काठमाडौं- त्रिभुवन आर्मी क्लबले एएफसी क्लब लाइसेन्स प्रमाणपत्र पाएको छ। अखिल नेपाल फुटबल संघ एन्फाले बुधबार त्रिभुवन आर्मी क्लबलाई प्रमाणपत्र हस्तान्तरण गरेको हो।
एन्फा अध्यक्ष कर्माछिरिङ शेर्पाले प्रधानसेनापति पूर्णचन्द्र थापालाई एएफसी क्लब लाइसेन्स प्रमाणपत्र दिए। एसियाली फुटबल महासंघ (एएफसी) ले आर्मी क्लबलाई मात्रै एएफसी क्लब लाइसेन्स दिएको हो। एएफसीबाट आर्मीले गएको ७ गते क्लब लाइसेन्स पाएको थियो। योसँगै आर्मीले एएफसीका प्रतियोगिताहरु खेल्ने बाटो खुलेको छ।
गएको मंसिर १६ गते एएफसीले नेपाली क्लबहरुले क्लब लाइसेन्सको लागि न्युनतम मापदन्ड पूरा नगरेको भन्दै सबै क्लबलाई अयोग्य ठहर गरेको थियो। योसँगै नेपाली क्लबले एएफसीको कुनै पनि अन्तर्राष्ट्रिय प्रतियोगिता खेल्न नपाउने भएको थियो। आर्मीले कागजी प्रक्रिया र क्लबको विधान सुधार गर्दै लाइसेन्सका लागि पुनः आग्रह गरेको थियो।
सन् २०२० मा भएको सहिद स्मारक ए डिभिजन लिगमा रेलिगेसनमा परेको सरस्वती युथ क्लबले बाहेक १३ क्लबले एएफसी क्लब लाइसेन्सको लागि निवेदन दिएका थिए। एन्फाको क्लब लाइसेनिङ समितिले लाइसेन्स दिनका लागि एएफसीको फस्ट इन्स्ट्यान्ट बडी (एफआइबी) मा निवेदन दिएको थियो। तर क्लब लाइसेनिङको लागि नेपाली क्लबले न्युनतम मापदन्ड पूरा नगरेको भन्दै क्लब लाइसेन्स दिन एएफसीले अस्वीकार गरेको थियो। क्लब लाइसेन्स दिनका लागि अस्वीकार गरे पनि एएफसीले त्रिभुवन आर्मी क्लबप्रति भने सकारात्मक प्रतिक्रिया त्यसबेलै दिएको थियो।
नयाँ नियमअनुसार एएफसीको प्रतियोगिता खेल्न क्लबले विभिन्न १८ मापदन्ड पूरा गर्नु पर्छ। क्लब लाइसेन्स लिनका लागि क्लबले अनिवार्य रुपमा क्लब आफ्नै एकेडेमी, मैदान, उमेर समूहका टिम, खेलाडीसँगको सम्झौता, प्रशिक्षण सुविधा लगायतका मापदण्ड पूरा गरेको हुनुपर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
