काठमाडौँ- नेकपा ओली पक्षका सचिवालय सदस्य एवम् गृहमन्त्री रामबहादुर थापा ‘बादल’ले पूर्वजनमुक्ति सेनाका कमान्डरको खोजी सुरु गरेका छन्। तत्कालीन माओवादी जनयुद्धका रणनीतिकार मानिने थापाले विघटित जनमुक्ति सेना कमान्डरलाई आफ्नो पक्षमा पार्न खोजी गरेका हुन्।
बादल निकट ३८ केन्द्रीय सदस्यमध्ये ३७ जनाले पुष्पकमल दाहाल 'प्रचण्ड'लाई समर्थन गरेपछि एक्लिएका उनले विघटित जनमुक्ति सेनाका कमान्डरसँग भेटघाट तीव्र पारेका हुन्।
बादललाई ओली कित्तामा नजान उनीनिकट केन्द्रीय सदस्यले भेटेरै दबाब दिएका थिए। तर, बादलले आफू निकट केन्द्रीय सदस्यको सुझावलाई कार्यान्वयन नगरेपछि उनी जनमुक्ति सेनाको सहरामा लागेका हुन्। ओली पक्षलाई समर्थन गर्नेको संख्या बढाउन समस्यामा परेका पूर्व माओवादी नेता कार्यकर्ता र पूर्व जनमुक्ति सेनाको खोजी सुरु भएको हो।
गृहमन्त्री बादलले विघटित जनमुक्ति सेनाका कमान्डरसँग भेट गरेको गृहमन्त्रीको सचिवालयका किरण भट्टराईले पुष्टि गरे। 'जनयुद्धताकाका केही कमान्डरहरूसँग गृहमन्त्रीको भेट भएको हो,' उनले भने, 'भेटमा नेताहरूलाई बादललाई सहयोग गर्ने वचन दिएका छन्।'
जनमुक्ति सेनामा काम गरेका कमान्डरहरू खोज्ने क्रममा ओलीले तत्कालीन डिभिजन कमान्डर कालीबहादुर खाम ‘विविध’को नाम लिएका थिए। गत १५ पुसमा सुदूरपश्चिम प्रदेशका उपलब्ध नेता कार्यकर्ताको काठमाडौँमा गरेको भेलालाई सम्बोधन गर्दै ओलीले कालीबहादुर खामबारे प्रचण्डलाई मतलब नै नभएको बताएका थिए।
जनयुद्धमा साथ दिएका कमान्डरहरूको प्रचण्डलाई कुनै वास्ता नभएको बताउँदै ओलीले प्रचण्डलाई पदबाहेक केही नचाहिने टिप्पणी गरे। त्यहाँ भाषण गर्नुअघि नै ओलीले खामलाई बालुवाटारमै बोलाएर आफ्नो पक्षमा लाग्न आग्रह गरेको प्रधानमन्त्रीको सचिवालय स्रोतले जनाएको छ।
कोटेश्वरका व्यापारी रामेश्वर श्रेष्ठको बैसाख २८ गते ०६५ मा हत्याको आरोप लागेका खाम हालसम्म पनि फरार छन्। ओलीले आफ्नो पक्षमा लागे राज्यका तर्फबाट गर्न सक्ने सहयोग गर्ने वचन ओलीले दिएको बताइएको छ।
ओलीले पूर्व माओवादी समूहलाई आफ्ना पक्षमा पार्न जनयुद्ध र जनयुद्धका घाइते विषयमा बारम्बार उठाउने गरेका छन्। ओली र थापा दुवै जना पछिल्लो समय पूर्वमाओवादी नेता कार्यकर्ता र पूर्व जनमुक्ति सेनालाई ल्याएर बलियो बनाउने रणनीतिमा लागेका छन्।
अहिले पूर्व जनमुक्ति सेना सघंका अध्यक्ष बिरु तामाङ ‘सुदीप’ थापाका स्वाकीय सचिव छन् भने महासचिव देवीबहादुर पराजुली ओली पक्षलाई समर्थन गरेका छन्। पूर्व जनमुक्ति सेनाका अध्यक्ष र महासचिवले ओली पक्षलाई समर्थन गरेपछि अरु जनमुक्ति सेनालाई आफ्नो पक्षमा पार्न लागेका छन्। आफ्नो पक्षमै पार्न थापाले गत पुस १६ गते तीन पूर्व बिग्रेड कमान्डरसहित जनमुक्ति सेनामा काम गरेका कमान्डरलाई निवासमै बोलाएर छलफल गरेका हुन्।
