काठमाडौं- जाजरकोटको भेरी नगरपालिकाले नेकपाको पुष्पकमल दाहाल ‘प्रचण्ड’ र माधवकुमार नेपालले नेतृत्व गरेको पक्षमा लागेको भन्दै तीन जना कर्मचारीलाई बर्खास्त गरेको छ।
नेकपाको प्रचण्ड-माधव पक्षीय प्रेस संगठनमा आवद्ध रहेको भन्दै नगरपालिकाले करार र अस्थायी सेवामा कार्यरत कर्मचारीहरु पवन शर्मा, सरोज वली र भरतकुमार शर्मालाई मंगलबार बर्खास्त गरेको हो।
भेरी नगरपालिकाका एमआइएस अपरेटर पवन शर्मा, सरोज वली र सहायक चौंथो पदमा कार्यरत भरत शर्मालाई १७ गते नगरप्रमुख चन्द्रप्रकाश घर्तीको निर्देशनमा निमित्त प्रमुख प्रशासकिय अधिकृत दलबहादुर घर्तीले २४ घण्टे स्पष्टिकरण सोधेका थिए। भोलिपल्ट तीन कर्मचारीले स्पष्टिकरण बुझाएपनि सोही दिन सेवाबाट बर्खास्त गरिएको हो।
एमआइएस अपरेटरद्वय शर्मा र वली करार सम्झाैतका कर्मचारी हुन् भने सहायक चौंथो पदमा कार्यरत शर्मा अस्थायी सेवाका कर्मचारी हुन्।
फरक राजनीतिक आस्थामा लागेकै कारण कर्मचारीलाई हटाएको भन्दै निजामती कर्मचारीहरुको आधिकारिक ट्रेड यूनियन, नेपाल निजामती कर्मचारी संगठन, नेपाल निजामती कर्मचारी यूनियन र नेपाल राष्ट्रिय कर्मचारी संगठन जाजरकोटले संयुक्त वक्तव्य निकाल्दै आपत्ति जनाएका छन्। प्रतिशोध र पूर्वाग्रहबाट प्रेरित भएर नगरपालिकाले कर्मचारी बर्खास्त गरेको भन्दै कर्मचारी संगठनहरुले तत्काल पुनर्बहाली गर्न माग गरेका छन्।
‘कर्मचारीहरुलाई सेवाप्रति बफादार बनाउने भन्दा पनि बर्खास्त गर्ने दुराशयपूर्ण मनशायले स्पष्टिकरण सोधेर बर्खास्त गरेकोले यस्ता कार्यले राष्ट्रसेवक कर्मचारीहरुको मनोबल कमजोर हुने तथा सेवा प्रवाहमा समेत प्रभावकारिता कायम नरहने कुरा सचेत गराउँदै यसरी प्रतिशोध तथा पूर्वाग्राहबाट प्रेरित भएर कर्मचारीहरु बर्खास्त गरेको कार्यप्रति हाम्रो गम्भीर रुपमा ध्यानाकर्षण भएको छ’, कर्मचारी संगठनको विज्ञप्तिमा भनिएको छ।
आगामी दिनहरुमा समेत यस्ता गतिविधि नगर्न पनि कर्मचारी संगठनहरुले माग गरेका छन्।
नगरप्रमुख घर्ती नेकपाको केपी शर्मा ओली पक्षका हुन्। प्रचण्ड–माधव पक्षमा लागेका एमआईएस अपरेटर पवन शर्मा केही समय पहिले ओली पक्षीय प्रेस संगठनमा थिए। त्यतिबेला केही नभनेका नगर प्रमुख घर्तीले प्रचण्ड–माधव पक्षमा लागेपछि भने सेवाबाट बर्खास्त गरेका हुन्।
‘भेरी नगरपालिकाको अस्थायी करार सम्झौतामा कार्यरत देहायका कर्मचारीहरुको कार्य सम्पादन परिभाषित जिम्मेवारी बमोजिम सन्तोषजनक नरहेको, सार्वजनिक जवाफदेही जिम्मेवारीपूर्ण पदमा रहेर समेत कुनै राजनितीक दल वा जनवर्गीय संगठनको नेतृत्व एवं आवद्धताले निष्पक्ष, पारदर्शी र जनमुखी सेवा प्रवाह हुन नसकेको हुँदा आवश्यक प्रक्रियाहरु पुर्याएर अस्थायी करार सम्झौता एवं पदको म्याद भंग गर्न निर्देशन गर्दछु’, नगर प्रमुख घर्तीले प्रमुख प्रशासकीय अधिकृतलाई दिएको निर्देशनमा भनिएको छ।
यस विषयमा प्रतिक्रिया लिन खोज्दा नगर प्रमुख घर्ती सम्पर्कमा आउन चाहेनन्। पहिले फोन नउठाएका उनले त्यसपछि मोइबाल अफ गरे। सेवाबाट हटाइएका कर्मचारीहरूले नगर प्रमुखको कदमविरुद्ध अदालत जाने तयारी गरेको बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
