काठमाडाैैं– म्यान्मारमा सैन्य कूविरुद्ध प्रदर्शन गरिरहेका प्रजातन्त्र पक्षधरले चीनले आन्दोलन दबाउन खोजेको आरोप लगाएका छन्।म्यान्मारको सेनालाई चीनले साथ दिएको आशंका व्यक्त गर्दै उनीहरुले शनिबार चिनियाँ दूतावास अगाडि प्रदर्शन गरेको म्यान्मार नाउले जनाएको छ।
समाचारमा जनाइएअनुसार ‘चीनमाथि लाज लाग्छ’ भन्ने नाराका साथ दर्जनौं युवाहरूले यांगोनमा रहेको चिनियाँ दूतावास बाहिर भेला भए बेइजिङले म्यान्मारमा सैन्य तानाशाहीलाई समर्थन गरेको भन्दै विरोध गरेका हुन्।
प्रदर्शनकारीहरूले हस्तनिर्मित र छापिएको प्लेटकार्ड बाेकेका थिए, जसमा ‘चीन सरकार सेनालाई सहयोग गर्न रोक’ भन्ने नारा लेखिएकाे थियाे।
एउटा प्लेकार्डले लेखिएको थियो,‘सेनालाई सहयोग गर्न रोक्नुहोस्, म्यान्मारकाे सैन्य तानाशाही भनेको ‘मेड इन चाइना’ हो।
प्रदर्शनमा सहभागी मे प्यु भन्छन्,‘हामीलाई थाहा छ चीन सरकारले यहाँको सेनालाई साथ दिएकाे छ र दिन्छ। चीनले हाम्रो भोटको सम्मान गर्नुपर्छ, चीनले हाम्राे आन्तरिक मामिलामा हस्तक्षेप गर्न हुँदैन।’
उनले म्यान्मारका सेनाले पनि ब्यारेकमा गएर आफ्नो काम गर्नुपर्ने बताएका छन्। नोभेम्बर २०२० को चुनावमा नेसनल लिग फर डेमोक्रेसी (एनएलडी)ले बहुमत हासिल गरेको थियो। तर निर्वाचनमा धाँधली गरेको भन्दै सेनाले फेब्रुअरी १ मा म्यान्मारमा विद्रोह गर्यो।
सेनाले एनएलडीको प्रजातान्त्रिक तवरले चुनिएको सरकारलाई पनि खारेज गरेर सत्ता कब्जामा लिएको थियो। यसका साथै सेनाले नेतृ आङ साङ सुची, राष्ट्रपति विन मिन्टसहित शीर्ष नेताहरुलाई नजरबन्दमा राखेको थियो। सेनाले एकवर्ष पछि आम निर्वाचन गराएर मात्र सत्ता हस्तान्तरण गर्ने बताएको छ।
त्यसयता म्यान्मारमा सैन्य शासनविरुद्ध आन्दोलन जारी छ। जारी आन्दोलनमा मृत्यु हुनेको संख्या ६० भन्दा बढी पुगेको छ।उनीहरुमाथि सेना तथा प्रहरीले गोली चलाएका हुन्। यस दौरान एकैदिन आइतबार १८ र बुधबार ३८ जनाको सेना तथा प्रहरीले गोली हानेर ज्यान लिएका थिए।
सेभ द चिल्ड्रेनका अनुसार बुधवार मारिनेमा १४ र १७ वर्षका किशोरसमेत छन्। एक जना १९ वर्षीया युवती पनि मारिएको उसले जनाएकाे छ। यता म्यान्मारका छिमेकी देशहरुले संयम अपनाउन आग्रह गरिरहेकन छन्। जुन्ता सरकार भने झन झन हिसात्मक हुँदै गएकाे छ।
देशका विभिन्न भागमा सुरक्षा फौजले पत्रकारहरु र नागरिक समाजका व्यक्तिहरुलाई पनि धरपकड गरेको छ। यता आन्दोलन दबाउन उल्लेख्य मात्रामा सुरक्षाकर्मी परिचालन गरिएको र रबरको गोली र अश्रुग्यास प्रहार गरिएको छ।
रिपाेर्टिङ गरिरहेकाे पत्रकारलाई पनि नियन्त्रणमा लिएकाे छ। पश्चिमा मुलुकहरुले म्यान्मारका सैनिक नेतृत्वमाथि प्रतिबन्धहरु घोषणा गरेका छन्। अमेरिका, संयुक्त राष्ट्रसंघ लगायत विश्वभरबाट सैन्य कूको विरोध भइरहेको छ।
यता मंगलबार आसियन क्षेत्रका मुलुकका विदेशमन्त्रीहरुको बैठक बसेको थियो। उक्त बैठकमा विदेशमन्त्रीहरुले संयमता अपनाउन सबै पक्षलाई आग्रह गरेका थिए।
तर, यो बैठकमा हिरासतमा लिइएकी प्रजातन्त्रवादी नेतृ सु चीको तत्काल रिहाइ र प्रजातन्त्रको पुनर्बहालीको विषयमा भने सहमति जुट्न सकेन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
