काठमाडौं- स्पेनिस क्लब बार्सिलोनामा लियोनल मेस्सीले ६५० गोल पूरा गरेका छन्। खेलको २०औँ मिनेटमा उत्कृष्ट 'फ्री-किक' गोलमा मेस्सीले पुरानो लय देखाएका हुन्। क्लबमा यो उनको ४९औँ 'फ्री-किक' गोल हो। ला लिगामा दोस्रो स्थानमा पुग्न मेस्सीसहित एन्टोनियो ग्रिजम्यानको गोल निर्णायक भयो।
स्पेनिस सुपर कपको फाइनलमा गरेको फोउलका कारण दुई खेलको प्रतिबन्धपछि मेस्सी मैदान फर्किएका हुन्। सुपर कपको फाइनलकै टिम एथ्लेटिक बिल्बाओविरुद्धको खेल मेस्सीका लागि आफ्नो लय प्रमाणित गर्ने अवसर बन्यो। मेस्सीले पछिल्लो समय बार्सिलोनासँग गरेको सम्झौता बाहिरिएर पूर्वअध्यक्ष जोसेप मारिया बर्टामेउसहित उनीमाथि प्रश्न उठिरहेको समयमा बिल्बाओविरुद्धको जित महत्त्वपूर्ण बन्यो।
६ पटकका बालोन डिओर विजेता मेस्सीले पछिल्लो महिनादेखि आफ्नो लय अझ सुधार गरिरहेका छन्। मेस्सीले बार्सिलोनाका लागि गरेको ४९ 'फ्री-किक' गोलमा ३८ 'फ्री-किक' गोल ला लिगामा गरेका छन्। मेस्सीले पछिल्लो पटक 'फ्री-किक'को चार प्रयासमा दुईलाई गोलमा परिणत गराएका छन्। त्यसअघि ६२ 'फ्री-किक' प्रयासमा जम्मा एक गोल गरेका थिए।
पछिल्लो समय 'फ्री-किक'मा मेस्सीको गोल संख्या कम भइरहँदा अहिलेको अवस्थाले उनमा आत्मविश्वास बढेको देखिन्छ। सिजनका हिसाबले हेर्दा बार्सिलोनामा २००८-०९ को सिजन एक, २००९-१० को सिजन दुई, २०१०-११ मा एक, २०११-१२ मा तीन, २०१२-१३ मा चार, २०१३-१४ मा तीन, २०१४-१५ मा दुई, २०१५-१६ मा सात, २०१६-१७ मा चार, २०१७-१८ मा सात, २०१८-१९ मा आठ, २०१९-२० मा पाँच र चलिरहेको २०२०-२१ मा दुई 'फ्री-किक' गोल गरेका छन्।
क्लब फुटबलमा मेस्सीको ४९ 'फ्री-किक' गोल सर्वाधिक हो। उनीपछि क्रिष्टियानो रोनाल्डोले क्लब फुटबलमा ४७ 'फ्री-किक' गोल गरेका छन्। क्लब र राष्ट्रिय टिमको आँकडा हेर्दा मेस्सीले ५५ 'फ्री-किक' गोल गरेका छन् भने उनीभन्दा एक गोलले अघि क्रिष्टियानो रोनाल्डोले क्लब र राष्ट्रिय टिमबाट गरेर ५६ 'फ्री-किक' गोल गरेका छन्।
गएको सिजन बार्सिलोनामा उपाधिविहीन रहँदा मेस्सीमाथि उनको खेल लयलाई लिएर प्रश्न उठिरहेका थिए। गएको सिजन गोलका आधारमा २००७-०८ पछिको खराब सिजन भए पनि मेस्सी असिस्टमा बनाएको नयाँ कीर्तिमानले मैदानमा अवसरको खोजीमा अझ सशक्त देखिएका थिए। जसले उनी स्वयम गोलकर्ता मात्र होइनन् योजनाकार बने। गएको सिजन मेस्सीले ३१ गोल गरे। उनको २६ असिस्टले उत्कृष्ट समय नै देखायो।
ला लिगामा नै हेर्दा दुई सयभन्दा धेरै गोल गर्ने खेलाडीहरु नौ जना छन्। ती नौ खेलाडीमा तीन सय गोल कटाउने खेलाडी दुई जना छन्। जसमा चार सय गोल कटाउने खेलाडी एक जना मात्र छन्। यसैले सजिलै तोडिन असम्भव जस्तो लाग्ने ला लिगामा सर्वाधिक गोलको कीर्तिमान मेस्सीको नाममा छ। ला लिगामा उनले ५०३ खेलमा ४५६ गोल गरेका छन्।
