काठमाडौं- इंग्लिस प्रिमियर लिगमा शीर्ष स्थानमा रहेको म्यानचेस्टर सिटी र लिभरपुलबीच हुने खेलको प्रतीक्षा धेरैलाई छ। आइतबार राति सवा १० मा सिटीको अग्रता बढाउने अवसरभन्दा बढी लिभरपुल अंक दुरी घटाउने दबाबमा रहनेछ।
यसअघि प्रिमियर लिग खेलमा ब्राइटनसँग हारेको लिभरपुलले म्यानचेस्टर सिटीलाई हराउन सके लिभरपुलका लागि मात्र होइन, शीर्ष भिडन्तमा रहेका अरु टिमका लागि पनि फाइदा हुनेछ। अहिले पछिल्ला खेलमा सिटीले जे गरिरहेको छ त्यसका आधारमा हेर्दा लिभरपुललाई सहज हुने छैन। डिफेन्समा उनीहरु निकै राम्रो देखिएका छन्।
यदि म्यानचेस्टर सिटीलाई भिलरपुलले जितेमा उनीहरुले उपाधि रक्षा गर्ने बल पाउने छन्। हार भोगेमा भने बाँकी लिग समय थप कठीन हुनेछ। सिटीलाई भेटाउन म्यानचेस्टर युनाइटेड लगायत टिमका लागि पनि मुस्किल हुनेछ।
लिभरपुलले म्यानचेस्टर सिटीसँग आफ्नो मैदानमा खेलेको पछिल्ला २९ लिग खेलमा एक खेल मात्र हारेको छ। जहाँ १९ खेल जितेको छ भने ९ खेल बराबरी खेलेको छ। पछिल्ला समय घरेलु मैदानको हार पनि सन् २००३ को मे महिनामा हो। यसलाई हेर्दा आफ्नो मैदानमा सिटीविरुद्ध लिभरपुल बलियो देखिए पनि पछिल्ला अवस्था हेर्दा इतिहास जोड्न सहज छैन। घरेलु मैदानमा पछिल्ला दुई खेलमा लिभरपुल पराजित भएको छ। जब कि त्यसअघि घरेलु मैदानको ६८ खेलमा लिग खेलमा अपराजित रहेको थियो।
म्यानचेस्टर सिटीमा प्रशिक्षक पेप गार्डिओलाको शैली र खेलाडीको उच्च मनोबलले लिगमा पछिल्ला ८ खेल लगातार जितेको छ। त्यसअघिका दुई खेल बराबरी खेलेको थियो। गएको सिजनको अवस्थाबाट सिटीमा धेरै कुरामा परिवर्तन देखिएको छ। सिटीले पहिले जस्तो ‘हाइ प्रेस’मा खेलिरहेको छैन। खेलमा नियन्त्रण बनाउन त्यसले सहयोग पुगिरहेको छ।
लिभरपुलमा खेलाडीमा देखिएका चोटको समस्याले असर मैदानमा देखिएको छ। पछिल्लो समय गुमेको लयले गर्दा लिभरपुलमाथि म्यानचेस्टर सिटी हाबि हुने अनुमान बढेका छन्। तर लिभरपुलले लिग प्रतिस्पर्धामा रहने टिमसँग खेल्ने शैली भिन्न नै हुनेछ। मिडफिल्डबाट डिफेन्समा झरेका खेलाडीबाट लिभरपुलको खेलमा सन्तुलन बिग्रिएको छ।
लिभरपुलमा गएको सिजनको बलिया मिडफिल्डर फाबिन्हो, जोर्डन हेन्डरसन र जर्जिनियो विज्नाल्डमले खेलको लय मिलेको थियो। यो सिजन भने उनीहरु तीनको साझेदारी देख्न पाइएको छैन। उनीहरु आफ्नो क्षेत्रमा खेल्दा कस्तोसम्म हुन सक्छन्् भन्ने फुटबल समर्थकले देखेका छन्।
आइतबार म्यानचेस्टर सिटीसँग खेलेको लिभरपुलले शनिबार लेस्टर सिटीसँग त्यसपछि च्याम्पियन्स लिगमा लाइपजिगसँग र लिगमा इभर्टनसँग खेल्नेछ। यसैले म्यानचेस्टर सिटीसँगको खेल आगामि खेलको मनोबलका लागि पनि लिभरपुलले राम्रो गनुपर्ने दबाब हुनेछ।
म्यानचेस्टर सिटीले लिभरपुलको मैदानमा लगातार १७ खेल जित्न सकेको छैन। जुनसुकै विपक्षीविरुद्ध सिटीको यो सबैभन्दा खराब अवस्था हो। लिभरपुलले भने २०२१ लागे यता घरेलु मैदानमा नै गोल गर्न सकेको छैन। जहाँ गएको खेलमा ब्राइटनविरुद्ध टार्गेटमा एक सट मात्र प्रहार गर्न सकेको थियो।
प्रिमियर लिगमा अहिलेसम्म २१ खेल खेलेको म्यानचेस्टर सिटी ४७ अंकसहित शीर्ष स्थानमा रहेको छ। २२ खेल खेलेको लिभरपुल ४० अंकसहित चौथो स्थानमा रहेको छ। दोस्रोमा रहेको म्यानचेस्टर युनाइटेडको २३ खेलमा ४५ र तेस्रोमा रहेको लेस्टर सिटीको २२ खेलमा ४२ अंक रहेको छ।
लिभरपुलमा एलिसन, फाबिन्हो र सडियो माने अन्तिम स्वास्थ्य जाँचपछि टिममा उपलब्ध हुने आश देखिएको छ। जहाँ भर्जिल भ्यान डाइक, जोय गोमेज, जियोल माटिप, नाबी केटिया र डिएगो जोटा खेलमा उपलब्ध हुने छैनन्। यस्तै म्यानचेस्टर सिटीमा केभिन डि ब्रायन र सर्जियो अग्युरो चोटका कारण टिममा उपलब्ध हुने छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
