काठमाडौं–नेपाल धितोपत्र बोर्डले ब्रोकर कमिसन घटाउने विषयमा आफ्नै सुझाव लागू गर्न सकेको छैन। बोर्डले उप कार्यकारी निर्देशक डा. नवराज अधिकारीको नेतृत्वमा ब्रोकर कमिसन घटाउने विषयमा अध्ययन गरेको थियो। समितिले दोस्रो बजारमा कारोबार रकम बढ्दै गएकाले अन्तर्राष्ट्रिय प्रचलन अनुसार कमिसन घटाउनु पर्ने सुझाव दिएको थियो।
समितिको सुझावलाई लिएर बोर्डमा छलफल भइरहेको प्रवक्ता निरज गिरीले जानकारी दिए। लगानीकर्ताहरुले बोर्डको कार्यालयमै गएर कमिसन घटाउन दबाब दिइरहेका छन्। तर ब्रोकर सोसाइटीले भने अध्यक्ष भीष्मराज ढुङ्गानालाई नघटाउन अनुरोध गरिरहेका छन्। ब्रोकर र लगानीकर्ताको दबाबमा रहेको बोर्डले अहिलेसम्म कुनै ठोस निर्णय भने गर्न सकेको छैन।
बोर्डमा यस विषयमा छलफल भइरहेकाले केही दिनमा नै कमिसन घट्ने निर्णय हुने गिरीले बताए। अहिले दोस्रो बजारमा भइरहेको कारोबारलाई मात्रै आधार मानेर कमिसन घटाउँदा भोलिका दिनमा समस्या पर्न सक्ने भएकाले अधिकतम घट्न सक्ने तथा बढ्न सक्ने अवस्थालाई मूल्याङ्कन गरेर केही घटाउन सकिने उनको राय छ।
प्रवक्ता गिरीले भने, ‘बोर्ड कमिसन घटाउने पक्षमा छ तर के कति र कसरी घटाउने भन्ने विषयमा छलफल भइरहेको छ।’
ब्रोकरहरुले भने अहिले केही समय बढेको कारोबारलाई आधार मानेर मात्रै कमिसन घटाउँदा भोलिका दिनमा समस्या पर्ने भएकाले हतार गर्न नहुने तर्क राख्दै आएका छन्। लगानीकर्ताले तिर्ने सोलोडोलो कमिसनलाई लिएर ब्रोकर कमिसन भन्न नहुने ब्रोकर एसोसिएनका निवर्तमान अध्यक्ष भरत रानाभाट बताउछन्। नेपालको ब्रोकर कमिसन दक्षिण एशियाकै कम भएकाले नेपालमा कमिसन धेरै भयो भन्नु जायज नभएको उनको तर्क छ।
तर लगानीकर्ताहरुले भने दैनिक एक अर्ब कारोबार हुँदा र झण्डै १० अर्बको कारोबार हुँदा पनि ब्रोकर कमिसन एउटै हुनु जायज नभएको बताउँदै आएका छन्। ब्रोकर कमिसन चाँडोभन्दा चाँडो ०.६ प्रतिशतबाट ०.२५ प्रतिशतमा झार्नु पर्ने शेयर लगानीकर्ता संघका अध्यक्ष उत्तम अर्याल बताउछन्।
धितोपत्र बोर्डले कमिसन घटाउनु पर्ने सुझाव दिएपछि पनि घटाउन आलटाल गर्नु ब्रोकरको प्रभावमा बोर्ड परेको अर्यालले आरोप लगाए।
बोर्ड अध्यक्ष भीष्मराज ढुंगाना पारिवारिक कारणले अमेरिका गएकाले यस विषयमा निर्णय हुन नसकेको बोर्डले जनाएको छ। उनी केही दिनमा नेपाल आउने र यस विषयमा छिटोभन्दा छिटो निर्णय हुने बोर्डका अधिकारीहरु बताउछन्।
लगानीकर्ताहरुले भनेजस्तो आधा घटाउनेभन्दा पनि कसैलाई पनि अन्याय नहुने गरि कमिसन घटाइने प्रवक्ता निरज गिरीले बताए।
लगानीकर्ताले ५० हजार रुपियाँसम्मको कारोबारमा ०।६ प्रतिशत कमिसन तिर्छन्। त्यस्तै ५० हजारदेखि पाँच लाख रुपियाँसम्मको कारोबारमा ०.५५ प्रतिशत, पाँच लाखदेखि २० लाखसम्मको कारोबारमा ०.५० प्रतिशत र २० लाखदेखि एक करोडसम्मको कारोबारमा ०.४५ प्रतिशत र सोभन्दा माथिको कारोबारमा ०।४० प्रतिशत कमिसन तिर्दै आएका छन्।
लगानीकर्ताले तिर्ने एकमुष्ट कमिसनमध्ये नेपाल स्टक एक्सचेन्जले २० प्रतिशत र नेपाल धितोपत्र बोर्डले ०.६० प्रतिशत लिन्छ। बजारमा लगानीकर्ताले तिर्ने सम्पूर्ण कमिसन ब्रोकर आफैंले लिन्छन् भन्ने हल्लाको पछाडि लगानीकर्ता लागेको रानाभाटले आरोप लगाए। कमिसन न्यायसंगत हिसाबले सबैको घटाउनु पर्ने ब्रोकरहरुको राय रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
