पशुपतिमा आफ्नै धुनमा ‘मस्त’ सन्तमहन्त [तस्बिरहरू]

समाज

निमेषजंग राई बुधबार, फागुन २६, २०७७, १६:११

काठमाडाैं- शिवरात्रीका लागि पशुपतिनाथ मन्दिर क्षेत्रमा तयारी तीब्र पारिएको छ। यस वर्षको शिवरात्री बिहीबार परेको छ।

शिवरात्रीका लागि नेपालका विभिन्न क्षेत्र का साथै भारतबाट साधुसन्तहरु पशुपति मन्दिर परिसरमा आइपुगेका छन्। शिवरात्रीका दिन विशेष पूजा र भक्तिका लागि देशका विभिन्न भागका साथै भारतबाट समेत साधुसन्तहरु आउने गर्दछन्। यसरी आउने साधुसन्तलाई पशुपति क्षेत्र विकास कोषले शिवरात्री सम्पन्न भइसकेपछि दान दक्षिणासहित विदा गर्ने चलन छ।

पशुपति क्षेत्र विकास कोषले महाशिवरात्रीका दिन सहज, सुरक्षित र छिटो दर्शन गराउने कामलाई प्रभावकारी बनाएको बताएको छ। महाशिवरात्री पर्वमा पशुपति क्षेत्रमा दर्शन गर्न आउने भक्तालुहरुलाई व्यवस्थित रुपमा दर्शन गराउने तयारी गरिएको छ। तर, कोरोना महामारी अन्त्य नभएकाले सजगता भने अपनाइनेछ।

शिवरात्रीकै अवसरमा पशुपति क्षेत्रमा विशेष मेलासमेत लाग्ने गर्दछ। पशुपति क्षेत्र विकास कोषले शिवरात्रीको तयारी पूरा भएको बताएको छ।

फागुन कृष्ण चतुर्दशीका दिन मनाइने यो पर्वमा शिवालयहरुमा भक्तजनको भीड लाग्ने गर्दछ। यस दिन शिवालयमा बेलपत्र चढाउने, उपवास र रात्रि जागरण गर्नाले पुण्य प्राप्त हुने धार्मिक मान्यता छ।