काठमाडौं- महोत्तरीको पिपरा गाउँपालिका-५, सहोडवाबाट बेपत्ता भएका झा दम्पती मोसाफिर झा (६५) र उनकी श्रीमती गीतादेवी झा (६०) महिना दिन बित्न लाग्दा समेत फेला परेका छैनन्।
जिल्ला प्रहरी कार्यालय महोत्तरी, प्रदेश-२ प्रहरी कार्यालय र सिआइबीको संयुक्त टोलीले खोजी गर्दा समेत उनीहरुको अवस्थाबारे अहिलेसम्म क्लु फेला पर्न सकेको छैन। म्यानुअल र टेक्निकल पाटोबाट अनुसन्धान गरे पनि अहिलेसम्म उनीहरुको अवस्थाबारे कुनै क्लु फेला पर्न नसकेको प्रदेश-२ का डिआइजी धीरजप्रताप सिंह बताउँछन्। अनुसन्धानमा दक्ष भनिएका प्रहरी अफिसरदेखि कुकुरसम्म परिचालन गरिए पनि झा दम्पतीको अवस्था भने अझै अनविज्ञ छ।
फागुन १० गते सहोडवास्थित आफ्नै घरमा बेग्लाबेग्लै कोठामा सुतेका झा दम्पती बिस्तरासहित वेपत्ता भएका थिए। उनीहरु सुतेको कोठामा रगतका टाटा समेत देखिएको थियो। त्यसपछि घटना शंकास्पद भन्दै खोजी सुरु गरिए पनि उनीहरुको अवस्था भने अझै अन्योल छ।
दम्पती बेपत्ता भएको ४ दिनपछि फागुन १४ गते प्रहरीले उनीहरुले प्रयोग गर्ने २ वटा झुल घर नजिकैको एक पोखरीमा फेला पारेको थियो। झा दम्पतीको बेपत्तामा संलग्न भएको हुनसक्ने आरोपमा प्रहरीले ४ जनालाई पक्राउ गरेर पनि अनुसन्धान गरिरहेको छ। झाका छिमेकी समेत रहेका रामबाबु यादव, उनका दुई छोरा र भारतीय नागरिक हरेन्द्र ठाकुरलाई पक्राउ गरेर अनुसन्धान सुरु भइरहेको छ।
उनीहरुले झा दम्पती बेपत्ताबारे आफूहरुलाई केही जानकारी नभएको दाबी गरेका छन्। यद्यपि डिआइजी सिंह भने उनीहरुको बयान नै शंकास्पद रहेको बताउँछन्। ‘जग्गाको विषयमा झाको रामबाबुसँग विवाद हुनु र भोलिपल्ट पेशी हुँदा अघिल्लो दिन नै घरबाट बेपत्ता हुनुले उनीहरुको भूमिका शंकास्पद देखिन्छ’ डिआइजी सिंह भन्छन्।
बेपत्ता झा साक्षी बसेको एउटा जग्गाको विवाद भएको अनुसन्धानबाट खुलेको छ। झाको छिमेकीसमेत रहेका जग्गा व्यवसायी रामबाबु यादवसँग विवाद भएको थियो। झा जग्गाको साक्षी बसेका थिए। फागुन ११ गते जग्गा विवाद मुद्दाको पेशी थियो तर, झा दम्पती भने अघिल्लो रातिबाटै बेपत्ता भएका हुन्।
दम्पती बेपत्ता भएपछि तीन कोणबाट अनुसन्धान भइरहेको प्रहरीले जनाएको छ। पारिवारिक, व्यक्तिगत रिसिइबी र आर्थिक गरी तीन कोणबाट अनुसन्धान भइरहेको छ। तीनै पाटाबारे विभिन्न टेक्निकल एनालाइसिस, म्यानुअल अनुसन्धान, सोधपुछ भइरहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
