फाइल तस्बिर
काठमाडौं–यो वर्ष वर्षा र सहकालका देवता मानिने सेतो मत्स्येन्द्रनाथको रथयात्रा नरोकिने भएको छ। कोरोनाबाट बच्न स्वास्थ्य सुरक्षाका मापदण्ड अपनाएर रथयात्रा चलाउने तयारी सरोकारवालाले गरेका हुन्।
आइतबार गुठी संस्थान, सेतो मत्स्येन्द्रनाथका पुजारी, रथयात्रा मार्गमा पर्ने सङ्घसंस्थाका प्रतिनिधि, हिन्दू र बौद्ध धर्मावलम्बी, संस्कृतिविद्लगायत सरोकारवाला निकायको संयुक्त बैठकले रथयात्रा गर्ने निर्णय गरेको हो।
सबैको सहमति र सहकार्यमा स्वास्थ्यसम्बन्धी मापदण्ड पूरा गरी रथयात्रा गरिने निर्णय भएको सेतो मत्स्येन्द्रनाथ रथ यात्रा व्यवस्थापन समितिका संयोजक नीलकाजी शाक्यले बताए।
प्रत्येक वर्ष चैत शुक्ल अष्टमीदेखि दरबारमार्गस्थित तीनधारा पाठशालाबाट रथयात्रा सुरु हुन्छ । शहरको भित्री भागमा तीन दिनसम्म रथयात्रा चल्ने गर्छ । असन, वसन्तपुर, जैसीदेवल, लगन हुँदै रथयात्रा मत्स्येन्द्रबहालमा ल्याएर अन्त्य गरिन्छ।
अष्टमीका दिन बिहान सेतो मत्स्येन्द्रनाथको खट मत्स्येन्द्रबहालबाट तीनधारा पाठशाला लगिन्छ। कुमारीलाई पनि त्यहाँ लगेर रथयात्रा सुरु गर्ने परम्परा छ। रथयात्रा पहिलो दिन असनमा लगी राखिन्छ । राति असनमा राष्ट्रपतिले रथको दर्शन गरी प्रसाद ग्रहण गर्ने परम्परा छ।
यस वर्ष वैशाख ७ गतेदेखि रथयात्रा सुरु हुने समितिको संयोजकसमेत रहेका काठमाडौं महानगरपालिका–२५ का अध्यक्ष शाक्यले बताए।
गत वर्ष कोरोना महामारीबाट बच्न बन्दाबन्दी जारी गरिएपछि रथयात्रा रोकिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1767770856.png)
