काठमाडौं- इंग्लिस प्रिमियर लिगमा गएको सिजनको विजेता लिभरपुलका लागि यो सिजन अवस्था सुखद भइरहेको छैन। परिस्थिति विरोधाभाषपूर्ण देखिएको छ। उपाधि रक्षाको उपहास हुने गरी टिमको अवस्था लज्जास्पद बनिरहेको छ। शीर्ष चारभित्र रहन नै संघर्ष गर्नुपर्ने देखिएको छ।
बिहीबार राति चेल्सीसँग १-० ले हारेको खेलपछि लिभरपुल डिफेन्डर एन्डी रोबर्टसनले भनेका छन्, ‘हामी इतिहासमा भर परेर बस्ने अवस्था छैन।’ हुन पनि चेल्सीसँगको हार लिभरपुलले घरेलु मैदानमा हारेको लगातार पाँचौँ खेल थियो। जुन क्लब इतिहासमा कहिल्यै भएको थिएन। यसैले लिभरपुलमा अहिले आवाज उठिरहेको छ, ‘परिवर्तनको खाँचो देखियो।’
३० वर्षको पर्खाइले गएको वर्ष लिभरपुलले जितेको लिग उपाधि विशेष बनेको थियो। त्यसअघिको सिजन च्याम्पियन्स लिगको जितले योर्गेन क्लोपको प्रशिक्षणमा लिभरपुल शक्तिशाली अवस्थामा फर्किएको प्रमाणित भएको थियो। अहिलेको सिजनमा भने लिभरपुलले जस्तो खेल देखाइरहेको छ त्यसले फर्किएको विजेता छबिमा धक्का लागिरहेको छ।
अब प्रिमियर लिगको उपाधिमा म्यानचेस्टर सिटीले अरु क्लबसँग भेटाउन मुस्किल देखिने अन्तर बनाउँदै गइरहेको छ। यसैले बहस शीर्ष चारमा म्यानचेस्टर सिटीसँगै अरु कुन क्लब होला भन्नेमा केन्द्रित देखिन्छ। जसमा लिभरपुलको अवस्था भने थप कठिन बनिरहेको देखिन्छ।
अंक तालिकामा शीर्ष स्थानमा रहेर २७ खेल खेलेको म्यानचेस्टर सिटीको ६५ अंक रहेको छ। समान खेलमा दोस्रो स्थानमा रहेको म्यानचेस्टर युनाइटेडको ५१, लेस्टर सिटीको ५० र चेल्सीको ४७ अंक रहेको छ। ११ खेल बाँकी रहँदा शीर्षमा १४ अंककै भिन्नता भइसकेकाले र म्यानचेस्टर सिटी लयमा देखिएकाले प्रतिस्पर्धा शीर्ष चारमा पर्न नै हुने देखिन्छ।
२६ खेलमा ४६ अंक रहेको इभर्टन पाँचौँ स्थानमा छ। वेस्टहामको २६ खेलमा ४५ अंक रहेको छ। सातौँ स्थानमा रहेको लिभरपुलको २७ खेलमा ४३ अंक रहेको छ। त्यसपछि टोटनह्यामको २६ खेलमा ४२ अंक छ। प्रतिस्पर्धामा रहन सक्ने अरु टिमको अंक गुमिरहँदा म्यानचेस्टर सिटी जितको निरन्तरतामा छ।
गएको सिजनको विजेता टिमका रुपमा यो सिजन लिभरपुलको खेल सोचे अनुरुप हुन सकेको छैन। डिफेन्समा देखिएको समस्याले लिभरपुलाई खेलमा फर्कन कठिन भइरहेको छ। तर, लिभरपुल गएका केही सिजनदेखिको खेल हेर्दा जुनसुकै बेला लयमा फर्कन सक्ने टिमका रुपमा हेरिन्छ।
गएको सिजन तेस्रो र चौंथो स्थानमा रहने टिमको निक्योल लिगको अन्तिम दिन अघिसम्म लागेको थिएन। म्यानचेस्टर युनाइटेड तेस्रोमा र चेल्सी चौंथो रहेर लिग सकाउँदा लेस्टर पाँचौँमा पुगेको थियो। यो वर्ष पनि उसैगरी शीर्षमा पर्ने प्रतिस्पर्धा लिगको अन्तिमसम्म हुने देखिन्छ। अहिलेको अवस्थामा लिभरपुल त्यही अन्तिमसम्मको भिडन्तमा पुग्नुपर्ने देखिइरहेको छ।
