काठमाडौं– सातै प्रदेशमा सञ्चालन हुने गरी शनिबारदेखि किसान सूचीकरण प्रणाली सुरु भएको छ। किसान सूचीकरण राष्ट्रिय अभियानको प्रधानमन्त्री केपी शर्मा ओलीले शुभारम्भ गरेका हुन्।
अभियानको शुभारम्भ गर्दै प्रधानमन्त्री ओलीले कृषि क्षेत्र अब आधुनिक क्षेत्रमा प्रवेश गरेको बताएका छन्। किसानलाई कस्तो सहयोग गर्नुपर्ने सबै थाहा हुने उनले बताए।
अब सरकारले व्यवसायिक सिप विकासका लागि जिल्ला जिल्लामा तालिम सञ्चालन गर्नुका साथै कृषिमा आधारित उद्योग खोल्न सहयोग गर्ने उनले बताए।
किसानलाई कृषि पेशाबाट विस्थापन नभएर ठूलो स्केलमा उत्पादन गर्नका निम्ती प्रोत्साहन गर्नुपर्ने उनको भनाई थियो।
उनले भने,‘कृषि क्षेत्रमा दिइने अनुदान नगदमा नभएर अनुदान दिँदा भरसक जिन्सी सामग्री खरिद गरेर दिनुपर्छ।’ अनुदान प्रदानमा केही किसानको गुनासाहरु रहेका उल्लेख गर्दै प्रधानमन्त्रीले भरसक जिन्सी सामानहरु खरिद गरेर दिने बताए।
हरेक भान्सालाई अस्पतालको रुपमा विकास गर्नसके स्वस्थ्य नेपाल निर्माण गर्न सकिने प्रधानमन्त्री ओलीले बताए। ‘हाम्रो भान्सालाई रोग उत्पादन गर्ने थलो होइन अस्पतालको रुपमा विकास गर्न कृषिको ठूलो भूमिका रहन्छ।’ प्रधानमन्त्री ओलीले भने,‘हामीले कृषिलाई जति बढी अग्र्यानिक बनाउन सक्यो त्यती बढी हाम्रो भान्सा अस्पताल बनाउन सकिन्छ।’
सोही कार्यक्रममा कृषि तथा पशुपन्छी विकासमन्त्री पद्माकुमारी अर्यालले सरकारबाट उपलब्ध हुने सेवा सुविधा वास्तविक किसानले प्राप्त गर्ने बताइन्। उनले भनिन्,‘किसानहरूको हक हितका लागि यो प्रणाली तयार पारेका हौँ। अब सबै किसानका गुनासो आजैबाट अन्त्य भयो।’
विगतको कृषि र आजको कृषिमा फरक अनुभूती गर्नेगरी सरकार अघि बढेको मन्त्री अर्यालले बताइन्। कृषिमा यान्त्रिकिकरण गर्नका निम्ती इजरायल सरकारसँगको सहकार्यमा सम्झौता गरेको बताइन्।
किसान सूचीकरण व्यवस्थापन प्रणाली सञ्चालन गर्न युरोपियन युनियनले सहयोग गरेको छ । यसप्रणाली मार्फत किसानका सूचना तथा विवरणहरू एकिकृतरुपमा व्यवस्थापन गरिने छ। किसानको पहिचानका लागि विद्युतीय प्रविधिमा आधारित तथ्याङ्क भण्डारण गर्ने प्रविधिको विकास गरिएको मन्त्रालयले जनाएको छ।
किसान सुचिकृत हुनका लागि सफ्टवेयर प्रणालीमा आबद्ध हुनुपर्ने हुन्छ। सूचीकरण हुनका लागि किसानले तोकिएका संक्षिप्त विवरणहरू भर्नुपर्ने हुन्छ। किसानहरुले रजिष्ट्रेशनका लागि farmer.moald.gov.np/register मा गई आफ्नो विवरण भर्न सकिनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1765768760.png)
-1763721444.png)
-1765273665.jpg)
