काठमाडाैं- नेकपा (एमाले)का वरिष्ठ नेता माधवकुमार नेपाल पक्षले कर्णाली प्रदेश सरकारका मुख्यमन्त्री महेन्द्रबहादुर शाहीलाई दिएको समर्थन कायमै रहेको बताएको छ।
बुधबार एमालेको ओली पक्षका सांसद एवं एमाले प्रदेश सभा संसदीय दलका नेता यामलाल कँडेलसहितका नेताहरूको बैठकले मुख्यमन्त्री शाहीलाई दिएको समर्थन फिर्ता लिने र पार्टीको तर्फबाट सरकारमा सहभागी मन्त्रीलाई फिर्ता बोलाउने निर्णय गरेको थियो।
तर, नेपाल समूहले भने त्यसलाई पार्टीको नभइ गुटको निर्णयको संज्ञा दिएको छ। कर्णाली प्रदेश सरकारका आर्थिक मामिला तथा योजना मन्त्री एवं नेपाल समूहका नेता प्रकाश ज्वालाले मुख्यमन्त्री शाहीलाई दिएको समर्थन कायमै रहेको बताए।
'त्यो गुटगत बैठक हो। दलकाे विधान नै बनेको छैन। त्यो बैठक प्रचलित कानुन, विधि र प्रक्रियासम्मत छैन। औपचारिक सूचना नदिएर बोलाइएको गुटगत बैठकले गरेका भनिएका निर्णयहरुप्रति हाम्रो असहमति छ', ज्वालाले भने, 'यो नेकपा (एमाले) प्रदेश सभा दलको आधिकारिक निर्णय होइन। कर्णाली प्रदेश सरकारप्रति नेकपा (एमाले) प्रदेश सभा दलको समर्थन कायमै छ।'
प्रदेश सभामा एमालेका २० जना सांसद छन्। त्यसमध्ये राजबहादुर शाही सभामुख छन्। कुल ४० प्रदेश सभा सदस्य रहेको कर्णालीमा बहुमतका लागि २१ मत आवश्यक पर्छ। माओवादी केन्द्रका १३ जना सांसद छन्। शाहीलाई मुख्यमन्त्री निरन्तरताका लागि ८ मत आवश्यक पर्छ।
एमालेका सभामुखबाहेक १९ सांसदमध्ये नेपाल पक्षमा ८ जना खुलेका छन्। यसअघि नेपाल समूहमा खुलेकी पद्मा खड्का ओली समूहमा लागिसकेकी छन् भने नेपाल समूहमै रहेका दल रावल र नन्दसिंह बुढा पछिल्लो समय दुवै पक्षका बैठकमा सहभागी भएका छैनन्। प्रदेश सरकारमा एमालेका तर्फबाट ज्वाला, रावल र बुढा मन्त्री छन्। ओली पक्षले बोलाएको संसदीय दलकाे बैठकले पाँच दिनभित्र मन्त्रीहरूलाई फिर्ता हुन निर्देशन दिएको छ।
एमालेका दुई पक्ष एकै स्थानमा उभिए भने एमालेलाई सरकार बनाउन १ सांसदले आवश्यक बहुमत पुग्छ। बुधबारको संसदीय दलको बैठकमा एमालेका सबै सांसद उपस्थित भने थिएनन्।
१० सांसद मात्रै संसदीय दलको बैठकमा सहभागी भएका थिए दलका नेता कँडेलले बताए। आर्थिक मामिला मन्त्री ज्वालाले संसदीय दलको बैठकबारे कुनै जानकारी नभएको प्रतिक्रिया दिए। उनले दलकाे विधान नै नबनेकाले ओली पक्षले गरेको बैठक वैधानिक नहुने दाबी गरे।
माधव पक्षले बोलाएको राष्ट्रिय भेलामा सहभागी हुन काठमाडाैंमा रहेका ज्वालाले नेपाल लाइभसँग भने, 'बैठकबारे हामीलाई कुनै जानकारी छैन। बैठक बसेको हो भने त्यो अवैधानिक हो। पार्टीको आधिकारिक धारणा त्यो होइन। मुख्यमन्त्रीलाई हाम्रो समर्थन कायमै छ।'
नयाँ सरकार बनाउने कार्यमा माधव पक्षका सांसदले सहयोग गरे भने मुख्यमन्त्री शाहीको पद जोगिन सक्छ। ज्वालाले आफ्नो समूहमा स्पष्ट बहुमत रहेको दाबी गरेका छन्। बुधबारको बैठकमा सहभागी नभएका मन्त्री रावल र बुढा पनि आफूहरूसँगै रहेको उनको दाबी छ। उता दलका नेता कँडेलले पनि रावल र बुढाको आफूहरूलाई समर्थन रहेको दाबी गरेका छन्। कर्णालीमा कांग्रेसका ६ र राप्रपाका १ सांसद छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_Tr387xuecJ-1778130428.jpg)
-1764146706.png)
