गीतको कभर र भर्सन छुट्याउनै सकस !

संगीत

पुष्पा थपलिया बिहीबार, फागुन ६, २०७७ ०८:३०

काठमाडौं- ‘डिजिटल युग सुरु भयो। गीत संगित पनि डिजिटल प्लेटफर्ममा गयो भन्ने सुनेको थिएँ। कसरी डिजिटलमा गएको भन्ने चाहिँ भेउ पाउन सकिरहेको थिइन। अहिले त यो विभिन्न भर्सनमा पनि अपडेट भइरहेको सुन्छु। कुरा के हो?’

पुरानो बसपार्कबाट कीर्तीपुर पागाँ जाने गाडी चढेका १८ वर्षे यात्रु निकै जिज्ञासु सुनिए। पृष्ठभूमिमा फुलबुट्टे सारी सपक्क पारी गीतको फिमेल भर्सन बजिरहेको थियो। ती युवा यात्रुको छेवैमा बसेकी उस्तै उमेरकी युवतीले हाँस्दै भनिन्, ‘ए, तिम्ले फुलबुट्टे सारीको कुरा गरेको! अहिले त लेजेन्डरी भर्सन पनि आएको छ नि।’

युवाले व्यंग्यात्मक शैलीमा भने, ‘त्यही भएर त भर्सन अपडेट हुने भएकाले डिजिटलमा गएको भनेका रहेछन् भनेको क्या।’
000
फुलबुट्टे सारीकै लेजेन्डरी भर्सनको कार्यक्रम सकेर अर्को कार्यक्रममा जमघट भएका मनोरञ्जन पत्रकारको समूहले पनि यही विषयमा हँसिमजाक गरे। उनीहरु भन्दै थिए, ‘गीतको चारवटा भर्सन त अपडेट भइसक्यो। अब लैंगिक समानताका लागि अर्को लेजेन्डरी भर्सन आउने होला।’

000

करिब १२ वर्ष गुमनाम बनेर एक्कासी सामाजिक सञ्जालले चर्चामा ल्याइदिएको गीत हो फुलबुट्टे सारी। टिकटकमा गीत हिट हुने बित्तिकै व्यापक रुपमा युट्युबमा गीतको खोजी भयो। मार्मिक लामाले स्टेजमा गाएको निकै कम गुणस्तरको भिडियोले समेत लाखौं भ्युज पाएपछि यसका लेखक तथा संगीतकार राजनराज शिवाकोटीले मार्मीककै स्वरमा फेरि गीत रेकर्ड गराए।

त्यसो त, टिकटकमा भाइरल भएको स्वर भने मार्मिकको नभइ अर्कै गायक प्रतिक गुरुङको कभर गीतको थियो।

कभर र भर्सनमा फरक के ?
केही समयअघि कुराकानीको सिलसिलामा कभर गीतका पीडित गायिका एलिना चौहानले भनेकी थिइन्, ‘कभर नहुनका लागि युट्युबमा नाम लेख्दा गीतको पछाडि भर्सन थप्नुपर्ने रहेछ। पहिले थाहै भएन। नत्र त म पनि फिमेल भर्सन लेख्न लगाउँथे नि। त्यसो गर्न पाएको भए न युट्युबबाट गीत हट्थ्यो, न अर्को गायिकालाई गाउने सकस नै हुन्थ्यो।’

तिम्रो मायाले बाँधेर राख बोलको गुमनाम गीतलाई एकाएक एलिनाले भाइरल बनाइदिएकी थिइन्, एक वर्ष अगाडि। सुरुमा गीतका मालिकसँग अनुमति लिएरै गाएकी हुन् उनले। तर, गीत रातारात चर्चामा आएपछि मालिकले युट्युबबाट गीत हटाउन लगाए। र, अर्की गायिका अस्मिता अधिकारीलाई गाउन दिए। त्यसको पछाडि फिमेल भर्सन जोडे। यसरी तिम्रो मायाले बाँधेर राख गीत कभरबाट अफिसियल भयो।

एलिनाले त कभर र भर्सनको फरक छुट्याउन सकिनन्। अन्य श्रोताले कसरी छुट्याउलान् त ? साेही गीतका संगितकार तथा गीतकार राजनराज शिवाकोटीले भने, ‘यसलाई श्रोता-दर्शकले अलि पछि मात्रै बुझ्छन्।’

कभर र भर्सन छुट्याउन केही समय अझै कुर्नुपर्ने उनको भनाइ छ। शिवाकोटीले थपे, ‘मेरो मन त नेपालमा भएका तीन करोड नेपालीकै आवाजमा गीतको भर्सन आओस् भन्ने थियो नि, तर के गर्नु त्यो सम्भव छैन।’ त्यही भएकाले नै आफूले हरेक पात्रको प्रतिनिधित्व गरेर गीतको भर्सन निकालेको उनको भनाइ छ।

त्यसो भए अझै भर्सन आउन बाँकी छ त ? शिवाकोटीले हाँस्दै भने, ‘हामीले मदनकृष्ण श्रेष्ठको लेजेण्डरी भर्सन नै अन्तिम भएको घोषणा गरिसकेका छौं। पछि निकै माग बढ्यो भने ड्वेट भर्सन आउन सक्ला!’

यता, गीतकार तथा लेखक कृष्णहरि बराल भर्सनलाई खर्च गर्ने समय र पैसा नयाँ गीतलाई खर्च गर्न सुझाव दिन्छन्। उनले भने, ‘एकै गीतलाई नयाँ-नयाँ स्वादमा सुन्न पाउनु त राम्रो कुरा हो। तर, यही बजेट र मिहिनेतमा त नयाँ गीतकै स्वाद चखाउन सकिन्छ।’

धेरैले एकै गीत गाएर नबिग्रने तर, त्यो कस्तो प्रकृतिको गीत हो भन्ने कुरा चाहिँ बिचार गर्नुपर्ने उनको भनाइ छ। बरालले भने, ‘गीतका शब्द तरुण उमेरका माया पिरतिका छन्, त्यसलाई चाइल्ड भर्सनमा ल्याउँदा त्यसले नराम्रो असर पार्छ नै।’

देशप्रेमको गीत छ भने, त्यसलाई जुनसुकै भर्सनमा गाउन मिल्ने पनि बरालले बताए। कभर र भर्सन छुट्याउन पनि जोखिम भएको बरालको भनाइ छ। भने, 'कभर गाउन पनि बिना अनुमति पाइँदैन। कभर बनाउन पनि उत्तिकै मिहिनेत पर्छ। चर्चा चलेका गीतको थरिथरीका भर्सनमा बाहिर ल्याउन भन्दा त नयाँ गीतलाई नै खर्च गर्नु राम्रो।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।