लिभरपुलमा चोटले पारेको असरबारे धेरैपटक नै कुराकानी भइसकेको छ। चोट हारमा लिभरपुलका लागि एउटा कारण भने अवश्य हो। तर, अब त्यही अवस्थाले मात्र पछि परेको तर्क गर्न सक्ने स्थिति लिभरपुलका लागि उपयुक्त देखिँदैन। त्यसबाहेक मैदानमा देखिएको कमीलाई विचार गर्नैपर्छ।
सन् १८९२ देखि १९९२ सम्म इंग्ल्याण्डको माथिल्लो डिभिजनलाई ‘फुटबल लिग फस्ट डिभिजन’का नामले चिनिन्थ्यो। जसमा १९००–०१ मा लिभरपुलले पहिलो उपाधि जितेको थियो। त्यसपछि १९०५–०६, १९२१–२२, १९२२–२३ लिग जित्यो। १९३९ देखि दोस्रो विश्वयुद्धका कारण रोकिएको लिग १९४६–४७ को सिजनमा हुँदा उपाधि लिभरपुलले नै जितेको थियो।
त्यसपछि भने लिभरपुलले उपाधि जित्न १७ वर्ष पर्खनुपर्यो। १९६३–६४ को सिजनमा र त्यसपछि १९६५–६६, १९७२–७३ मा उपाधि जितेको लिभरपुलले त्यसपछिको लामो समय एकछत्र राज गरेजस्तो भयो। १९७५–७६, १९७६–७७, १९७८–७९, १९७९–८०, १९८१–८२, १९८२–८३, १९८३–८४, १९८५–८६, १९८७–८८ हुँदै १९८९–९० मा लिभरपुलले १८ पटक उपाधि जितिसकेको थियो।
गएका केही सिजनदेखि चेल्सी र म्यानचेस्टर युनाइटेडको पुरानो अधिपति हराइरहेकै देखिन्छ। भलै चेल्सीले फुटबल बजारमा ठूलो रकम खर्च गरेको होस्। पछिल्लो पटक नयाँ प्रशिक्षक थोमस टचेल आएदेखि चेल्सीमाथिको भरोसा भने बढिरहेको छ। लिगमा अहिले दोस्रो स्थानमा रहेको म्यानचेस्टर युनाइटेडले उही गतिमा खेल देखाउन सकेको छैन। त्यसमा सुधार होला, तर अहिले उनीहरु म्यानचेस्टर सिटीलाई उछिन्ने अवस्थाबाट निकै पछि देखिन्छन्।
चेल्सीले पछिल्लो पटक लिग जितेको सन् २०१६–१७ को सिजनमा हो। जतिबेला टोटनह्याम दोस्रो र म्यानचेस्टर सिटी लिगको तेस्रो स्थानमा रहेका थिए। म्यानचेस्टर युनाइटेडले २०१२–१३ को सिजनपछि लिग जितेको छैन। जतिबेला म्यानचेस्टर सिटी दोस्रो र चेल्सी तेस्रो स्थानमा रहेका थिए।
सन् १९३६–३७ मा पहिलो लिग जितेको म्यानचेस्टर सिटीले दोस्रो लिग उपाधि १९६७–६८ मा थियो। आधुनिक विश्व फुटबलमा २०११–१२ मा आएर बल्ल उपाधि जितेको म्यानचेस्टर सिटीले त्यसयताका वर्ष आफूलाई प्रिमियर लिगमा बलियो टिमका रुपमा लगातार प्रस्तुत गरिरहेको छ। २०१३–१४ र प्रशिक्षक पेप गार्डिओलाकै समयमा २०१७–१८ र २०१८–१९ मा लगातार लिग विजेता बन्नुले पनि सिटी यो दशक प्रिमियर लिगमा बलियो टिम हो।
यस्तोमा ३० वर्षपछि लिगको उपाधि जितेर प्रिमियर लिगको शीर्ष अवस्थामा फर्किएको लिभरपुलका लागि भने विजेता बनेपछिको सिजन नै कठिन देखिएको छ। यसैले त रोबर्टसनले भनेका हुन्, ‘हामी इतिहासमा भर परेर बस्ने अवस्था छैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769489968.png)
-1769487479.png)
-1764146706.png)
