.jpg)
फाइल तस्बिर
झापा– प्रधानमन्त्री केपी शर्मा ओलीले आफूलाई प्रधानमन्त्री पदबाट हटाए दुई वर्षपछि दुईतिहाइ बहुमतसहित सिंहदरबार फर्कने उद्घोष गरेका छन्।
मंगलबार झापामा पुर्वाञ्चल क्यान्सर अस्पतालको उद्घाटन गर्दै उनले प्रधानमन्त्रीबाट कसैले हटाइहाले पनि अर्को चुनावमा दुईतिहाई मत ल्याउने दाबी गरेका हुन्। तर उनले आफूलाई हटाउन सजिलो नभएको भन्दै हटाएर देखाउन चुनौति पनि दिए।
आफूले कुनै पदका लागि मुद्धा नलडेको भन्दै प्रचण्ड– माधव समूहलाई व्यंग्य पनि गरे। आफू राजनीति गर्ने व्यक्ति भएकाले न्याय माग्न जनता माझ जाने र जनताले न्याय दिने विश्वास उनले व्यक्त गरे।
उनले भने, ‘हटाउन सक्छ भने हटाओस् खुसीसाथ हट्छु तर आउँदो चुनावमा अहिलेनै भन्दिनँ चाहन्छु कसैले हटाउन सक्छ भने हटाओस् डेढवर्ष/२ बर्ष पछि त चुनाव आईसक्छ। २ तिहाईका साथ फेरि सिंहदरबारमा फर्कन्छु।’
उनले प्रतिनिधिसभा विघटनलाई खारेज गर्ने सर्वोच्च अदालतको फैसलाको फागुन २३ गते पछि प्रतिनिधिसभाको बैठकमा परीक्षण हुने बताए।
‘तपाईहरुलाई लाग्ला भन्नुहोला, प्रधानमन्त्रीले त ढुक्कैले भाषण गरिरहेको छ ,अदालतले त प्रतिनिधिसभा व्यूँतायो। ब्युँतायो भने के भयो र के बिग्रीयो र? ठिकै भयो। २३ गते अधिवेशन बोलाएको छु। २३ गते अधिवेशन बस्छ। राम्ररी अधिवेशन चलाएर अगाडी बढाउने मेरो प्रयास हुन्छ। मेरो नकरात्मक भूमिका कहिलेही पनि हुदैन। सकारात्मक भूमिका हुन्छ,’ उनले भने।
अर्काका लागि कम्र्फटेबल सरकार नभई नेपाल र नेपाली जनताका लागि कम्र्फटेबल सरकार चाहिएको भन्दै उनले आफुले देश र जनताको पक्षमा काम गरेको र गरिरहने प्रतिवद्धता जनाए।
प्रधानमन्त्री ओलीले आफू देश बिगार्ने तगाराहरु पन्छाएर अघि बढ्ने र त्यो क्षमता नेपाली जनताले राख्नुपर्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