बादलले बोलाएको छलफलमा पूर्व बिग्रेड कमान्डर दीपेन्द्र शाह ‘युगान्त’, तुकबहादुर थापा ‘अर्जुन’ र पूर्ण पुन ‘उषाकिरण’ तीन जना बिग्रेड कमान्डर पुगेका हुन्। यस्तै जनमुक्ति सेनामा काम गरेका रेशम पुन, विवि खराल, दुर्गा पोख्रेलले पनि उनीहरूसँगै भेटेका हुन्।
पूर्वजनमुक्ति सेनाले आफूलाई साथ दिए मनोवैज्ञानिक प्रभाव पारेर पार्टीमा बलियो हुने रणनीतिमा लागेका छन्। भेटमा पूर्व जनमुक्ति सेनाका कमान्डरले थापालाई साथीसँग छलफल गरेर मात्रै समर्थन गर्ने वा नगर्ने विषयमा स्पष्ट हुने बताएका छन्।
जनयुद्धका घाइते अपांगप्रति ओलीको मोह
तत्कालीन एमाले माओवादी एक हुने भएपछि हरेक वर्षको फागुन १ गते हुने जनयुद्ध दिवस कार्यक्रममा प्रधानमन्त्री ओली सहभागी भएको रेकर्ड छैन। दुई पार्टी एक हुने भएपछि तीन पटक माओवादी समूहले जनयुद्ध दिवस मनाइसकेको छ। तर, जनयुद्ध दिवसकै दिन हुने कार्यक्रममा ओली अहिलेसम्म अनुपस्थित छन्।
तर, नेकपा विभाजन भएपछि माओवादी समूहका नेता कार्यकर्ता आफ्नो पक्षमा पार्न ओली प्रायः कार्यक्रममा जनयुद्ध शब्द दोहोर्याउने गरेका छन्। जनयुद्ध शब्द उच्चारण गर्न हिच्चकिचाउने ओलीलाई पछिल्लो समय प्रिय लाग्न थालेको छ। त्यति मात्रै होइन ओलीले जनयुद्धका घाइते अपाङ अंगभङ भएका कार्यकर्ता अवस्थाका विषयमा समेत बारम्बार व्याख्या गर्ने गरेका छन्।
पुस १५ गते काठमाडौँमा उपलब्ध सुदुरपश्चिम प्रदेशका अगुवा नेता कार्यकर्तालाई सम्बोधन गर्ने क्रममा ओलीले जनयुद्धमा अपांग घाइते भएका नेता कार्यकर्ताप्रति प्रचण्डलाई कुनै मतलब नभएको आरोप लगाए।
‘कतिका हात छैनन् कतिका खुट्टा छैनन्। कतिपय घाइतेहरू शरीरमा गोली बोकेर हिँडेका छन्। कति योद्धा विस्तारामा छन्,’ ओलीले उक्त कार्यक्रममा सान्त्वना दिए जस्तै गर्दै, ‘त्यस्तो जिन्दगी बिताउन कति कठिन हुन्छ त्यो उहाँ(प्रचण्ड)लाई के थाहा? उहाँ आफ्नो पोस्टको लागि मरिमेट्नु हुन्छ। आफ्ना परिवारका लागि मरिमेट्नु हुन्छ।’
जनयुद्धमा साथ दिएका लोकेन्द्र विष्टमगर र कालिबहादुर खामप्रति प्रचण्डलाई मोह नभएको ओलीले आरोप लगाए। ‘हिजो उहाँ (प्रचण्ड)लाई कालिबहादुर खाम चाहिन्थ्यो। कालीबहादुर खाम कहाँ छन्? किन चाहिँदैन कालिबहादुर खाम?,’ ओलीले खामप्रति सन्त्वना राख्दै भने, ‘उहाँ(प्रचण्ड)लाई बचाउने साथ दिने ती हजारौँका परिवारको अवस्था के छ? बेसारा बा आमा, टुहुराटुहुरु केटाकेटीको के चिन्ता? उहाँलाई नातागोता भए पुग्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765528419.png)
-1764146706.png)
-1763721444.png)
-1765273665.jpg)
