काठमाडौं- स्पेनिस क्लब बार्सिलोनाका कप्तान लियोनल मेस्सीलाई लैजानका लागि इंग्लिस क्लब म्यानचेस्टर सिटीले फेरि प्रयास थालेको छ। यो सिजनको सुरुवातअघि मेस्सीले क्लब छाड्ने घोषणा गर्दा सिटी उनलाई लैजान निकै अघि पुगिसकेको थियो, तर त्यसबेला सफल हुन सकेन।
मेस्सीको फुटबल जीवनको अन्तिम वर्षहरुमा उनले बनाइरहेको उपाधिको सपना अहिलेकै अवस्थामा बार्सिलोनामा पूरा हुने देखिँदैन। यसैले च्याम्पियन्स लिग अन्तिम १६ को पहिलो लेग खेलमा फ्रेन्च क्लब पिएसजीसँग ४-१ ले पराजित भएपछि मेस्सीले बार्सिलोना छाड्ने चर्चा फेरि उचाइमा पुगेको छ। म्यानचेस्टर सिटीसँगै पिएसजीले पनि उनलाई लैजाने इच्छा देखाएको खबर आइरहेका छन्।
गएको सिजन सकिएपछि मेस्सीले बार्सिलोना छाड्ने बताएसँगै उनलाई लैजान म्यानचेस्टर सिटी नै सबैभन्दा नजिक पुगेको थियो। सिटी जाने सोचमा मेस्सी पनि सकरात्मक थिए। सिटी प्रशिक्षक पेप गार्डिओलासँगको कुराकानीमा उनी सहमति नजिक पुगेका थिए। तर, बार्सिलोनाले आफ्ना स्टार खेलाडीलाई क्लब छाड्न दिएन। महँगो रिलिज क्लजका कारण सिटीले ठूलो रकम तिर्न सक्ने कुरा थिएन।
मेस्सीले आफैं हुर्केको क्लबविरुद्ध मुद्दामामिला गर्न नचाहेको र एक सिजन बार्सिलोनामा नै रहने बताउँदा बार्सा समर्थक खुसी भए। तर, मेस्सी जाने लगभग पक्का भइसकेको म्यानचेस्टर सिटीलाई त्यसबेला नमजा भयो। यद्यपि, बार्सिलोनामा मेस्सी रहँदा देखिएको राहत लामो समय रहनेछ भन्नेमा शंका देखिन्छ।
म्यानचेस्टर सिटीका प्रशिक्षक गार्डिओला पनि खेलाडी किनबेचको आउँदो समय मेस्सीका लागि प्रयास गर्नुपर्ने मनस्थितिमै छन्। म्यानचेस्टर सिटीका फुटबलमा मुख्य कार्यकारी अधिकारी ओमर बेराडा पनि समर्थकहरुले मेस्सी आउने कुरा अहिले नै नभुलेको बताउँँछन्। यदि मेस्सी बार्सिलोना छाड्न चाहन्छन् र उनको बिक्री किन्न मिल्ने शैलीको हुनेछ भने आफूहरु अघि बढ्ने उनले बारम्बार बताइरहेका छन्।
गएको सिजनको अन्त्यमा आफूले क्लब छाड्न चाहेको र त्यसका लागि वातावरण बनाउन भन्दै क्लबलाई बुरोफ्याक्समार्फत् जानकारी गराएको १० दिनपछि मेस्सीले सार्वजनिक रुपमा गोल स्पेनसँगको अन्तर्वार्तामा बोल्दै एक सिजन बार्सिलोनामा नै रहने बताएका थिए।
मेस्सीले पछिल्लो पटक सन् २०१७ मा बार्सिलोनासँग सम्झौता गर्दा हरेक सिजनको अन्त्यमा क्लब छाडेर जान सक्ने बुँदा उल्लेख भएको थियो। तर, बार्सिलोनामा एक वर्षको सम्झौता बाँकी रहेका मेस्सी लैजानका लागि ७०० मिलियन युरो रिलिज क्लज तिर्नुपर्ने बार्सिलोना व्यवस्थापनको भनाइका कारण म्यानचेस्टर सिटीलाई मुस्किल भएको थियो।
आफू बार्सिलोनामा नै रहने बताएसँगै मेस्सीले पुरानै शैलीमा मैदान फर्कने र जितको विश्वासमा अघि बढ्ने बताएका थिए। उनले समर्थक र क्लब सम्बद्ध सबै एकजुट भएर अघि बढ्नुपर्ने धारणा राखेका थिए। विशेषगरी मेस्सीको चाहना युरोपियन प्रतिस्पर्धाको उपाधि जित्नेमा नै केन्द्रित देखिन्छ। जुन बार्सिलोनामा पछिल्ला वर्ष मुस्किल भइरहेको छ।
