काठमाडौं- गृहमन्त्री रामबहादुर थापा बादलले निर्वाचन सुरक्षाको लागि आवश्यक तयारी गर्न तीन वटा सुरक्षा निकायहरूलाई निर्देशन दिएका छन्। सोमबार अर्थमन्त्री विष्णुप्रसाद पौडेलसहित तीनै सुरक्षाका निकायको बैठकमा गृहमन्त्री बादलले यस्तो निर्देशन दिएका हुन्।
वैसाख १७ र २७ हुने प्रतिनिधिसभा निर्वाचनको तयारीबारे सुरक्षा निकायका नेतृत्वसँग छलफल गरेका गृहमन्त्री बादलले प्रतिनिधिसभा सदस्य निर्वाचनलाई स्वतन्त्र, निष्पक्ष, भयरहित तथा शान्तिपूर्ण वातावरणमा सम्पन्न गर्ने सम्बन्धमा नेपाल प्रहरी, सशस्त्र प्रहरी र राष्ट्रिय अनुसन्धान विभागका नेतृत्वसँग छलफल गरेका हुन्।
बैठकमा सम्पन्न भएको छ तीनै सुरक्षा निकायमा हाल मौजुदा श्रोत साधन तथा निर्वाचन प्रयोजनमा आवश्यक पर्ने थप श्रोत साधन व्यवस्थापन सम्बन्धमा प्रारम्भिक खाका प्रस्तुत गरिएको थियो।
बैठकमा अर्थमन्त्री पौडेलले विगतका निर्वाचनमा भएको खर्च विश्लेषण गरी मितव्ययितालाई ध्यान दिई निर्वाचन केन्द्रित बजेट प्रस्ताव गरी गृह मन्त्रालयमार्फत पठाउन सुरक्षा निकायहरूलाई निर्देशन दिएका थिए। उनले निर्वाचन सम्पन्न गर्न आवश्यक पर्ने बजेटको अभाव हुन नदिइने प्रतिबद्धता व्यक्त गरे।
पुस ५ गते मन्त्रिपरिषद्को सिफारिसमा राष्ट्रपति विद्यादेवी भण्डारीले प्रतिनिधिसभा विघटन गरी नयाँ निर्वाचनको मिति तोकेकी थिइन्। यद्यपि नेकपाकै प्रचण्ड-माधव पक्षले भने निर्वाचनको तयारी अघि नबढाउन निर्वाचन आयोगसमक्ष माग गरेको छ। सरकारले भने तोकिएकै मितिमा निर्वाचन सम्पन्न हुने बताउँदै आएको छ।
बैठकमा गृहसचिव र अर्थसचिवको पनि उपस्थिति थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
