काठमाडौं– नेपाल, बंगलादेश र कीर्गिस्तानको यु–२३ टिमबीच हुने ‘थ्री नेसन्स कप’ फुटबल प्रतियोगिता आज (मंंगलबार) बाट सुरु हुँदैछ।
अखिल नेपाल फुटबल संघ (एन्फा) ले खेल हेर्न १२ हजार दर्शकलाई रंगशालामा प्रवेश गर्न दिनेछ। तर, पछिल्लो समयमा कोरोना भाइरसको झनै संक्रमण बढेपछि कति दर्शकलाई रंगशालामा प्रवेश गराउने भन्नेमा एन्फा अन्यौलमा छ। गत चैत ८ गते स्वास्थ्य तथा जनसंख्या मन्त्रालयले छिमेकी मुलुक भारतमा कोरोना संक्रमणको संख्या ह्वात्तै बढेको र नेपालमा यसको असर पर्ने भन्दै प्रेस विज्ञप्ति निकालेको थियो।
स्वास्थ्य मन्त्रालयको प्रेस विज्ञप्तिमा भनिएको छ, ‘विगत केही हप्तादेखि विश्वभरि खासगरी छिमेकी देशहरुमा कोभिड–१९ को संक्रमण बढ्दो क्रममा देखिएको छ। नेपालमा समेत संक्रमण बढ्न सक्ने अवस्थालाई मध्यनजर गर्दै देशभर सभा, जुलुस, र्याली, भेला, जमघट, गोष्ठी, सेमिनार, बैठक। भीडभाड हुने व्यवसाय र कार्यहरु नगर्नु।’ तर मंगलबार (आज) बाट सुरु हुने थ्री नेसन्स लिग फुटबलमा एन्फाको भने १२ हजार दर्शक रंगशालामा प्रवेश गराउने लक्ष्य छ।
एन्फाका प्रवक्ता किरण राई भन्छन्, ‘अहिलेलाई १२ हजार दर्शकलाई प्रवेश दिने भन्ने हो।’ त्यसो त, रंगशालाको क्षमता १५ हजारको हो। तीन हजार भने सामाजिक दूरी कायम राख्नका लागि छुट्याइएको एन्फाले जनाएको छ। ‘१५ हजारमा १२ हजार मात्रै दर्शकलाई प्रवेश गराउँदा तीन हजार सिट खाली रहन्छ। यसले सामाजिक दूरी कायम हुन्छ।’
एन्फाले कोरोना संक्रमण हुनबाट बच्नका लागि चैत ९ गते प्रेस विज्ञप्ति जारी गर्दै रंगशालामा प्रवेश गर्ने सबैले अनिवार्य मास्क र स्यानिटाइजर लगाउनु पर्ने सर्त राखेको छ। त्यस्तै, तापक्रम नाप्ने र सामाजिक दूरी कायम गरी बस्न समेत सबैलाई एन्फाले आग्रह गरेको छ। २०७२ सालको भूकम्पपछि नेपाली राष्ट्रिय फुटबल टिमले पहिलो पटक दशरथ रंगशालामा अन्तर्राष्ट्रिय खेल खेल्न लागेको हो।
यसअघि १३ औं सागको पुरुष फुटबलमा नेपालले त्यही रंगशालामा स्वर्ण पदक जितेपनि त्यो बेला यु–२३ टिम सहभागि भएको थियो। लामो समयपछि दशरथ रंगशालामा खेल्न खेलाडी उत्साहित देखिन्छन्। ‘लामो समयपछि दशरथ रंगशालामा खेल्दैछौं। कोभिडको समयपछि दर्शकसहित रंगशालामा खेल हुँदैछ। त्यसैले हामी सबै जनामा नयाँ उर्जा बढेको छ,’ उपकप्तान रोहित चन्दले भने।
टिकटदर ७ सय र १५ सय १६ गतेसम्म हुने थ्री नेसन्स कपको लागि रंगशालाको भिआइपीतर्फको प्याराफिटमा टिकट दर १५ सय रुपैयाँ र सामान्य प्याराफिटतर्फ ७ सय रुपैयाँ तोकेको छ। जहाँ भिआइपीतर्फ प्रत्येक खेलमा १५ सय वटा टिकट र सामान्यतर्फ १० हजार ५ सय वटा टिकट एन्फाले बेच्ने छ। सामाजिक सञ्जालमा टिकटदर निकै महँगो भएको भन्दै आलोचना भए पनि एन्फाले टिकटको मूल्य नघटाउने स्पष्ट पारेको छ।
डेढ करोड रुपैयाँ आम्दानी गर्ने लक्ष्य राखेको एन्फाले एक करोड रुपैयाँ खर्च हुने अनुमान गरेको छ। त्यस्तै, प्रतियोगिताबाट बचेको ५० लाख रुपैयाँ नेपाली फुटबलको विकासमा काम गर्ने एन्फाले योजना छ। प्रतियोगिताको मुख्य आम्दानीको रुपमा एन्फाले टिकट विक्रीलाई मानेको छ।
एउटा खेलमा १२ हजार दर्शकलाई टिकट बेचेर पैसा आम्दानी गर्नै एन्फाको योजनालाई भने बढ्दो कोरोना संक्रमणले धक्का दिएको छ। प्रतियोगिताको विजेताले ५ हजार डलर र उपविजेताले ३ हजार डलर पुरस्कार पाउनेछ। यस्तै प्रतियोगिताको उत्कृष्ट खेलाडीलाई ५ सय डलर र हरेक खेलमा ‘म्यान अफ दि म्याच’ हुने खेलाडीले २ सय ५० डलर पुरस्कार पाउनेछन्।
प्रतियोगिताको पहिलो खेलमा बंगलादेश र कीर्गिस्तानको यु–२३ टिमले आज (मंगलबार) ५ः३० बजे प्रतिस्पर्धा गर्नेछ। एन्फले निकालेको तालिका अनुसार नेपालले आफ्नो पहिलो खेल १२ गते किर्गीस्तानको यू–२३ टिमसँग खेल्नेछ। नेपालले चैत १४ गते बंगलादेशसँग लिग चरणको अन्तिम खेल खेल्नेछ। अंक तालिकाको शीर्ष दुई टिमले फाइनलमा प्रतिस्पर्धा गर्नेछ। फाइनल खेल १६ गते दशरथ रंगशालामा हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
