काठमाडौं– डिफेन्डिङ च्याम्पियन युभेन्टसले इटालियन सिरि ए फुटबलमा जित निकालेको छ। शनिबार राति भएको खेलमा युभेन्टसले पर्मालाई ४–० गोलअन्तरले पराजित गरेको हो।
पर्मालाई पराजित गर्न युभेन्टसका क्रिस्टियानो रोनाल्डोले दुई गोल गरे। डेजान कुलुसेभस्की र अल्भारो मोरटाले समान १–१ गोल गरे। पहिलो हाफमा दुई गोलको अग्रता बनाएको युभेन्टसले दोस्रो हाफमा थप दुई गोल गर्दै जित निकालेको हो।
खेलको २३ औं मिनेटमा नै कुलुसेभस्कीले गोल गर्दै युभेन्टसलाई १–० गोलको अग्रता दिलाए। २६ औं मिनेटमा रोनाल्डोले गोल गरेपछि युभेन्टसले २–० गोलको अग्रता बनायो। खेलको ४८ औं मिनेटमा रोनाल्डोले व्यक्तिगत दोस्रो गोल गरेपछि युभेन्टसको अग्रता ३–० मा पुग्यो। त्यसपछि खेलको ८५ औं मिनेटमा मोरटाले गोल गरेपछि युभेन्टसले ४–० गोलको जित निकालेको हो।
जितसँगै युभेन्टसले लिगको शीर्ष स्थानमा रहेको एसी मिलानसँग अंक दूरी एकमा झारेको छ। लिगको तेस्रो स्थानमा रहेको युभेन्टसको १३ खेलबाट २७ अंक छ भने एक खेल कम खेलेको एसी मिलानको २८ अंक छ। लिगको दोस्रो स्थानमा रहेको इन्टर मिलानको १२ खेलबाट २७ अंक नै छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778036869.gif)
-1764146706.png)
