काठमाडाैं- रुसले गत नोभेम्बरमा भएको अमेरिकी राष्ट्रपतीय निर्वाचनलाई प्रभावित गरी राष्ट्रपति जो वाइडेनका विरुद्ध जनमत सिर्जना गर्न खोजेको खुलासा भएको छ। पूर्वराष्ट्रपति डोनाल्ड ट्रम्पलाई जिताउन रुसले सहयोग गरेको अमेरिकी गुप्तचर विभागबाट मंगलबार सार्वजनिक प्रतिवेदनले खुलासा भएकाे हाे।
इरानले निर्वाचन परिणामलाई प्रभाव पार्न व्यापक प्रयास गरेको गुप्तचरको रिपोर्टमा बताइएको छ। प्रतिवेदनमा भनिएको छ, ‘इरानले मतदानमा विश्वास कम गर्न खोज्यो र ट्रम्पलाई पुनः राष्ट्रपति बन्न नदिन कोसिस गरेको देखिएको छ। यता पुटिनले ट्रम्पलाई सहयाेग गरेकाे खुलेकाे छ।’
यी प्रयासहरूका बाबजुद गुप्तचर अधिकारीहरूले अमेरिकी निर्वाचनमा मतदान प्रक्रियाको कुनै प्राविधिक पक्षसँग छेडछाड गरेर हस्तक्षेप गरेको प्रमाण फेला नपरेको जनाइएको छ।
राष्ट्रपति जो वाइडेनले बुधबार एबीसीको कार्यक्रम ‘गुड मोर्निङ अमेरिका’मा भने, ‘म पुटिनलाई राम्रोसँग चिन्छु, उनले गल्ती गरेका छन्। यसको मूल्य चाँडै चुकाउनुपर्नेछ।’
रुसले भने अमेरिकी गुप्तचर विभागको आरोपलाई खण्डन गरेको छ। ‘हाम्रो देशमाथि लगाइएको आरोप खण्डन गर्दछौं। यो आरोप निराधार हो। कुनै उम्मेदवारविरूद्ध प्रचार गरेका थिएनौं र कुनै हस्तक्षेप गरेको छैनौं,’ रुस सरकारका प्रवक्ता दिमित्री पेसकोभले पत्रकारसँग भने।
यता रिपोर्टमा चीनले कुनै हस्तक्षेप नगरेको जनाइएको छ। ‘चीनले अमेरिकासँगको स्थिर सम्बन्धलाई महत्व दिएको छ र निर्वाचनमा हस्तक्षेप गरेको छैन। यसमा फस्न सक्ने कुनै जोखिम उठाएको भन्ने प्रमाण फेला परेको छैन,’ रिपोर्टमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
