काठमाडौं- प्रधानमन्त्री केपी शर्मा ओलीले आफू ६४ प्रतिशतले समर्थन गरेको निर्विरोध र निर्विवादित नेता भएकाले प्रतिनिधि सभा विघटन सही रहेको दाबी गरेका छन्। सोमबार तीन वर्षका उपलब्धि सार्वजनिक गर्ने क्रममा बोल्दै आफूलाई संसदीय दलका सदस्यले नभइ एक व्यक्तिले हटाउन खोजेको उनको भनाइ छ।
उनले भने, 'प्रतिनिधि सभा विघटनअघि मैले सोचें, विद्यमान अवस्थामा वैकल्पिक सरकार बन्छ कि बन्दैन। म ६४ प्रतिशतको निर्विरोध र निर्वादित नेता हुँ। मेरा विरुद्ध संसदीय दलमा आलोचना र टिप्पणी विपरित चर्चा छैन।'
उनले आफ्नाविरुद्ध केही व्यक्तिको गाइँगुइँ सुनिएको तथा एकजना व्यक्तिले झुठो लान्छना पत्र मात्रै दर्ज गरेको जिकीर गरे। उनको दाबी छ, 'संसदीय दलमा कुनै गुनासो छैन। त्यता समस्या भयो भनेर कुनै माग भएको छैन। उपनेताकहाँ गुनासो आएन। मुख्य सचेतक र सचेतक कहाँ पनि त्यस्तो केही आएन। दलमा मात्रै होइन, पार्टीभित्र पनि संसदीय दलको नेता बदल्ने कुनै कुरा उठेको छैन। उठेको भए पनि सम्भव थिएन।'
उनले नेकपाबाहिर जम्मा ३६ प्रतिशत मात्रै रहेको बताए। उनले भने, 'जतिपल्ट गनेपनि ५१ प्रतिशत त पुग्दैन। वैकल्पिक सरकारको कतै सम्भावना नै छैन। त्यस्तो अवस्थामा बेठिक तरिकाले अघि बढ्ने कुरा विग्रहको बाटो हो।'
उनले आफूसँग अस्वस्थ फोहरी खेलतर्फ जाने कि निर्वाचन गरेर प्राप्त उपलब्धिको रक्षा गर्दै स्थिरता र स्थायित्वको बाटोबाट जाने भन्ने विकल्प रहेको बताए। त्यसैले जनताको अभिमतबाट निर्णय गर्दै केही व्यक्तिले खेल्ने राजनीतिक प्रदूषित खेलबाट देशलाई जोगाउने कदम चालेको उनको जिकीर छ।
जनताले आफूमाथि विश्वास गरेर मत दिएको तर, आफ्नै सहकर्मीले काम गर्न नदिएको अवगत गराउन जनताकहाँ पुगेको उनले बताए। उनले भने, 'मेरो नेतृत्व र पहलमाथि विश्वास जनाउनुभएको थियो। व्यवधानकारीलाई असफल पार्न आवश्यक थियो। त्यसकारण जनताका बीचमा गएँ। मलाई जुन जिम्मेवारी दिइएको थियो त्यो पूरा गर्न दिइएन भनेर जनतामाझ गएँ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772442578.png)
-1753884802-(1)-1772440084.jpeg)
-1764146706.png)
