काठमाडौं- स्पेनिस क्लब एथ्लेटिको मड्रिडमा रहेका लुइस स्वारेजले व्यावसायिक खेल जीवनमा पाँच सय गोल पूरा गरेका छन्।
ला लिगामा अलाभेसविरुद्ध १–० ले जित्दा स्वारेजले खेलको ५४औँ मिनेटमा गोल गरेका हुन्। अलाभेसविरुद्धको गोल एथ्लेटिको मड्रिडमा ३४ वर्षका स्वारेजको १९औँ गोल हो।
उनले बार्सिलोनाबाट १९८, इंग्लिस क्लब लिभरपुलबाट ८२ साथै उरुग्वेको राष्ट्रिय टिमबाट ६३ गोल गरेका छन्। उरुग्वेकै क्लब नासिनलबाट खेल जीवन सुरु गरेका स्वारेजले त्यहाँ १२ गोल गरेका थिए।
त्यहाँबाट डच क्लब एफसी ग्रोनिनजेनमा उनले १५ गोल गरे। २००७ मा नेदरल्यान्ड्सकै आयाक्समा गएका उनले त्यहाँ १११ गोल गरेका थिए।
खेलको ८५औँ मिनेटमा अलाभेसले पाएको पेनाल्टीमा जोसेलुले गोन गर्न सकेनन्। जसले स्वारेजको गोलमा जितमा निर्णायक बन्यो।
आइतबार राति नै बार्सिलोनाले रियल सोसिडाडलाई ६–१ ले हराएसँगै एथ्लेटिको मड्रिडमाथि दबाब थपिएको छ। लिग अंक तालिकामा शीर्ष स्थानमा रहेको एथ्लेटिको मड्रिडको २८ खेलमा ६६ अंक रहेको छ।
दोस्रोमा रहेको बार्सिलोनाको २८ खेलमा ६२ र समान खेलसहित तेस्रो स्थानमा रहेको रियल मड्रिडको ६० अंक रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