मेस्सीको नाममा रहेर तोडिन असम्भव जस्तो लाग्ने अर्को कीर्तिमान एक वर्षमा उनले गरेको गोल संख्या हो। सन् २०१२ मा मेस्सीले बार्सिलोनाका लागि ७९ र अर्जेन्टिनी राष्ट्रिय टिमबाट १२ गोल गरेका थिए। जुन वर्ष मेस्सीको ९१ गोल कीर्तिमानी रह्यो। जुन सन् १९७२ मा जर्ड मुलरले ८५ गोल हानेर बनाएको कीर्तिमान तोडिएको थियो।
प्रशिक्षक पेप गार्डिओलाको समयमा एक सय अंक बनाएर ला लिगाको उपाधि जितेको त्यो बेला मेस्सीको खेल लय लोभलाग्दो थियो। जुन वर्ष बार्सिलोनाको ७९ गोलमा मेस्सीले ला लिगामा ५९, च्याम्पियन्स लिगमा १३, कोपा डेल रेमा ५ र स्पेनिस सुपर कपमा २ गोल गरेका थिए। ९१ गोल गरेको त्यो वर्ष मेस्सीले २४ गोलको लागि अवसर बनाएर गोल र असिस्टको संख्या १ सय १५ पुर्याएका थिए।
यस्तै विश्व फुटबलमा व्यक्तिगत रुपमा दिइने अवार्डमा विशेष रुपमा हेरिने बालोन डि’ओरमा क्रिष्टियानो रोनाल्डो र लियोनल मेस्सीबीच एक दशकभन्दा बढी समय प्रतिस्पर्धा जस्तै देखियो। गएको वर्ष मेस्सीले जित्नुअघि दुवै खेलाडीले समान पाँच पटक बालोन डि’ओर जितेको थिए।
जसमा मेस्सीले २००९, २०१०, २०११ र २०१२ मा लगातार चार पटकसहित २०१५ र २०१९ मा बालोन डि’ओर जिते। जसले विश्व फुटबलमा उत्कृष्ट खेलाडीको बहस गर्नेहरुका लागि मेस्सीलाई एक कदम अघि देखाउन तर्क मिल्यो।
मेस्सीले युरोपियन फुटबलमा सर्वाधिक गोल्डेन बुट जित्ने कीर्तिमान पनि बनाएका छन्। युरोपियन लिगमा हरेक सिजन सर्वाधिक गोल गर्ने खेलाडीले गोल्डेन बुट जित्छन्। जसमा मेस्सीले २००९-१०, २०११-१२, २०१२-१३ का साथै लगातार तीन पटक २०१६-१७, २०१७-१८ र २०१८-२०१९ मा गोल्डेन बुट जितेका छन्। यसरी मेस्सीले ६ पटक जितेको गोल्डेन बुट पनि युरोपियन फुटबलमा सर्वाधिक हो।
मेस्सीले ६ पटक नै फिफा उत्कृष्ट पुरुष खेलाडीको अवार्ड पनि जितेका छन्। उनले २००९, २०१०, २०११, २०१२, २०१५ र २०१९ मा नै फिफा उत्कृष्ट पुरुष खेलाडीको अवार्ड जितेका हुन्।
मेस्सीले बार्सिलोनाबाट विभिन्न ३४ उपाधि जितेका छन्। जुन क्लबमा एक खेलाडीले जितेको सर्वाधिक उपाधि हो। यसरी हेर्दा क्लबबाट जित्न मिल्ने सबैजसो उपाधि मेस्सीले जितेका छन्। ३४ उपाधिलाई हेर्दा १० ला लिगा, ४ च्याम्पियन्स लिग, ६ कोपा डेल रे, ८ स्पेनिस सुपर कप, ३ फिफा क्लब विश्वकप, ३ युइएफए सुपर कप रहेका छन्।
क्लबबाट राम्रो खेल्ने तर राष्ट्रका लागि उपाधि जित्न नसक्ने आलोचना व्यहोरिरहेका मेस्सीले अर्जेन्टिनाबाट २००५ मा यु २० विश्वकपका साथै २००८-०९ मा ओलम्पिक गोल्ड मेडल जिताएका छन्। २०१४ को विश्वकपमा गोल्डेन बल जितेका मेस्सीको खेललाई उपाधिसँग मात्र जोडेर हेर्दा उनीमाथि अन्याय हुनेछ।
अहिले 'फ्री-किक' गोलमा देखिएको उनको कीर्तिमानी तथ्यांक पनि क्लब फुटबलमा तोड्न सहज हुने आँकडा होइन। गएको सिजन बार्सिलोना छाड्ने स्थितिबाट रोकिएका मेस्सीले यो सिजनको अन्त्यसँगै क्लब छाड्ने हल्लाहरु चलिरहेकै छन्। यस्तोमा बार्सिलोनामा नै रहँदा उनले उत्कृष्ट खेल देखाउनुका साथै अझै केही रोमाञ्चक कीर्तिमान बनाउने नै छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
