काठमाडौं– डिफेन्डिङ च्याम्पियन बायर्न म्युनिक च्याम्पियन्स लिग फुटबलको क्वाटरफाइनलमा प्रवेश गरेको छ। जर्मन क्लब बायर्नले इटालियन क्लब लाजियोलाई प्रिक्वाटरफाइनलमा समग्रमा ६–२ ले हराउँदै क्वाटरफाइनलमा स्थान बनाएको हो।
घरेलु टिम बायर्नले लाजियोलाई च्याम्पियन्स लिगअन्तर्गत अन्तिम १६ को दोस्रो लेगमा २–१ गोलले पराजित गर्न सफल भयो। यसअघि पहिलो लेगमा भने बायर्नले लाजियोलाई ४–१ को फराकिलो अन्तरले पराजित गरेको थियो।
बायर्नको जितमा रोबर्ट लेवान्डोस्की र एरिक म्याक्सिम मोटिङले गोल गरे। लाजियोका मार्को पारोलोले एक गोल फर्काएका थिए। दोस्रो लेगको ३३ औं मिनेटमा रोबर्ट लेवान्डोस्कीले पेनाल्टीबाट गोल गर्दै बायर्नलाई १–० गोलको अग्रता दिलाए।
७३ औं मिनेटमा एरिक म्याक्सिम मोटिङले गोल गरेपछि बायर्नले २–० गोलको अग्रता बनायो। खेलको ८२ औं मिनेटमा मार्को पारोलोले गोल गर्दै लाजियोलाई २–१ गोलको स्थितिमा पुर्याए पनि बायर्नले खेल जित्यो।
यो सँगै क्वाटरफाइनल समीकरण पूरा भएको छ। क्वाटरफाइनलमा बायर्नसँगै, बोरुसिया डोर्टमुन्ड, पोर्टो, पिएसजी, लिभरपुल, रियल मड्रिड, म्यानचेस्टर सिटी र चेल्सी पुगेका छन्।
युभेन्टस, सेभिया, बार्सिलोना, लाइपजिग, एटलान्टा, मोन्चेनग्लादबाख, लाजियो र एथ्लेटिको मड्रिड भने अन्तिम १६ बाटै बाहिरिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
