काठमाडौं– स्पेनिस ला लिगामा शीर्ष स्थानमा रहेको एथ्लेटिको मड्रिड र तेस्रो स्थानमा रहेको रियल मड्रिडबीच आइतबार राति ९ बजे खेल हुँदैछ। जुन खेलको नतिजाले दुई टिमको अंक तालिकामा मात्र होइन लिगको उपाधिलाई समेत प्रभाव पार्नेछ।
‘हामी किन लिगको शीर्ष स्थानमा छौँ भन्ने देखाउन चाहन्छौँ,’ यही सिजन बार्सिलोनाबाट एथ्लेटिको गएका स्ट्राइकर लुइस स्वारेजले भनेजस्तो टीमका लागि चुनौतीसँगै शीर्ष स्थानमा बलियो बन्ने अवसर छ। जहाँ रियलले निकाल्ने नतिजाले दोस्रो स्थानमा रहेको बार्सिलोनाका लागि विशेष अर्थ राख्नेछ।
एथ्लेटिको २०१४ पछि यसै सिजन लिग उपाधि जित्न नजिक पुगेको हो। यस्तोमा रियललाई ला लिगामा पछिल्ला ९ खेल हराउन नसकेको एथ्लेटिकोलाई सहज भने छैन। यी दुईबीचको पछिल्ला ९ खेलमा पाँच खेल बराबरी भएका छन् भने ४ खेल रियलले जितेको छ। यही सिजन भएको पहिलो भेटमा रियलले एथ्लेटिकोलाई २–० ले हराएको थियो।
पछिल्ला खेलको नतिजामा मात्र होइन मैदानमा गोलमा बढ्ने अवस्थामा पनि एथ्लेटिको पछि नै देखिन्छ। रियलविरुद्ध पछिल्ला तीन खेलमा एथ्लेटिकोले गोल गर्न सकेको छैन।
पछिल्लो पटक एथ्लेटिकोबाट २०१९ को फेब्रुअरीमा एन्टोनियो ग्रिजम्यानले गोल गरेपछि रियलविरुद्ध गोल गर्न सकेको छैन।
अहिले अंक तालिकामा शीर्ष स्थानमा रहेको एथ्लेटिकोको २४ खेलमा ५८ अंक रहेको छ। दोस्रो स्थानमा रहेको बार्सिलोनाको २६ खेलमा ५६ अंक छ। तेस्रोमा रहेको रियलको २५ खेलमा ५३ अंक रहेको छ। शनिबार राति बार्सिलोनाले ओसासुनालाई २–० ले हराएसँगै मर्डिड डर्बीको नतिजाले लिग थप रोचक हुने देखिन्छ।
एथ्लेटिको र रियलबीचको खेलमा विशेष गरी मिडफिल्डमा बलमाथिको नियन्त्रण प्रमुख हुनेछ। जसमा रियलका टोनी क्रुस र एथ्लेटिकोका कोकेको खेललाई मिडफिल्डमा निर्णायक हुने अनुमान भइरहेका छन्। दुई टिममा यिनै दुई खेलाडी बलमाथिको नियन्त्रणमा विशेष देखिन्छन्।
रियलका लागि करिम बेन्जेमा अभ्यासमा फर्किनुले गोलमा बढ्न सक्ने उनको भूमिका महत्वपूर्ण हुनेछ। उनको अवस्था विचार गरेर प्रशिक्षक जिनेदिने जिदानले निर्णय लिनेछन्। यस्तै इडर मिलिटाओ र अल्भारो ओर्डिओजोला पनि अभ्यासमा फर्किएका छन्। सर्जियो रामोस, इडज हाजार्ड, डानी कार्भाजल र मारियानो डियाज भने चोटबाट मैदान फर्किसकेका छैनन्।
एथ्लेटिकोमा दुई महिना मैदान बाहिर रहेका केरन ट्रिपियर फर्किएका छन्। तर लामो समय बाहिर रहेका उनी खेलमा प्रस्तुत हुने यकिन छैन। कारास्को पनि टिममा फर्कन सक्ने देखिएको छ। तर मारिया गिमेन्ज भने अझै पनि चोटबाट फर्किसकेका छैनन्।
सबै अवस्थालाई विचार गरिरहेका एथ्लेटिकोका प्रशिक्षक डिएगो सिमोनले उपाधि यात्रा अझ राम्रो भइरहेको बताएका छन्। ‘उपाधि यात्रा थप रोचक भएको छ। दुई उस्तै टिमले उस्तै अवस्थामा एकअर्काविरुद्ध मैदानमा भिड्दै छन्। यो सिजन लिगमा अझ धेरै खेल खेल्न बाँकी नै छ,’ उनले भनेका छन्।
यस्तै रियलका प्रशिक्षक जिदानले एथ्लेटिकोविरुद्धको खेल फाइनल रहेको तर अरु खेल जस्तै हुने बताएका छन्।
‘अरु खेल जस्तै यो पनि हाम्रा लागि फाइनल हो। हामी जहिले पनि जितमा बढ्न आवश्यक छ। जस्तो नतिजा आए पनि लिग उपाधिको दौडमा हामी रहिरहनेछौँ,’ उनले भनेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।