काठमाडौं- अनौपचारिक क्षेत्र सेवा केन्द्र (इन्सेक)ले २६औँ मानव अधिकार पुरस्कार डा. रूपचन्द्र विश्वकर्मालाई प्रदान गरेको छ।
मंगलबार मानवअधिकारवादी योद्धा स्व. प्रकाश काफ्लेको २८औँ स्मृति दिवसको अवसरमा आयोजित कार्यक्रममा डा. विश्वकर्मालाई २६औँ मानवअधिकार पुरस्कार २०७६ प्रदान गरिएको हो।
बाजुरा जिल्लाको बुढीनन्दा नगरपालिका-५ का स्थायी बासिन्दा डा. विश्वकर्मा बाजुरा जिल्लाको नागरिकको स्वास्थ्य सेवामा सर्मपित व्यक्ति हुन्।
विगत ३ वर्षदेखि बाजुरा जिल्लामा रही नागरिकको स्वास्थ्य सुधारका लागि पहलकदमी लिँदै दुर्गम जिल्लामा बसी स्वास्थ्य सेवा सुधार र विपन्न वर्गको पहुँच अभिवृद्धिको काम गरिएको भन्दै उनलाई सम्मान गरिएको इन्सेकका कार्यकारी निर्देशक विजयराज गौतमले बताए।
३ वर्षअघि बाजुरा विमानस्थलमा भएको हवाई दुर्घटनाको घाइतेलाई उद्धार गरी सुविधा सम्पन्न अस्पताल लैजाने क्रममा जहाजभित्रै आपतकालीन उपचार गरी घाइतेलाई बचाएपछि उनको चर्चा देशभर भएको थियो।
सम्मानपछि डा. विश्वकर्माले आफूलाई गरिएको सम्मानले बाजुरा जिल्लाबासी र स्वास्थ्यकर्मीको सम्मान भएको बताए।
कार्यक्रममा बोल्दै अनौपचारिक क्षेत्र सेवा केन्द्र (इन्सेक)का संस्थापक अध्यक्ष सुशील प्याकुरेलले पहिले आर्थिक, सामाजिक अधिकारको कुरा गर्दा प्रजातन्त्र, लोकतन्त्रवादी हुँदैनन् भन्ने जमानालाई तोड्दै आफूहरू मानवअधिकारको क्षेत्रमा अघि बढिरहेको बताए।
इन्सेकले मानवअधिकारको क्षेत्रमा निरन्तर काम गर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
