काठमाडौं- टोटनह्याम र म्यानचेस्टर सिटीबीच हुने काराबाओ कप फाइनल खेलमा आठ हजार दर्शकलाई रंगशाला प्रवेश गर्न अनुमति दिइने भएको छ। लण्डनको वेमब्लीमा स्टेडियममा अप्रिल २५ मा हुने खेल कोरोनाबीच दर्शक उपस्थितिको परीक्षणका रुपमा पनि हेरिएको छ।
फाइनल खेलका लागि दुवै टिमको समर्थकलाई टिकट खरिदको सुविधा दिइने बताइएको छ। इंग्ल्यान्ड फुटबल लिगका प्रमुख रिक प्यारीले दर्शकलाई अनुमति दिइने विषय नयाँ समयका लागि महत्वपूर्ण भएको बताए।
त्यसअघि अप्रिल १८ मा लेस्टर सिटी र साउथह्याम्पटनबीच हुने एफए कप सेमिफाइनलमा चार हजार दर्शकलाई अनुमति दिइने भएको छ। एफए कपको मे १५ मा हुने फाइनलमा २१ हजार दर्शकलाई अनुमति दिइँदै छ।
यिनै दर्शकसहितका खेलले दर्शकको उपस्थितिमा कसरी काम गर्ने भन्ने निर्णय लिइने बताइएको छ। त्यसमा विशेष गरी कोरोना खोप लगाइएको, केही सयमअघि मात्र नेगेटिभ टेस्ट र रोग प्रतिरोधात्मक क्षमता वृद्धिलाई हेरिने भएको छ।
फुटबलबाहेक पनि अरु केही खेलमा बेलायतमा दर्शकको उपस्थिति परिक्षण गर्न लागिएको छ। गएको वर्ष कोरोना महामारीका रुपमा फैलिएयता दर्शकबिनाको फुटबल खल्लो भइरहेको छ। जसले समर्थकका हिसाबले मात्र नभई आर्थिक रुपमा पनि क्लबहरु समस्यामा परिरहेका छन्।
दर्शकमध्ये एकअर्कामा सम्पर्क नहुने गरी दर्शकसहितको फुटबल कसरी अघि बढाउन सकिन्छ भन्नेबारे युरोपियन लिगहरुमा छलफल भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
