काठमाडौं- गएको सिजनको अन्त्यमा बार्सिलोना छाड्ने प्रयास असफल भएपछि सार्वजनिक रुपमा बोलेका मेस्सी एकपटक फेरि खुलेर अगाडि आएका छन्। आउने जुन ३० सम्म क्लबसँगको सम्झौतामा रहेका मेस्सीले बार्सिलोना छाड्नेबारे अडकल भइरहँदा उनले सार्वजनिक अभिव्यक्ति दिएका हुन्।
‘अहिले म राम्रो अवस्थामा छु। गएको ट्रान्सफर विन्डोको समय मेरो असाध्यै खराब समय थियो। गएको सिजनको खराब अवस्था र क्लब छाड्ने बेलामा ब्युरोफ्याक्स लगायत अन्य कुराले समय राम्रो बितेको थिएन। त्यसले यो सिजनको सुरुवातसम्म केही असर गरेको हो’, मेस्सीले भनेका छन्, ‘तर अहिले म ठीक छु। अब अगाडिका लागि सबै कुरामा राम्ररी बढिरहेको छु। क्लब अप्ठ्यारो समयबाट गुज्रिरहेको छ भन्ने मलाई थाहा छ।’
यो सिजनको खेल सकिएपछि मेस्सीले बार्सिलोना छाड्छन् भन्ने अनुमान पनि भइरहेका छन्। गएको ट्रान्सफर समयमा जस्तै इंग्लिस क्लब म्यानचेस्टर सिटीले मेस्सी किन्ने इच्छा देखाइरहेको छ। त्यसका साथै फ्रेन्च क्लब पिएसजी पनि मेस्सीलाई लैजान सक्ने क्लबका रुपमा हेरिरहेको छ। नेमारले मेस्सीसँगै खेल्ने इच्छा सार्वजनिक रुपमा बताइरहँदा उनी पिएसजी जाने विषयमा बल पुगेको छ।
यसअघि बार्सिलोना अध्यक्षमा जोसेप मारिया बर्टामेउ रहँदा मेस्सीको महँगो रिलिज क्लजका कारण म्यानचेस्टर सिटीले उनलाई लैजान सकेको थिएन। सिजनको अन्त्यमा क्लब छाड्न पाउने विषय आफ्नो सम्झौतामा रहेको मेस्सीले बताइरहे पनि ७०० मिलियन युरोको रिलिज क्लजलाई बाधा बनाएर उनलाई रोकिएको थियो। जसले आफ्नो प्रिय क्लबविरुद्ध कानूनी लडाइँमा नजाने भन्दै मेस्सी बार्सिलोनामा रहन राजी भएका थिए।
त्यसबेला लामो समयपछि सार्वजनिक रुपमा बोलेका मेस्सीले क्लब अध्यक्ष बर्टामेउको खुलेर आलोचना गरेका थिए। जसका कारण बर्टामेउ हटाउन अन्य पदाधिकारी लागिपरे र उनको राजीनामाका लागि बाध्य बनाए। अब बार्सिलोना ब्यवस्थापनको नयाँ चुनावले मेस्सीको भविष्य कता जान्छ भन्ने निक्योल हुने फुटबल विश्लेषकहरु बताइरहेका छन्। मेस्सीले स्पेनिस टेलिभिजनलाई दिएको अन्तर्वार्ता पाँच दिनपछि प्रसारण गरिने र त्यसले धेरै अनुमान टुंगिने बताइएको छ।
यो सिजन पहिले जस्तो गोलमा बढ्ने संख्यामा मेस्सी पछाडि परिरहेका देखिन्छन्। आफूलाई गएको ट्रान्सफर समयको विषयले असर नगरेको बताइरहे पनि उनी खुलेर पहिलेको अवस्थामा पुग्न सकेका छैनन्। यो सिजन मेस्सीले बार्सिलोनाको १७ खेलमा ९ गोल र ४ असिस्ट गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
