काठमाडौँ- राष्ट्रिय स्वतन्त्र पार्टीका सांसद गणेश पराजुलीले स्थानीय तहबाट संकलन गरिने केही कर संरचना अव्यवहारिक भएको उल्लेख गर्दै त्यसले कृषि तथा उत्पादन क्षेत्रलाई निरुत्साहित गर्ने बताएका छन्।
विशेष गरी कुखुरा पालन क्षेत्रसँग सम्बन्धित अण्डा, चल्ला र कुखुरामै कर लगाइने अभ्यासप्रति उनले आपत्ति जनाएका हुन्।
आइतबार आयोजित एक कार्यक्रममा बोल्दै सांसद पराजुलीले स्थानीय सरकारलाई राजस्व संकलनको आवश्यकता भए पनि कर प्रणाली न्यायसंगत, उत्पादनमैत्री र संघीय नीतिसँग समन्वित हुनुपर्ने बताए।
संघीय सरकारको कृषि नीति विपरीत नजाने गरी स्थानीय तहले करका मापदण्ड तय गर्नुपर्नेमा उनले जोड दिए।
उनले उत्पादन क्षेत्रलाई प्रोत्साहन गर्नुपर्ने अवस्थामा कृषि उपज तथा पशुपन्छीजन्य वस्तुमै कर लगाउँदा उद्यमी र किसानमा नकारात्मक सन्देश जाने बताए। यस्ता नीतिले लगानी घट्ने तथा उत्पादन वृद्धि प्रभावित हुने उनको धारणा थियो।
सुकुमवासी समस्या सम्बन्धमा उनले लामो समयदेखि आयोग गठन गर्ने, जग्गा वितरणलाई राजनीतिक लाभसँग जोड्ने र स्थायी समाधानभन्दा अस्थायी उपाय अपनाउने प्रवृत्ति दोहोरिएको टिप्पणी गरे।
विगत दशकौँदेखि समस्या समाधानभन्दा राजनीतिक उपयोग बढी भएको उनको भनाइ थियो।
वास्तविक भूमिहीन र सुकुमवासीलाई न्याय दिलाउन संघीय र स्थानीय सरकारबीच प्रभावकारी समन्वय अपरिहार्य रहेको उनले बताए। अब भ्रम फैलाएर मत आकर्षित गर्ने अभ्यास अन्त्य गर्दै वास्तविक पीडितको पहिचान, व्यवस्थापन र पुनर्स्थापनामा केन्द्रित हुनुपर्ने उनको धारणा थियो।
सांसद पराजुलीले आफ्नो दलले वर्तमान पाँचवर्षीय कार्यकालभित्र सुशासन र समृद्धिको आधार निर्माण गर्ने प्रतिबद्धता व्यक्त गरे। उनले अघिल्ला राजनीतिक नेतृत्वले व्यवस्था परिवर्तनको उपलब्धि उपयोग गरे पनि जनजीवन सुधारमा अपेक्षित ध्यान दिन नसकेको आरोप लगाए।
पुराना दलहरूको योगदान र बलिदानको सम्मान गर्नुपर्ने उल्लेख गर्दै उनले तिनको कार्यशैलीकै कारण नयाँ पुस्ता वैकल्पिक राजनीतितर्फ आकर्षित भएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_aDpltwY0rK-1782355389.webp)
-1764146706.png)
-1782224905-1782225890.jpeg)
