काठमाडौं– नेपालको विभागीय टिम त्रिभुवन आर्मी फुटबल क्लबले एएफसी कपको प्लेअफमा आज (बुधबार) श्रीलंका पुलिस स्पोर्ट्स क्लबसँग खेल्दैछ। यी दुई टिमबीचको खेल त्रिपुरेश्वरस्थित दशरथ रंगशालामा बेलुकी ५ः३० बजे खेल सुरु हुनेछ।
श्रीलंका पुलिसलाई पराजित गर्दै आर्मी फुटबल क्लब अघिल्लो चरणमा प्रवेश गर्न चाहन्छ। आफ्नै घरेलु मैदानमा जित निकाल्ने आर्मीलाई राम्रो अवसर पनि छ। आर्मीका मुख्य प्रशिक्षक नविन न्यौपानेले श्रीलंका पुलिसलाई पराजित गर्दै अघिल्लो चरणमा प्रवेश गर्ने बताएका छन्।
त्यसो त, आर्मी फुटबल क्लबले राम्रो तयारी गरेको छ। यहि एएफसी कपको प्लेअफ खेललाई मध्यनजर गर्दै आर्मीले ओलम्पिकको तयारी गरिरहेको कीर्गिस्तानको यु–२३ टिमसँग प्रतिस्पर्धा गरेको थियो।
दशरथ रंगशालामा भएको त्यो खेलमा आर्मीले कीर्गिस्तानको यु–२३ टिमसँग गोलरहित बराबरी खेल्न सफल भएको थियो। कोरोना भाइरसबाट बच्न एएफसीले रंगशालाको क्षमताको आधा मात्रै दर्शक प्रवेश गराउने अनुमति दिएको छ।
साधारणतर्फ तीन सय र भिआइपीतर्फ पाँच सय टिकट दर रहेको छ। करिब आठ हजार दर्शकसामू आर्मी फुटबल क्लबलाई प्रतिस्पर्धा गर्न सहज भने हुने छैन। तर सबै खेलाडी लयमा रहेका कारण नतिजा आफ्नो पक्षमा आउने मुख्य प्रशिक्षक न्यौपानेको विश्वास छ।
एएफसी कपमा स्थान बनाउन पनि आर्मीले धेरै कठिन संघर्ष गर्नु पर्नेहुन्छ। एएफसी कप खेल्न आर्मीले प्लेअफको तीन खेल जित्नै पर्ने हुन्छ। आर्मी फुटबल क्लब र श्रीलंकाको पुलिसबीचको विजेताले बैशाख १ गते भारतको बैंगलुरु फुटबल क्लबसँग खेल्नेछ। बैंगलुरुविरुद्धको खेल भने भारतको गोवास्थित जीएमसी रंगशालामा बैशाख १ गते हुनेछ।
आर्मी तथा श्रीलंका पुलिसमध्ये एक र बैंगलुरुबीचको विजेताले बैशाख ८ गते प्लेअफको फाइनलमा खेल्नेछ। प्लेअफकै अर्को पोलमा माल्दिभ्सको क्लब इगल्स र भुटानको थिम्पु सिटीबीचको विजेताले बंगलादेशको अबहानी लिमिटेड ढाकासँग खेल्नेछ। यी टिमबीचको विजेताले भारतको बैगलुरु, नेपालको आर्मी र श्रीलंकाको पुलिस क्लबसँग प्लेअफको फाइनलमा खेल्नेछ। प्लेअफको विजेताले एएफसी कपको समुह ‘डी’ मा स्थान बनाउने छ।
यसरी पायो आर्मीले एएफसी कपको प्लेअफ खेल्न
लिग विजेताकै हैसियतमा भने मछिन्द्र क्लबले एएफसी कपको प्लेअफ खेल खेल्नु पर्ने हो। तर आर्मी फुटबल क्लबले किन खेल्ने अवसर पायो? २०७६ सालको सहिद स्मारक ए डिभिजन लिग मछिन्द्रले जितेको थियो। १३ खेलबाट ३१ अंक बटुल्दै लिग च्याम्पियन बनेको मछिन्द्रले भने एएफसी कपको प्लेअफ खेल्न पाएन। यसपछिको एउटै कारण हो, क्लब लाइसेन्स। एएफसीको नियमअनुसार ए डिभिजन लिगका सबै क्लबहरुले एएफसीको क्लब लाइसेन्स पाइसकेको हुनुपर्छ। त्यसको लागि एएफसीले छुट्टै नियम र मापदण्ड राखेको छ। त्यो मापदण्ड नेपालका कुनै पनि क्लबले पूरा गर्न सकेनन्।
आफ्नै मैदान, एकेडेमी, उमेर समूहका टिम, वित्त ब्यवस्थादेखि क्लब लाइसेनिङमा एएफसीले धेरै मापदण्ड हुनुपर्ने सर्तहरु राखेको छ। यही मापदण्ड पूरा नगर्दा नेपालका १३ वटा क्लबलाई केही महिनाअघि क्लब लाइसेन्स नदिने एएफसीले जनाएको थियो। तर त्रिभुवन आर्मी क्लबले भने सुधार गर्दै फेरि एएफसी क्लब लाइसेन्सको लागि अपिल गरेको थियो। त्यसपछि भने एएफसीले आर्मीलाई क्लब लाइसेन्सको मान्यता दियो। एएफसी क्लब लाइसेन्स पाएसँगै मछिन्द्रको सट्टा आर्मीले एएफसी कप खेल्न लागेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769827973.png)
-1764146706.png)
