टिचिङ अस्पतालमा सुरु भयाे अत्याधुनिक सेवासहितको आइसियु

समाज

टिचिङ अस्पतालमा सुरु भयाे अत्याधुनिक सेवासहितको आइसियु

नेपाल लाइभ बुधबार, चैत २५, २०७७, १०:२३

काठमाडौं- त्रिवि शिक्षण अस्पताल (टिचिङ)मा अत्याधुनिक सेवासहितको आइसियु सेवा सुरु भएको छ। त्रिविका उपकुलपति डा धर्मकान्त बास्कोटाले मंगलबार आइसियुको आज औपचारिक उदघाटन गरेका हुन्।

कोरोना संक्रमण तथा अन्य संक्रामक रोगलाई लक्षित गरी आइसियुको सेवालाई थप व्यवस्थित र अत्याधुनिक बनाइएको अस्पतालका कार्यकारी निर्देशक डा दिनेश काफ्लेले जानकारी दिए।

अस्पतालमा साढे ५ करोडभन्दा बढी रकमको लागतमा १२ शय्याको अत्याधुनिक आइसियु सेवा सञ्चालनमा ल्याइएको हो। उक्त आइसियुमा हरेक शय्यालाई छुट्टै क्याबिनको व्यवस्था गरिएको छ। क्याबिनभित्र नेगेटिभ प्रेसर (भित्र फेरेको सास भेन्टिलेटर मार्फत फिल्टर भएर बाहिर जाने) व्यवस्थापन गरिएको छ।