काठमाडौं- नेपालको विभागीय टिम त्रिभुवन आर्मी फुटबल क्लबले एएफसी कप फुटबलको प्लेअफमा श्रीलंका पुलिस स्पोर्ट्स क्लबलाई ५-१ गोलअन्तरले पराजित गरेको छ।
त्रिपुरेश्वरस्थित दशरथ रंगशालामा आर्मीले उत्कृष्ट प्रदर्शन गर्दै श्रीलंका पुलिसविरुद्ध जित निकालेको हो। पहिलो हाफसम्म २-१ गोलको अग्रता बनाएको आर्मीले दोस्रो हाफमा थप तीन गोल गर्दै जित निकालेको हो। खेलको चौथो मिनेटमा विवेक बस्नेतले कप्तान भरत खवासलाई पास दिँदै बनाएको मुभमा विवेकले प्रहार गरेको बल श्रीलंका पुलिसका दिनेश महेन्द्रनले बचाएका थिए। खेलको १०औं मिनेटमा सन्तोष तामाङले प्रहार गरेको बल गोलकिपर महेन्द्रनले बचाए। खेलको १२ औं मिनेटमा भरतले प्रहार गरेको बल गोललाइनबाट ए निकोलसले बचाए।
खेलको २८औं मिनेटमा आर्मीको डिफेन्सको गल्तिको मौका उठाउँदै इभान्स असन्तले गोल गरे। यो गोलसँगै श्रीलंका पुलिसले आर्मीविरुद्ध १-० गोलको अग्रता बनायो। खेलको ३४औं मिनेटमा नवयुग श्रेष्ठको क्रसमा कप्तान भरतले गोल गर्ने राम्रो अवसर पाएका थिए। डिबक्सभित्रै पाएको बल भरतले बाहिर हानेका थिए। खेलको ४१औं मिनेटमा सन्तोष तामाङले डिबक्स बाहिरबाट उत्कृष्ट प्रहार गर्दै गोल गरे। उनको गोलसँगै आर्मीले १-१ गोलको बराबरी बनायो। खेलको ४३औं मिनेटमा भरतको पासमा नवयुगले गोल गर्दै आर्मीलाई पहिलो हाफसम्म २-१ गोलको अग्रता दिलाए।
खेलको ५०औं मिनेटमा टंक बस्नेतले गोल गर्दै आर्मीलाई ३-१ गोलको अग्रता दिलाए। नवयुगले प्रहार गरेको बललाई गोलकिपर महेन्द्रनले पन्च गरेर बचाएको बललाई टंकले गोल गरे। खेलको ८३औं मिनेटमा सुदिल राईले गोल गर्दै आर्मीलाई ४-१ गोलको अग्रता दिलाए। उनी खेलको ६३औं मिनेटमा टंक बस्नेतको स्थानमा मैदानमा प्रवेश गरेका थिए। खेलको अतिरिक्त समयमा नवयुग श्रेष्ठले गोल गर्दै आर्मीलाई ५-१ गोलअन्तरको जित दिलाए।
आर्मीले भारतको बैंगलुरुसँग खेल्ने
आर्मी फुटबल क्लबले अब वैशाख १ गते भारतको बैंगलुरु फुटबल क्लबसँग खेल्नेछ। बैंगलुरुविरुद्धको खेल भने भारतको गोवास्थित जीएमसी रंगशालामा हुनेछ। आर्मी र बैंगलुरुबीचको विजेताले वैशाख ८ गते प्लेअफको फाइनलमा खेल्नेछ।
प्लेअफकै अर्को पोलमा माल्दिभ्सको क्लब इगल्सले भुटानको थिम्पु सिटीलाई पराजित गर्दै बंगलादेशको अबहानी लिमिटेड ढाकासँग खेल्ने भएको छ। यी टिमबीचको विजेताले भारतको बैंगलुरु र नेपालको आर्मी फुटबल क्लबको विजेतासँग प्लेअफको फाइनलमा खेल्नेछ। प्लेअफको विजेताले एएफसी कपको समूह ‘डी’मा स्थान बनाउने छ।
आर्मीले एएफसी कपको प्लेअफ खेल्न यसरी पायो
लिग विजेताकै हैसियतमा भने मछिन्द्र क्लबले एएफसी कपको प्लेअफ खेल खेल्नुपर्ने हो। तर, आर्मी फुटबल क्लबले किन खेल्ने अवसर पायो?
२०७६ सालको सहिद स्मारक ए डिभिजन लिग मछिन्द्रले जितेको थियो। १३ खेलबाट ३१ अंक बटुल्दै लिग च्याम्पियन बनेको मछिन्द्रले भने एएफसी कपको प्लेअफ खेल्न पाएन। यसपछिको एउटै कारण हो, क्लब लाइसेन्स। एएफसीको नियमअनुसार ए डिभिजन लिगका सबै क्लबहरुले एएफसीको क्लब लाइसेन्स पाइसकेको हुनुपर्छ। त्यसको लागि एएफसीले छुट्टै नियम र मापदण्ड राखेको छ।
त्यो मापदण्ड नेपालका कुनै पनि क्लबले पूरा गर्न सकेनन्। आफ्नै मैदान, एकेडेमी, उमेर समूहका टिम, वित्त व्यवस्थादेखि क्लब लाइसेनिङमा एएफसीले धेरै मापदण्ड हुनुपर्ने सर्तहरु राखेको छ। यही मापदण्ड पूरा नगर्दा नेपालका १३ वटा क्लबलाई केही महिनाअघि क्लब लाइसेन्स नदिने एएफसीले जनाएको थियो। तर, त्रिभुवन आर्मी क्लबले भने सुधार गर्दै फेरि एएफसी क्लब लाइसेन्सको लागि अपिल गरेको थियो। त्यसपछि भने एएफसीले आर्मीलाई क्लब लाइसेन्सको मान्यता दियो। एएफसी क्लब लाइसेन्स पाएसँगै मछिन्द्रको सट्टा आर्मीले एएफसी कप खेलेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786622145.jpg)
-1786602170.png)
-1764146706.png)
-1786513116.png)
