काठमाडौँ- नेकपाका कार्यकारी अध्यक्ष पुष्पकमल दाहाल ‘प्रचण्ड’सहित वरिष्ठ नेता झलनाथ खनाल र माधवकुमार नेपालले आफ्ना गुटका नेताहरूलाई सम्बोधन गर्दै गलत प्रवृत्तिविरुद्ध डटेर लाग्न निर्देशन दिएका छन्। प्रदेश १ का पार्टी जिल्ला अध्यक्ष र सचिवसहित उपलब्ध केन्द्रीय सदस्यहरुलाई सम्बोधन गर्दै तीनै नेताले पार्टीलाई विधिपद्धतिमा ल्याउन नदिने प्रवृत्तिविरुद्ध लड्न निर्देशन दिएका हुन्।
पार्टी केन्द्रीय कार्यालय पेरिसडाँडामा राखिएको गुटको भेलालाई प्रचण्ड, खनाल र नेपालले मात्रै सम्बोधन गरेका थिए। प्रदेशबाट आएका उपलब्ध केन्द्रीय सदस्य सहित जिल्ला पार्टी अध्यक्ष र सचिवले शीर्ष नेताले राखेको धारणा सुनेर मात्रै बसेका थिए। तीनै जना नेताले पार्टीमा भइरहेको विकसित घटनाक्रमका विषयमा विस्तृतमा व्याख्या गरेका थिए।
पार्टीमा विधिपद्धति समाएर विचार विचलनविरुद्ध निर्मतापूर्वक लाग्नुपर्ने नेताहरूको ठहर छ। यसअघि प्रचण्ड नेपाल पक्षका विद्यार्थी संगठनले प्रदेश १ को झापामा गुटको भेला गरेका थिए। उनीहरुले गर्नुअघि ओली निकट विद्यार्थी संगठनले विराटनगरमा प्रदेशस्तरको भेला गरेका थिए।
प्रदेश एकमा पार्टी गुटको भेलाले निरन्तरता पाइरहेको छ। यसै निरन्तरता स्वरुप शुक्रबार प्रचण्ड नेपाल पक्षले जिल्ला अध्यक्ष र सचिवलाई बोलाएर पेरिसडाँडामा भेला गरेका हुन्।
भेलामा सहभागी पार्टी केन्द्रीय सदस्य जगन्नाथ खतिवडाले पार्टीलाई कसरी सुदृढ र एकताबद्ध बनाउन सकिन्छ भन्ने विषयमा छलफल भएको बताए। 'हामीले गलत प्रवृत्तिका विरुद्ध कसरी संगठित हुने? गलत प्रवृत्तिका विरुद्ध कसरी संगठित भएर प्रतिवाद गर्ने विषयमा छलफल गर्यौ,’ खतिवडाले भने, ‘प्रधानमन्त्रीले अध्यादेश ल्याएर ठूलो समस्या पैदा गर्नुभएको छ। यदि उनले फिर्ता गर्नु भएन भने थप एक कदम अगाडि बढ्ने भन्ने छ।’
तर ओलीले अध्यादेश फिर्ता नगरे कस्तो कदम चल्ने भन्ने विषयमा खतिवडाले खुलाएनन्। पार्टीका विखण्डनवादी, एकताधिकारवादी र सर्वसत्तावादीविरुद्ध एक जुट भई कसरी संघर्ष गर्ने विषयमा छलफल भएको खतिवडाले दाबी गरे।
प्रचण्डले पार्टी विधि पद्धति र वैचारिक पाटोको विषयमा व्याख्या गरेको उनले बताए। ‘हामीले केवल पदको लालसाले गरिएको हो भनेर आरोप लगाइएको छ। दुई वटा लिखत प्रतिवेदन अध्ययन गर्नुस् तपाईहरुले तुलना गर्नुस्,’ प्रचण्डको भनाई उद्धृत गर्दै खतिवडाले भने, ‘सत्य के हो तपाईंहरू आफै ठम्याउनुस् भनेर हामीलाई ठम्याउने मौका दिनुभएको छ।’
बैठकमा प्रचण्ड नेपाल पक्षले नेताहरूले प्रचण्डको प्रतिवेदन ठिक भएको ठहर गर्दै दुबै प्रतिवेदन पार्टी कमिटीमा छलफल गर्नुपर्ने माग गरेका छन्। ‘पार्टीमा गम्भीर वैचारिक विचलन भयो। जसले गर्दा समस्याहरु झन् बढ्दै गयो। जब समस्याहरु पैदा हुँदै जान्छन्। त्यसपछि कम्युनिस्ट पार्टी समाप्त हुँदै जान्छन्,’ प्रचण्डको भनाई उधृढ गर्दै अर्का केन्द्रीय सदस्य सुदन किराँतीले भने, ‘पार्टी एकतालाई अक्षुण्ण राख्दै। विचलन भएको विचार विधि र प्रवृत्तिविरुद्ध एक हुनुस्।’
पार्टी अध्यक्ष केपी ओलीले विधि पद्धतिको पालना नगर्दा समस्या बढ्दै गएको खनाल र नेपालको भनाइ थियो। पार्टी एकतालाई बचाउँदै विचलनका विरुद्धमा निरन्तर सघर्ष गर्नु पर्ने नेताहरु बताएका छन्। वैचारिक विचलन हुँदा विचार, प्रणाली, संगठन र व्यवहारमा गाँठो पर्दै गएको उनीहरूको ठहर छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
