काठमाडौं– नाइजेरियन प्रशिक्षक तोपे फुजा धनगढी एफसीको मुख्य प्रशिक्षकमा अनुबन्धित भएका छन्। धनगढी एफसीले बिहीबार तोपे फुजालाई अनुबन्धित गरेको हो।
नेपाल सुपर लिग (एनएसएल) को फ्रेन्चाइज टिम धनगढीले यसअघि राष्ट्रिय टिमका नियमित सदस्य विशाल राईलाई ‘मार्की’ खेलाडीको रुपमा अनुबन्धित गरिसकेको छ। ताेपे फुजाकै अगुवाइमा मनाङ मस्र्याङदी क्लबले २०७५ सालको सहिद स्मारक ए डिभिजन लिगको उपाधि जितेको थियो।
गत वर्ष २०७६ मा पनि मनाङमै रहेका थिए। सन् २००५ मा मलेसियाको सवाह एफसीमा सहायक प्रशिक्षकको रुपमा कोचिङ करियर सुरु गरेका फुजाले नेपालको ए डिभिजन लिग डेब्यू मछिन्द्र क्लबबाट २००६ देखि सुरु गरेका थिए। त्यसपछि भारतमा व्यस्त रहेका उनले सिमला योङ, मुम्बई युनाइटेढ, पियरलेस, हिन्दुस्तान एफसी, टलिगन्ज अग्रगामी, मोहम्मडन स्पोटिङ र चेन्नाई एफसीको टिम सम्हालेका थिए।
धनगढी एफसीको मालिक गो ड्रिमर्स प्रालि रहेको छ। फुजालाई अनुबन्धित गर्दै गो ड्रिमर्स प्रालिका प्रमुख सुवास शाहीले उनको फुजाको प्रशिक्षणमा धनगढीले राम्रो प्रदर्शन गर्ने विश्वास लिए।
उनले भने, ‘देशमै पहिलोपल्ट हुन लागेको फ्रेन्चाइज फुटबल प्रतियोगिताको धनगढी एफसीको प्रशिक्ष्ँकमा तोपे फुजालाई आबद्ध गर्न पाउँदा एकदमै खुशी छौं। उनको अगामनले धनगढी एफसीले नेपाल सुपर लिगमा उत्कृष्ट प्रदर्शन गर्ने विश्वास छ।’
सम्झौतापछि फुजाले महत्वपूर्ण जिम्मेवारी पाउँदा खुशी रहेको बताए। उनले भने, ‘नेपाल सुपर लिगको पहिलो संस्करणमा नै महत्वपूर्ण जिम्मेवारी पाउँदा निक्कै खुशी र उत्साहित छु।’ क्लबको व्यवस्थापन र टिम मालिकको लक्ष्य देखेर म निक्कै प्रभावित भएको छु। हाम्रो लक्ष्य उपाधि जित्ने नै हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
