निजी क्षेत्रलाई प्रधानमन्त्रीको आग्रह : औद्योगिक र आर्थिक विकासका लागि लगानी बढाउनुस्

राजनीति

नेपाल लाइभ सोमबार, फागुन २४, २०७७ १८:५७

काठमाडौं- प्रधानमन्त्री केपी शर्मा ओलीले औद्योगिक र आर्थिक विकासमा योगदान बढाउने गरि निजी क्षेत्रले लगानी बढाउनुपर्ने बताएका छन्। नेपाल उद्योग परिसंघको 'मेक इन नेपाल-स्वदेशी' अभियान सुरु गर्दै प्रधानमन्त्री ओलीले नेपाललाई आयातक र उपभोग्य देशबाट उत्पादक र निर्यातक देश बनाउन सबैले योगदान दिनुपर्ने उल्लेख गरे।

प्रधानमन्त्री ओलीले 'मेक इन नेपाल-स्वदेशी' नयाँ अभियान भएको बताए। 'यो एउटा नयाँ अठोट हो, राष्ट्रलाई आधुनिकीकरण र औद्योगीकरण गर्ने दिशामा महत्त्वपूर्ण हुन्छ भन्ने विश्वास लिएको छु,' उनले भने।

यस्ता अभियान साना देखिए पनि अर्थ ठूलो हुने उनको भनाइ छ। प्रधानमन्त्री ओलीले गुणस्तर र मूल्यमा प्रतिस्पर्धा गर्नेगरि उद्योगको क्षमता विकास गर्नुपर्ने बताए। सरकारले राष्ट्रिय आकांक्षा नै समृद्ध नेपाल र सुखी नेपाली तोकेर अघि बढेको भन्दै उनले समृद्धि र सुख सँगसँगै अघि बढाउनुपर्ने उल्लेख गरे।

प्रधानमन्त्री ओलीले नेपालमा आवश्यक नै नभएका वस्तु आयात भइरहेको भन्दै त्यसलाई न्यूनीकरण गर्नुपर्नेमा जोड दिएका छन्। उनले नेपालले वस्तु उत्पादन बढाउँदै अन्तर्राष्ट्रिय बजारमा त्यसलाई निर्यात गर्ने गरी काम गर्नुपर्ने उल्लेख गरे। उनले यसका लागि हालै शिलान्यास गरिएका औद्योगिक क्षेत्रमा उद्योग स्थापना गर्न उद्योगीलाई आग्रह पनि गरेका छन्।

कार्यक्रममा उद्योग, वाणिज्य तथा आपूर्तिमन्त्री लेखराज भट्टले निजी क्षेत्रसँग हातेमालो गर्न सरकार तयार रहेको बताएका छन्। उनले निजी क्षेत्रको आवश्यकताअनुसार लगानीमैत्री कानुन तर्जुमा गर्न सरकार प्रतिवद्ध रहेको पनि उल्लेख गरे।

नेपाल उद्योग परिसंघका अध्यक्ष सतिशकुमार मोरले अहिले नेपालको आर्थिक परिसूचक कमजोर रहेको भन्दै लगानी वृद्धि, औद्योगीकरण र रोजगारी सिर्जनामार्फत् नेपाललाई समृद्ध बनाउन परिसंघ लागिपर्ने उल्लेख गरे।

परिसंघले उत्पादन र खपतका सातवटा स्तम्भ निर्धारण गर्दै मेक इन नेपाल अभियान सुरु गरेको छ। जसमा उत्पादनतर्फ नेपाली उद्योगका लागि सहज व्यापार व्यवसायको वातावरण बनाउने, आयात प्रतिस्थापन, पूर्वाधारमा पुँजी खर्च र सेवा क्षेत्रको आधुनीकीकरण छन्। यस्तै खपततर्फ स्वदेशी वस्तुको उपभोग, स्वदेशी वस्तुको प्राथमिकता र स्थानी उत्पादनको लागि बजार खोज्ने रहेका छन्।

यसअभियानमार्फत् वार्षिक १ हजार नयाँ उद्योग दर्ता गराउने, सन् २०३० सम्ममा नेपालको कुल गार्हस्थ उत्पादनमा उद्योगको योगदान २६ प्रतिशत पुर्‍याउने र ५ वर्षमा ४ अर्ब ६० करोड डलर (५ खर्ब रूपैयाँ) बराबरको निर्यात गर्ने लक्ष्य राखिएको परिसंघका आर्थिक सल्लाहकार डा विश्व पौडेलले जानकारी दिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

एनसेल नेपाल सुपर लिगको लागि खल्ती र आइएमई पे आधिकारिक टिकेटिङ पार्टनर

परराष्ट्र मन्त्री राणा र भारतीय विदेश मन्त्री जयशंकरबीच भेटवार्ता

गाजा आक्रमण: ४ सयभन्दा बढी मारिए, सुरक्षित स्थानतर्फ जाँदै स्थानीय