काठमाडौं- नेकपा प्रचण्ड-माधव पक्षको सचिवालय बैठकले प्रधानमन्त्री केपी शर्मा ओलीलाई निरंकुश र अधिनायकवादी चरित्र रोक्न चेतावनी दिने निर्णय गरेको छ। साथै चार पूर्वप्रधानन्याधीशले प्रतिनिधि सभा विघटनको विषयमा राखेको अभिव्यक्तिलाई लिएर प्रधानमन्त्री ओलीले धम्क्याएको भन्दै त्यसको प्रतिवाद गर्ने निर्णय गरिएको प्रवक्ता नारायणकाजी श्रेष्ठले जानकारी दिए।
पार्टी कार्यालय पेरिसडाँडामा आइतबार बसेको बैठकले प्रधानमन्त्री ओलीले अहिले प्रदर्शन गरिरहेको चरित्र अधिनायकवादी र निरंकुश ठहर गरेको छ। त्यसैगरी राज्यको साधन स्रोतबाट सञ्चालित सञ्चार माध्यम एउटा गुटको प्रचारजस्तो भएको भन्दै भर्त्सना गरेको हो। प्रधानमन्त्री ओलीको यस्तो कार्यलाई बन्द गर्न पहल गर्ने निर्णय गरेको छ।
उनले भने 'आफूलाई लागेका अभिव्यक्ति दिने हक सबैलाई छ। अभिव्यक्ति दिएकै कारण धम्क्याउने कार्यको बैठकले भर्त्सना गरेको छ। साथै सम्पूर्ण बुद्धिजिवी, प्रबुद्ध व्यक्तित्व, सचेत नागरिक र कालाकारहरुलाई प्रधानमन्त्री ओलीको यो कदमविरुद्ध एकजुट भएर लड्न पार्टीले आह्वान गरेको छ।'
ओलीको असंवैधानिक कदमविरुद्ध पार्टीको आन्दोलन प्रभावकारी बनाउने र पार्टीको सुदृढीकरण अभियानमा लाग्न नेता कार्यकर्तालाई निर्देशन दिने निर्णय गरेको प्रवक्ता श्रेष्ठले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
