काठमाडौं- च्याम्पियन्स लिग अन्तिम १६ को पहिलो लेगको खेलमा केलियन एमबाप्पेको ह्याट्रिक मद्दतमा पिएसजीले बार्सिलोनालाई ४–१ ले हराएको छ। च्याम्पियन्स लिग नकआउटमा गएका वर्षदेखिको खराब अवस्था बार्सिलोनाले यसपटक पनि सुधार गर्न सकेन।
खेलको २७औँ मिनेटमा पाएको पेनाल्टीमार्फत् लियोनल मेस्सीले बार्सिलोनालाई अग्रता दिलाएका थिए। त्यसको पाँच मिनेटपछि नै एमबाप्पेले बराबरी गोल गरे। ६५औँ र ८५औँ मिनेटमा गोल गर्दै उनले ह्याट्रिक पूरा गरे। पिएसजीका लागि चौंथो गोल किनले खेलको ७०औँ मिनेटमा गरे।
पिएसजीसँग च्याम्पियन्स लिगमा यसअघिका भेटमा बलियो देखिएको बार्सिलोना यसपटक भने निरिह देखियो। २०१६–१७ को च्याम्पियन्स लिगमा पहिलो लेग ४–० ले जितेको पिएसजीलाई दोस्रो लेगमा ६–१ ले हराउँदै बार्सिलोनाले सनसनी खेल देखाएको थियो। त्यही अवस्थापछि दुई क्लबबीच यो सिजन अन्तिम १६ को खेलमा मंगलबार राति भेट हुँदैछ।
त्यसअघि २०१४–१५ को च्याम्पियन्स लिग समूह चरणमा पहिलो खेल पिएसजीले ३–२ ले खेल जितेको थियो। अर्को खेलमा बार्सिलोना ३–१ ले विजयी भएको थियो। त्यही सिजन क्वाटरफाइनलमा भएको भेटमा पहिलो लेगमा ३–१ र दोस्रोमा २–० जित्दै समग्रमा ५–१ ले बार्सिलोना विजयी भएको थियो।
२०१२–१३ को च्याम्पियन्स लिग क्वाटरफाइनलमा भेट हुँदा बार्सिलोना अवे गोलका आधारमा अघि बढेको थियो। पहिलो खेल पिएसजीको मैदानमा २–२ को बराबरी खेलेको पहिलो लेगपछि बार्सिलोना मैदानमा १–१ को बराबरी भएको थियो।
त्यसअघि १९९४–९५ को सिजन च्याम्पियन्स लिग क्वाटरफाइनलमा भेट हुँदा पिएसजी अघि बढेको थियो। पहिलो खेल १–१ को बराबरी भएको प्रतिस्पर्धामा दोस्रो खेल पिएसजीले २–१ ले जितेको थियो।
२०१४–१५ को सिजन च्याम्पियन्स लिग जितेको बार्सिलोना त्यसपछिका वर्षमा भने नकआउट चरणमा उल्लेख्य प्रदर्शन गर्न सकेको छैन। २०१५–१६ मा एथ्लेटिको मड्रिडसँग क्वार्टरफाइनलमा हारेको बार्सिलोना २०१६–१७ मा युभेन्टससँग क्वार्टरफाइनलमा नै हारेको थियो।
२०१७–१८ को च्याम्पियन्स लिग क्वार्टरफाइनलमा पहिलो लेग ४–१ ले जितेको अवस्थाबाट समेत बार्सिलोना दोस्रो लेगमा रोमासँग ३–० ले पराजित हुँदै अवे गोलका आधारमा बाहिरिएको थियो।
२०१८–१९ मा सेमिफाइनलमा पहिलो लेगमा लिभरपुललाई ३–० ले हराएको बार्सिलोना दोस्रो लेगमा ४–० ले पराजित हुँदै बाहिरिएको थियो। गएको सिजन बार्सिलोना क्वार्टरफाइनलमा बायर्न म्युनिकसँग ८–२ ले हारेको थियो।
च्याम्पियन्स लिगमा यसअघि लगातार १३ पटक क्वार्टरफाइनलमा पुगेको बार्सिलोनाका लागि अहिलेको पिएसजीविरुद्ध भने कठिन देखिएको छ। गएको सिजन च्याम्पियन्स लिग फाइनल पुगेको पिएसजीसँगको दोस्रो लेग खेल मार्च ११ मा खेल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