पछिल्ला वर्ष च्याम्पियन्स लिगमा युभेन्टस, रोमा, लिभरपुल, बायर्न म्युनिक र अहिले पिएसजीसँग बार्सिलोनाको हविगत मिल्दोजुल्दो देखिन्छ। प्रशिक्षक लुइस इनरिक हुँदै भालभर्दे, सेटियन र अहिले कोम्यानसम्म युरोपियन प्रतिस्पर्धामा यकिन देखिँदैनन्। खेलाडीहरु च्याम्पियन्स लिगको मैदानमा कमजोर मनस्थितिमा देखिन्छन्। अत्तालिएको खेलाडीको अवस्थाले धेरै आलोचना मेस्सीकै हुने गरेको छ।
यसैले आउने सिजन मेस्सी बार्सिलोनामा हुने छैनन् भन्ने विषयले चर्चा पाइरहेको छ। त्यसमा प्रमुख रुपमा जोडिन्छ, म्यानचेस्टर सिटी नै। मेस्सीले यसअघि सिटी जाने मनस्थिति बनाउनुको प्रमुख कारण गार्डिओला नै थिए। यसैले अहिले गार्डिओलाको समय थप भएसँगै मेस्सी सिटी जाने सम्भावना बढेको विश्लेषणले आधार पाइरहेको छ। सिटीमा आवश्यक देखिएको परिवर्तनको कार्यभार गार्डिओलामाथि नै पर्दा उनका लागि मेस्सी प्रमुख पात्र हुन सक्छन्।
प्रिमियर लिगमा बलियो बनिरहेको सिटीका लागि च्याम्पियन्स लिगमा मिल्न सक्ने जितको आधार मेस्सी नै हुन सक्छन्। मेस्सीले के गर्छन् भन्ने विषय बार्सिलोनामा हुने नयाँ चुनावसँग पनि जोडिएको छ। बार्सिलोना अध्यक्षमा हुने नयाँ चुनावपछि को आउँछन् भन्ने विषय मेस्सीसँग जोडिएको छ।
बार्सिलोना अध्यक्षका सबैजसो प्रत्याशीले मेस्सीलाई बार्सिलोनामा नै रोक्ने आफ्नो प्रमुख एजेन्डा बनाइरहेका छन्। मेस्सीलाई बार्सिलोनाले रोक्न चाहनुसँगै उनलाई लैजाने दौडमा सिटी बाहेकका क्लब पनि छन्। नेमारले व्यक्तिगत रुपमा पनि मेस्सीसँगै खेल्ने इच्छा देखाउँदै उनलाई पिएसजी लैजानेमा जोड गरिरहेका छन्।
अब मेस्सीले क्लब छाड्ने मनस्थिति बनाएमा पिएसजी र सिटीमध्ये एक क्लब नै उनले रोज्ने अनुमान बढेका छन्। त्यसमा गार्डिओलाका कारण उनी सिटी जानसक्ने आधारमा बल बढी देखिन्छ।
सिटीका लागि अब मेस्सी लैजानुमा ठूलो रकम बाधक हुने छैन। मेस्सीसँग उनी सन्तुष्ट हुने तलब सम्झौताबाहेक अन्य झन्झट सिटीलाई हुने छैन। सिटीमा मेस्सीमाथिको आश प्रिमियर लिगमा भन्दा बढी च्याम्पियन्स लिगलाई लिएर छ। गार्डिओलाले सिटीलाई च्याम्पियन्स लिगमा राम्रो गराउन नसकिरहँदा मेस्सीको आगमन टिमका लागि फरक स्वादसँगै आत्मविश्वास पनि हुनेछ।
गार्डिओला बार्सिलोनाको प्रशिक्षक रहँदा सन् २००८ देखि २०१२ सम्मको समय मेस्सीका लागि पनि उत्कृष्ट समय हो। जुन समय मेस्सीले १३६ खेलमा १३८ गोल र ५५ असिस्ट गरेका थिए। त्यो त्यही समय युरोपियन प्रतिस्पर्धामा रहेका अन्य खेलाडीको तुलनामा सबैभन्दा उत्कृष्ट हो।
३३ वर्षका मेस्सी अहिले सिटीमा गएर उस्तै अपेक्षा नहोला तर, उनी अझै मैदानमा ‘प्ले मेकर’ नै छन्। बार्सिलोनामा बढिरहेका मेस्सीका लागि सिटीको शैली पनि अमिल्दो छैन। त्यसमा गार्डिओलाले टिमको शैली मेस्सी अनुरुप विकास गर्ने नै छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771592819.png)
