काठमाडौं- काठमाडौं महानगरपालिकाले नगर-नगर साझेदारी कार्यक्रम अन्तर्रगत बुधबार उपत्यकाका पाँचवटा नगरपालिकालाई धार्मिक तथा पर्यटकीय पार्क तथा बहुदेश्यीय उद्यान निर्माणका लागि सहयोग गर्ने सम्झौतापत्रमा हस्ताक्षर गरेको छ।
दुईवटा नगरपालिकासँग पनि छिट्टै हस्ताक्षर गर्ने महानगरपालिकाले जानकारी दिएको छ। कार्यक्रमपछि महानगरपालिकाले पाँचवटा नगरपालिकालाई सम्झौतापत्र अनुरुपको चेक समेत हस्तान्तरण गरेको छ। राष्ट्रिय सभागृहमा आयोजित कार्यक्रममा काठमाडौं महानगरपालिकाका प्रमुख विद्यासुन्दर शाक्यले उपत्यकाका ती नगरपालिकासँग सम्झौतासहित चेक हस्तान्तरण गरेका हुन्।
काठमाडौं महानगरपालिकाले २०७७/७८ को स्वीकृत नीति तथा कार्यक्रम बमोजिम नगर–नगर साझेदारी कार्यक्रम शीर्षकमा कागेश्वरी मनोहरा, दक्षिणकाली, ताराकेश्वर, कीर्तिपुर र मध्यपुर ठिमी नगरपालिकासँग धार्मिक तथा पर्यटकीय पार्क एवं बहुउद्देश्यीय उद्यान निर्माणका लागि आर्थिक सहयोग गर्ने सम्झौता गरेको काठमाडौं महानगरपालिकाका प्रमुख शाक्यले बताए।
सम्झौता अनुसार दक्षिणकाली नगरपालिका क्षेत्रभित्र रहेको वडा–५ गोरखनाथ डाँडामा अवस्थित बहुदेश्यीय उद्यान निर्माणका लागि थप एक करोड रकम हस्तान्तरण गरिएको छ। यसअघि पनि सोही उद्यान निर्माणका लागि महानगरपालिकाले एक करोड रुपैयाँ सहयोग गरेको थियो। त्यसैगरी ताराकेश्वर नगरपालिकाको भौगोलिक क्षेत्र भित्र रहेको वडा–५ को भ्युटावर र वडा–२ को ताराकेश्वर राष्ट्रिय झण्डा पार्क निर्माणका लागि जम्मा एक करोड सहयोग प्रदान गरेको छ। यसअघि ताराकेश्वर धाम निर्माणका लागि एक करोड रुपैयाँ सहयोग गरेको थियो।
त्यसैगरी, कागेश्वरी मनोहरा नगरपालिकाको भौगोलिक कार्यक्षेत्रभित्र रहेको वडा–१ मा अवस्थित प्रसिद्ध कागेश्वरी मन्दिर र त्यस वरिपरीको क्षेत्रलाई समेटी कागेश्वरी धाम निर्माणका लागि पनि रु. एक करोड नै सहयोग गरेको छ। यसअघि पनि सो नगरपालिकालाई रु. एक करोड सहयोग गरेको थियो।
किर्तिपुर नगरपालिकामा युद्ध स्मारक पार्क निर्माणका लागि पनि आजै सम्झौतापत्रमा हस्ताक्षर गरी काठमाडौं महानगरपालिकाले रु. एक करोड प्रदान गरेको छ। उक्त नगरपालिकाको भौगोलिक क्षेत्रभित्र रहेको वडा १,२ र १० लाई समेटी त्यहाँ करिब ५५ रोपनी क्षेत्रफलमा युद्ध स्मारक पार्क निर्माण भइरहेको छ।
त्यस्तै, मध्यपुर थिमी नगरपालिकाको वडा नम्बर–४ मा निर्माणधीन शंखधर पार्क निर्माणका लागि पनि काठमाडौं महानगरपालिकाले थप रु. एक करोड सहयोग गरेको छ। यसअघि पनि महागनरपालिकाले सो उद्यान निर्माणका लागि रु. एक करोड सहयोग गरेको थियो।
त्यहाँ पनि करीब १० रोपनी क्षेत्रफलमा मण्डला, एम्पिथिएटर चिः बहालगायत निर्माण हुँदैछ। भक्तपुरकै चाँगुनारायण नगरपालिकालाई पनि काठमाडौं महानगरपालिकाले ताथलीमा उद्यान निर्माणका लागि रु. एक करोड नै दिने भएको छ। काठमाडौं महानगरपालिकाले चन्द्रागिरी नगरपालिकालाई पनि मातातीर्थ पार्क निर्माणका लागि रु. एक करोड सहयोग गर्ने भएको छ।
केही समयअघि भगिनी सम्बन्ध स्थापना गरेको मेलम्ची नगरपालिकालाई पनि आजै प्रमुख शाक्यले सो क्षेत्रमा मेलम्ची सिटी पार्क निर्माणका लागि रु एक करोड पचास लाख रुपैयाँको चेक हस्तान्तरण गरे। कार्यक्रममा ती सबै नगरपालिकाका प्रमुख र प्रमुख प्रशासकीय अधिकृतको पनि सहभागिता रहेको थियो।
काठमाडौं महानगरपालिकाले यसअघि काठमाडौंका १० नगरपालिका र भक्तपुरको मध्यपुर थिमीलाई नगर–नगर साझेदारी अन्तर्गत सहयोग गरेको थियो। महानगरपालिकाले पहिला सहयोग गरेका परियोजना सफल भएको अवस्थामा मात्रै थप सहयोग गर्ने नीति लिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
