काठमाडौं- प्रधानमन्त्री केपी शर्मा ओलीले वैज्ञानिक वन व्यवस्थापनको नाममा वन सखाप पारिएको टिप्पणी गरेका छन्। मंगलबार काठमाडौंमा आयोजित सामुदायिक वन उपभोक्ता महासंघ, नेपालको आठौं राष्ट्रिय परिषद्को उद्घाटन गर्दै प्रधानमन्त्री ओलीले वन विकासको प्रतिफल दिने नीति आवश्यक रहेको समेत औंल्याए। सरकारले केही समय पहिले वैज्ञानिक वन व्यवस्थापन कार्यविधि-२०७१ खारेज गिरसकेको छ।
‘वैज्ञानिक वन व्यवस्थापन भनेर त्यसको नाममा यो वन सखाप पार्ने नीति हो भन्ने चाहिँ ठानेको थिइनँ। वैज्ञानिक भनेपछि राम्रो होला भनेको त, वैज्ञानिकको नाममा सखाप नीति रैछ। सखाप नीति होइन, वैज्ञानिक नीति हुनुपर्यो’, उनले भने, ‘दिगो वन विकास नीति हुनुपर्यो। प्रतिफल दिने विकास नीति हुनुपर्यो।’
ओलीले वनसँग सम्बन्धित नीतिहरू बनाउँदा उपभोक्ताहरूको साथ लिएर बनाउने पनि बताए। वन तथा जीवजन्तुको सुरक्षा र संरक्षणका निम्ति पनि जनताको साथ लिने उनको भनाइ छ।
‘हामी नीतिहरू बनाउँदा तपाईंहरूको साथ लिएर बनाउँछौ। जनताको साथ लिएर बनाउछौं। उपभोक्ताको साथ लिएर बनाउँछौ। देश विकास गर्नेदेखि लिएर वनको सुरक्षा, संरक्षण, जीवजन्तुको संरक्षण, सुरक्षा आदि इत्यादि सबैकुरा जनताको साथ लिएर बनाउँछौँ’, प्रधानमन्त्रीले भने।
प्रधामन्त्री ओलीले सामुदायिक वन उपभोक्ता समितिहरूले वनको संरक्षण गर्न भूमिका खेलेको बताए। उपभोक्ता समितिहरूले नष्ट भइसकेका वनहरूलाई पुनर्जीवन दिएको उनको भनाइ छ। फलस्वरुप वातावरणीय सन्तुलन कायम हुन योगदान पुगेको पनि उनले बताए।
‘सायद उपभोक्ता समितिहरू नबनेका भए, सामुदायिक वनहरूको रुपमा व्यवस्थापन नगरेको भए अहिले हाम्रो वन क्षेत्रको धेरै प्रतिशत नष्ट भइसक्या हुन्थ्यो। नष्ट भइसकेका वनहरूलाई वन उपभोक्ता समितिहरूले तिनलाई पुनर्उत्थान गरेका छन्। तिनलाई पुनर्जीवन दिएका छन्’, उनले भने।
प्रधानमन्त्री ओलीले सबै प्रकारका वनहरूको सुरक्षा, समुचित प्रबन्ध र व्यवस्थापनमा सरकारको ध्यान रहेको पनि बताए। वनको अधिकतम सुरक्षा र विकास गरी जनता एवं राष्ट्रले अधिकतम प्रतिफल लिने कुरामा सन्तुलन कायम गर्ने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782043740-1782045652.jpeg)
-1764146706.png)
