कञ्चनपुर- खुला सीमा क्षेत्र रहेको कञ्चनपुरको दोधारा चाँदनीमा मानव बेचबिखन तथा ओसारपसार नियन्त्रणका लागि समिति गठन गरिएको छ। मानव बेचबिखनको उच्च जोखिमा रहेको दोधारा चाँदनीमा नगर प्रमुख वीरबहादुर सुनारको संयोजकत्वमा १३ सदस्यीय समिति गठन गरिएको हो।
समितिको सदस्यमा नगर उपप्रमुख चिनी गिरी, प्रहरी निरीक्षक लालबहादुर बम, प्राध्यापक यज्ञराज पण्डित, नगरपालिकाको स्वास्थ्य शाखा प्रमुख जयबहादुर महरा, शिक्षा शाखा प्रमुख हरिदत्त जोशी, माइती नेपाल कञ्चनपुरका महेश्वरी भट्टलगायत रहेका छन्।
‘नेपाल-भारत खुला सीमा क्षेत्रका कारण नगरपालिका मानव बेचबिखनको उच्च जोखिम छ’, नगर प्रमुख सुनारले भने, ‘यसलाई नियन्त्रण गर्नका लागि नवगठित समितले सघाउ पुर्याउने छ।’ मानव बेचबिखन नियन्त्रण र जनचेतना सँगसँगै लैजानुपर्ने उनको भनाइ छ।
अवैध बाटोको प्रयोग गरी चेलिबेटीलाई प्रलोभनमा पारेर भारततर्फ लैजाने कार्य रोक्नका लागि विभिन्न चुनौतीको सामना गर्दै कार्य अगाडि बढाउँदै आएको माइती नेपाल कञ्चनपुरका संयोजक महेश्वरी भट्टले बताइन्।
समितिले रोजगारी, विवाहलगायत प्रलोभनमा पारेर भारततर्फ जान लागेका महिलाहरूको सीमा क्षेत्रमा रोकथामसँगै परिवारसँग पुनः मिलन गराउनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
