काठमाडौं– इंग्लिस क्लब म्यानचेस्टर सिटीले च्याम्पियन्स लिग फुटबलको क्वाटरफाइनलमा जित निकालेको छ। मंगलबार राति भएको क्वाटरफाइनलको पहिलो लेगमा सिटीले जर्मन क्लब बोरुसिया डोर्टमुन्डलाई २–१ गोलअन्तरले पराजित गरेको हो।
घरेलु टिम म्यानचेस्टर सिटीले सुरुवात मै गोल गर्दै अग्रता बनाएको थियो। म्यानचेस्टर सिटीका केभिन डे ब्रुयन र फिल फोडेनले गोल गरे। यता, बोरुसिया डोर्टमुन्डका मार्को रेउसले गोल गरे।
केभिन डे ब्रुयनले खेलको १९ औं मिनेटमा गोल गर्दै म्यानचेस्टर सिटीलाई १–० गोलको अग्रता दिलाएका थिए। उनकै गोलमा म्यानचेस्टर सिटीले खेलको पहिलो हाफसम्म १–० गोलको अग्रता बनाएको थियो।
सुरुवातदेखि नै खेलमा आफ्नो पकड बनाएको सिटीले एक पछि अर्को गोल गर्ने अवसर सिर्जना गरेको थियो। तर खेलको ८४ औं मिनेटमा डोर्टमुन्डका मार्को रेउसले गोल गर्दै खेलमा १–१ गोलको बराबरी बनाए।
खेलको ९० औं मिनेटमा सिटीले गोल गर्दै डोर्टमुन्डलाई हराएको हो। इल्के गुन्डोगनको पासमा फिल फोडेनले गोल गर्दै म्यानचेस्टर सिटीलाई २–१ गोलको जित दिलाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766928868.png)
-1764146706.png)
-1766648928.png)
