काठमाडौं- नेपालको पहिलो फ्रेन्चाइज फुटबल लिग ‘नेपाल सुपर लिग’ फुटबल प्रतियोगिताका लागि ३५ खेलाडी सर्वाधिक मूल्यमा बिक्री भएका छन्। शुक्रबार भएको अक्सनमा लिगका सात टिमले विभिन्न तीन समूहमा रहेका १ सय ४९ जना खेलाडीबाट ३५ खेलाडीलाई सर्वाधिक मूल्य तिरेका हुन्।
जसमा एक लाख रुपैयाँबाट बोली सुरु हुने समूह ‘ए’ मा रहेका आठ खेलाडीलाई टिमले सर्वाधिक दुई लाख रुपैयाँ मूल्य तिरेका हुन्। ५० हजार रुपैयाँबाट बोली सुरु हुने समूह ‘बी’ मा रहेका १७ खेलाडी सर्वाधिक १ लाख २० हजार रुपैयाँमा बिक्री भए। २० हजार रुपैयाँबाट बोली सुरु हुने समूह ‘सी’ मा रहेका १० खेलाडी सर्वाधिक ७५ हजार रुपैयाँमा बिक्री भए।
समूह ‘ए’बाट सर्वप्रथम तेज तामाङ सर्वाधिक दुई लाख रुपैयाँमा काठमाडौं रेजर्समा अनुबन्धित भएका थिए। उनका लागि धनगढी एफसी, एफसी चितवन, विराटनगर सिटी एफसी, बुटवल लुम्बिनी एफसी र पोखरा थन्डर्सले पनि बोली लगाएका थिए। जसमा गोलाप्रथा गर्दा काठमाडौंले उनलाई भित्र्याउन पायो।
यस्तै दुई लाख रुपैयाँमा नै विशाल सुनुवार चितवनमा अनुबन्धित भए। उनका लागि पोखरा र ललितपुरले पनि बोली लगाएको थियो। सुनिल बल सर्वाधिक दुई लाख रुपैयाँमा नै विराटनगरमा अनुबन्धित भए। उनका लागि धनगढी र चितवनले पनि बोली लगाएका थिए। तर गोलप्रथामा जाँदा उनी विराटनगरमा पुगेका हुन्।
दीप कार्की दुई लाख रुपैयाँमा नै पोखरामा अनुबन्धित भए। उनका लागि विराटनगर र ललितपुरले समेत इच्छा देखाएको थियो। साथै एरिक बिष्ट दुई लाख रुपैयाँमा नै ललितपुरमा अनुबन्धित भए। उनका लागि पोखराले पनि बोली लगाएको थियो।
राष्ट्रिय टिमका नियमित खेलाडी सुजल श्रेष्ठ सर्वाधिक दुई लाखमा नै पोखरामा अनुबन्धित भए। उनका लागि विराटनगर, बुटवल र धनगढीले पनि बोली लगाएको थियो।
विकास खवास सर्वाधिक दुई लाख रुपैयाँमा चितवनमा अनुबन्धित भए। उनका लागि विराटनगर, ललितपुर र धनगढीले पनि बोली लगाएको थियो। यस्तै दिनेश राजबंशी सर्वाधिक दुई लाखमा नै धनगढीमा अनुबन्धित भए। विराटनगरले पनि उनका लागि बोली लगाएको थियो।
यस्तै समूह ‘बी’ मा रहेका १७ खेलाडी सर्वाधिक १ लाख २० हजार रुपैयाँमा बिक्री भए। जसमा रुपेश केसी धनगढीमा, कमल श्रेष्ठ ललितपुरमा, विजय धिमाल विराटनगरमा, रविन श्रेष्ठ बुटवलमा, प्रवेश दनुवार ललितपुरमा, मिक्चेन तामाङ ललितपुरमा, कुलदीप कार्की चितवनमा, दीपक गुरुङ पोखरामा, विवेक बस्नेत धनगढी, बिमल राना ललितपुरमा, अमिर श्रेष्ठ बुटवलमा, नितिन थापा पोखरामा, विश्वास श्रेष्ठ काठमाडौंमा, राजेश परियार पोखरामा, हेम तामाङ विराटनगरमा, पुजन उपरकोटी धनगढीमा र टेकबहादुर बुढाथोकी चितवनमा अनुबन्धित भए।
यस्तै समूह ‘सी’ मा रहेका १० खेलाडी सर्वाधिक ७५ हजार रुपैयाँमा बिक्री भए। जसमा बिक्रम धिमाल विराटनगर, सूर्य अधिकारी विराटनगर, रुपबहादुर लामा चितवन, अशोक खवास धनगढीमा, निरज बस्नेत ललितपुरमा, बिमल पाण्डे काठमाडौं, गौतम श्रेष्ठ पोखरा, गौरव बुढाथोकी ललितपुर, युद्ध शाही धनगढी र मनिष थापा चितवनमा अनुबन्धित भए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
