काठमाडौं- स्पेनिस क्लब बार्सिलोनाका फरवार्ड उसमान डेम्बेलेले च्याम्पियन्स लिग अन्तिम १६ को खेलमा फ्रेन्च क्लब पिएसजीले बदला लिन खोज्ने बताएका छन्। दुई क्लबबीच यसअघि च्याम्पियन्स लिगमा भएको भेटमा बार्सिलोनाले दोस्रो लेगमा खेल उल्टाएकोतर्फ संकेत गर्दै डेम्बेलेले यस्तो बताएका हुन्।
२०१६–१७ को च्याम्पियन्स लिगमा पहिलो लेग ४–० ले जितेको पिएसजीलाई दोस्रो लेगमा ६–१ ले हराउँदै बार्सिलोनाले सनसनी खेल देखाएको थियो। त्यही अवस्थापछि दुई क्लबबीच यो सिजन अन्तिम १६ को खेलमा मंगलबार राति भेट हुँदैछ।
‘बार्सिलोना र पिएसजीबीच यसअघिको खेल ऐतिहासिक खेल थियो। ४–० को खेल उल्टाउनु कुनै पनि टिमका लागि कतै सहज कुरा होइन अझ च्याम्पियन्स लिगमा त थप मुस्किल विषय हो, बार्सिलोनाले नेमार, मेस्सी र इनिएस्टा जस्ता खेलाडीको मद्धतमा उत्कृष्ट खेल देखाएको हो’ डेम्बेलेलाई उद्धृत गर्दै युइएफएले लेखेको छ।
‘अहिलेको खेलमा त्यही अवस्थाको बदला लिने सोच पिएसजीमा देखिने छ। सञ्चार माध्यममा आएका कुराले पनि खेलको महत्व बढेको छ। पिएसजी गएको सिजनको उपविजेता टिम हो, यो सिजन पनि उनीहरु उपाधि जित्ने बलियो टिमका रुपमा नै छन्’ उनले भनेका छन्।
पछिल्ला खेलहरुमा डेम्बेलेले आफूमा सुधार पनि ल्याइरहेका छन्। बार्सिलोना प्रशिक्षकको विश्वास र आफ्नो फिटनेसमा क्लबले गरेको काममा पनि डेम्बेले सन्तुष्ट देखिन्छन्। आफूमा बार्सिलोना आएको समयभन्दा अहिले धेरै सुधार आएको समेत उनले बताए।
च्याम्पियन्स लिगमा पिएसजी र बार्सिलोनाबीचको खेल प्रतीक्षाको विषय बनिरहेको छ। २०१६–१७ को सिजन मात्र होइन त्यसअघि पनि बार्सिलोनाको पक्षमा इतिहास देखिन्छ। २०१४–१५ को च्याम्पियन्स लिग समूह चरणमा पहिलो खेल पिएसजीले ३–२ ले खेल जितेको थियो। अर्को खेलमा बार्सिलोना ३–१ ले विजयी भएको थियो। त्यही सिजन क्वाटरफाइनलमा भएको भेटमा पहिलो लेगमा ३–१ र दोस्रोमा २–० जित्दै समग्रमा ५–१ ले बार्सिलोना विजयी भएको थियो।
२०१२–१३ को च्याम्पियन्स लिग क्वाटरफाइनलमा भेट हुँदा बार्सिलोना अवे गोलका आधारमा अघि बढेको थियो। पहिलो खेल पिएसजीको मैदानमा २–२ को बराबरी खेलेको पहिलो लेगपछि बार्सिलोना मैदानमा १–१ को बराबरी भएको थियो।
त्यसअघि १९९४–९५ को सिजन च्याम्पियन्स लिग क्वाटरफाइनलमा भेट हुँदा पिएसजी अघि बढेको थियो। पहिलो खेल १–१ को बराबरी भएको प्रतिस्पर्धामा दोस्रो खेल पिएसजीले २–१ ले जितेको थियो।
अहिले पिएसजीका नयाँ प्रशिक्षक मोउरिसियो पोचेटिनोका लागि बार्सिलोनासँगको च्याम्पियन्स लिगमा पिएसजीबाट पहिलो खेल हुनेछ। बार्सिलोनामा पुनर्निर्माणको चरणमा रहेका प्रशिक्षक रोनाल्ड कोम्यानका लागि पनि बलियो प्रतिस्पर्धी पिएसजीविरुद्ध आफ्नो क्षमता जाँच्ने मौका हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
