टराईको घरमा चोरी गरेको आरोप त्यसबेला लागेको थियो। २०७१ साउन २१ गते भट्टराईको घरमा चोरी भएको थियो।
२०७१ जेठ १७ गते काठमाडौं १६ स्थित शान्ति बलामीको घरमा भएको चोरीमा संलग्न भएको आरोपमा बेलबहादुर पक्राउ परेका थिए।
२०७१ भदौ २ गते बालकोटस्थित रघुशंकर कार्कीमो घरमा भएको चोरी काण्डमासमेत उनैको नाम मुछिएको थियो। २०७१ साउन ९ गते भक्तपुरको मध्यपुरठिमी १६ स्थित शोभा केसीको घरमा भएको चोरीमा पनि संलग्न भएको आरोपमा बेलबहादुरविरुद्ध मुद्दा चलेको थियो।
२०७१ असोज ८ गते बिहान ८ बजे बालकोटस्थित मोहनकृष्ण श्रेष्ठको घरमा चोरी भएको थियो। यो घटनामा पनि उनी पक्राउ परेका थिए। २०७१ भदौ ४ गते मध्यपुरठिमी-१६ स्थित जानुका अधिकारीको घरमा भएको चोरीमा बेलबहादुरविरुद्ध मुद्दा चलेको प्रहरी रेकर्ड छ।
यस्तै २०७६ कात्तिक २४ गते बौद्धस्थित खेलकुमार कार्कीको घरमा भएको चोरीमा पनि बेलबहादुरकै संलग्नता छ। यसरी विभिन्न २७ वटा चोरीको घटनामा बेलबहादुरको संलग्नता रहेको भन्दै मुद्दा चलेको थियो भने हेमबहादुरविरुद्ध ११ वटा चोरीका मुद्दामा मुद्दा चलेको रेकर्ड प्रहरीसँग छ।
उनीहरु तीन जना यसअघि पनि पटक-पटक एउटै चोरीको केसमा पक्राउ परेका व्यक्ति हुन्। चोरीको कसुरमा पटक-पटक पक्राउ पर्ने तर जहिल्यै सामान्य धरौटी र थोरै समय जेल बसेर उनीहरु छुट्दै आएका थिए। पछिल्लो समय भने गत वर्षको माघमा चोरीको आरोपमा पक्राउ परेर छुटेको पाइएको छ।
ब्राण्डेड लाइफस्टाइलकै लागि चोरी
चोरी आरोपमा पक्राउ परेका चारै जनाको पारिवारिक अवस्था नाजुक छ। तर उनीहरुको लवाइखवाइ हेर्दा भने धनाढ्य देखिन्छ। सात/आठ हजार रुपैयाँ पर्ने ज्याकेटदेखि १०/१२ हजार रुपैयाँसम्मका जुत्ता उनीहरुले लाउने गरेको एसपी खत्री बताउँछन्। यही किसिमको 'ब्राण्डेड लाइफस्टाइल' बिताउनका लागि चोरीमा संलग्न भएको उनीहरुको भनाइ छ।
चोरी गरेकै पैसाले उनीहरुले मोटरसाइकल किन्नेदेखि गेष्टहाउसमा मस्ती गरेर बिताउने गरेका छन्। महँगा होटलमा गएर मस्ती गर्नेदेखि, महँगा र ब्राण्डेड कपडा लगाउनमै चोरीको रकम खर्च गर्ने गरेको प्रहरी अनुसन्धानबाट खुलेको छ। चोरी गरेकै भोलिपल्ट उनीहरुले सुनका गहना बेचेर मोटाइकलसमेत किनेका थिए। उक्त मोटरसाइकल र चोरीमा प्रयोग भएको मोटरसाइकलसमेत प्रहरीले बरामद गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1774514962.png)
-1764146706.png)
