काठमाडौं- स्पेनिस क्लब बार्सिलोनाका प्रशिक्षक रोनाल्ड कोम्यानले यो सिजनको खराब अवस्था रहँदा रहँदै पनि आफूहरु अझै लिगको दाबेदार रहेको बताएका छन्। आइतबार राति लेभान्टेलाई १–० ले हराएको खेलपछि कोम्यानले आफूहरु जितमा बढ्न सक्ने बताएका हुन्।
‘पक्कै पनि हामी लिग जित्न सक्छौँ। अब सुधार गर्दै जाँदा हाम्रो आत्मविश्वास पनि बढ्नेछ। गोलमा हाम्रो शैली फेरिँदै गएको छ। अझै खेल्न बाँकी खेलहरु निकै छन्’ उनले भने। मेस्सीका लागि मैदानमा अवस्था सहज नहुने भन्दै उनी भन्छन्, ‘हामीले विचार गर्नुपर्ने कुरा मेस्सीमाति नै विपक्षीको आँखा परिरहेको हुन्छ, उनलाई गोलमा बढ्न सहज हुँदैन। उनको भूमिका सधैँ महत्वपूर्ण नै छ।’
लेभान्टेविरुद्ध गोलमा संघर्ष गरिरहेको बार्सिलोनाका लागि कप्तान लियोनल मेस्सीले खेलको ७६औँ मिनेटमा डि योङको पासमा उत्कृष्ट गोल गरेका थिए। जसले बार्सिलोना लिग अंक तालिकामा आठौँ स्थानमा उक्लिएको छ। ११ खेलमा बार्सिलोनाको १७ अंक छ।
लेभान्टेविरुद्ध अहिलेसम्म मेस्सीले २० ला लिगा खेलमा २२ गोल, १६ असिस्ट गरेका छन्। जसमा १७ खेल जितेका मेस्सीले दुई खेल बराबरी गरेका छन् भने एक खेल हारेका छन्। यो सिजन सधैँ जस्तै मैदानमा हेर्नलायक देखिए पनि मेस्सी गोलमा बढ्न भने पहिले जस्तो सहज देखिएका छैनन्।
यो सिजन बार्सिलोनाले ला लिगामा संघर्ष गर्नुपरिरहेको छ। च्याम्पियन्स लिगमा युभेन्टससँगको हारपछि गएको १३ वर्षमा पहिलोपटक समूह उपविजेता बनेको बार्सिलोनाको समय ला लिगामा त अझ खराब छ।
बार्सिलोनामा अहिले परिवर्तनको समय चलिरहेको भए पनि बार्सिलोनाको पछिल्लो इतिहासमा रोनाल्ड कोम्यान नतिजाका हिसाबले खराब प्रशिक्षक देखिएका छन्। २००३–०४ मा फ्रान्क रिजकार्ड प्रशिक्षक रहँदा बार्सिलोनाले पहिलो १६ खेलमा ८ खेल मात्र जितेको थियो। ५ बराबरी र ३ हार भएको थियो। अहिले कोम्यानले १६ खेलमा ९ खेल जितेका छन्। २ बराबरी र ५ हार भएको छ।
रिजकार्डबाहेक लुइस इनरिक, टिटो भिलानोभा, टाटा मार्टिनो, पेप गार्डिओला, एनेस्टो भालभर्दे जस्ता प्रशिक्षकको सुरुका १६ खेलको अवस्था तुलना गर्दा कोम्यान अझ कमजोर देखिन्छन्। सुरुवातको १६ खेलमा इनरिक र सेटियनले तीन खेल हारेका थिए भने गार्डिओला, भालभर्दे, भिलानोभाले दुई खेल हारेका थिए। जहाँ मार्टिनो अपराजित थिए।
यो सिजन लिगमा अलाभेससँग १–१ को बराबरी हुँदा बार्सिलोना टिममा गोलकिपर नेटो र डिफेन्डर जेरार्ड पिकेबीच तालमेल बिग्रिएको थियो। जसले नेटोले गरेको पास सिधा विपक्षी फरवार्डलाई गयो र बार्सिलोनाले गोल खान पुग्यो। गेटाफेविरुद्ध १–० ले हार्दा फ्रान्की डि योङको अनावश्यक फोउल पेनाल्टीको कारण बनेको थियो।
लिगमा एथ्लेटिको मड्रिडसँगको १–० को हारमा पनि अनावश्यक गल्तीमा जेरार्ड पिके सामेल भएका थिए। जहाँ गोलकिपर जेरार्ड पिके बलका लागि मैदानको आधा भागसम्म बढिदिँदा एथ्लेटिकोमा कारास्कोले सुझबुझपूर्ण खेल देखाउँदै लामो प्रहारमा गोल गरे। पछिल्लो पटक लिगमा काडिजसँगको २–१ को हारमा दुबै गोल बार्सिलोनाको सानो गल्तीको परिणाम नै थियो। खेलमा यस्ता अवस्थाहरु आउँछन् नै तर बार्सिलोनाका लागि ती हरेक साना गल्ती हारको कारण बनिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
