न्युयोर्क–गत नोभेम्बर ३ मा भएको राष्ट्रपति निर्वाचनमा जो बाइडेनको जितलाई औपचारिकता दिइएको छ। सोमबार राष्ट्रपति चुन्न भएको मतदानमा इलेक्टरहरुले बाइडेनको जीतलाई सदर गरेका हुन्। अमेरिकी राष्ट्रपति चुनावमा जनताले सिधै राष्ट्रपति नचुनेर इलेक्टरहरु चुन्छन्। उनीहरुले नै औपचारिक रुपमा अमेरिकी राष्ट्रपति चुन्नका लागि मतदान गरेका हुन्।
इलेक्टोरल कलेजका सदस्यहरु आआफ्ना राज्यमा जम्मा भएर राष्ट्रपतिका लागि औपचारिक रुपमा मतदान गरेका थिए। बाइडेनले राष्ट्रपति हुनका लागि आवश्यक २७० भन्दा बढी इलेक्टोरल मत औपचारिक रुपमा प्राप्त गरेका छन्।
यद्यपि राष्ट्रपति डोनाल्ड ट्रम्पले आफ्नो पराजय अझै स्वीकारेका छैनन्। ट्रम्पले पेन्सिलभेनियालगायतका राज्यका इलेक्टरहरुलाई मतदान गर्नबाट रोक लगाउन गरेको कानुनी लडाइँसमेत असफल भइसकेको छ।
इलेक्टरहरुले मतदान गरिसकेपछि नतिजा सार्वजनिक गर्दै प्रमाणपत्रमा हस्ताक्षर गर्छन्। ती प्रमाणपत्रहरु सिनेटको प्रेसिडेण्डको हैसियतमा उपराष्ट्रपति माइक पेन्ससमक्ष पठाइनेछ। त्यस्तै फेडरल रजिष्टरको अफिस, राज्यका सेक्रेटरी अफ स्टेट र संघीय जिल्ला अदालतका प्रमुख न्यायाधीशसमक्ष पठाइनेछ।
त्यसपछि जनवरी ६ मा संसदको संयुक्त सदनले मतहरु औपचारिक रुपमा गणना गर्नेछ। माइक पेन्सको अध्यक्षतामा यो काम हुनेछ। पेन्सले अल्फावेटिकल अर्डरमा राज्यका प्रमाणपत्रहरु खोल्नेछन्। बाइडेनले २७० इलेक्टोरल मत प्राप्त गर्नासाथ पेन्सले विजेता घोषणा गर्नेछन्।
संसदका नयाँ सदस्यहरुले जनवरी ३ मा सपथग्रहण गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
