काठमाडौं–जिल्ला अदालत कास्कीले जुवातास खेलिरहेको अवस्थामा पक्राउ परेका ६ जनाबाट साढे ११ लाख रुपैयाँ धरौटी माग गरेको छ। कात्तिक ७ गते पोखरा १२ का योगेश श्रेष्ठको घरमा डेरा गरी बस्ने नवीन गौचनको कोठाबाट पक्राउ परेकाहरुबाट उक्त रकम धरौटी लिन अदालतले आदेश गरेको हो।
उक्त समयमा ठाकुरप्रसाद गुरुङ, प्रेमकुमारी गुरुङ, संगीता भन्ने सन्तुमाया गुरुङ, नवीन गौचन, दिलबहादुर घर्तीमगर र टीकाराम रिमाल पक्राउ परेका थिए।
उनीहरुमध्ये ठाकुरप्रसाद गुरुङबाट ३ लाख ६३ हजार, प्रेमकुमारी गुरुङबाट १ लाख ७५ हजार ४ सय ७०, संगीता भन्ने सन्तुमाया गुरुङबाट १ लाख ८९ हजार, नवीन गौचनबाट २ लाख ४० हजार ६५, दिलबहादुर घर्तीमगरबाट १ लाख ५४ हजार र टीकाराम रिमालबाट २७ हजार १४० नगद धरौट, बैंक ग्यारेन्टी वा सो बराबरको जेथा जमानत माग गरी दिए तारेखमा राख्नू भन्ने आदेश अदालतले गरेको हो।
जिल्ला न्यायाधीश श्रीकृष्ण भट्टराईको इजलासले जुवातास मुद्दाका उक्त प्रतिवादीहरु निर्दोष रहेछन् भन्न सकिने अवस्था नदेखिएको र पछि अनुसन्धान तथा प्रमाणबाट ठहर बमोजिम हुने गरी उक्त आदेश गरेको थियो।
फौजदारी कार्यविधि संहिता २०७४ को दफा ६८ को अवस्था विद्यमान देखिँदा पछि प्रमाण बुझ्दै जाँदा ठहरेबमोजिम हुने गरी आदेश भएको जानकारी अदालतका स्रेस्तेदार रामप्रसाद पौडेलले जानकारी दिए। अदालतको यस्तो आदेश मंगलबार आएको थियो।
यसअघि पटक–पटक जुवा तासको कसुर गरी सजाय पाइसकेको र उक्त कसुरमा सजाय पाएको ५ वर्षभित्र सोही कसुर गरेको देखिएकाले पछिल्लोपटक गरेको सजायको दोब्बरसम्म थप सजाय हुने कानुनी व्यवस्था अनुसार अदालतको आदेश आएको हो ।
यो मुद्दाका प्रतिवादीमध्ये कतिपय ७ पटकसम्म पक्राउ परेका पटके जुवाडे भएका हुँदा त्यसै अनुसार बरामद रकममा सजाय बढ्दै जाँदा धरौटी रकम झन्डै ११ लाख रुपैयाँ पुगेको हो।
अपराध संहिता, २०७४ को दफा १२५ को उपदफा (३) बमोजिम बरामद रकम जफत र सजायको मागसहित जिल्ला सरकारी वकिलको कार्यालयले उनीहरुविरुद्ध मुद्दा दायर गरेको थियो। मुद्दामा सरकारका तर्फबाट जिल्ला न्यायाधिवक्ता रुद्रप्रसाद सुवेदी र प्रतिवादीका तर्फबाट अधिवक्ता देवनाथ मरासिनीले बहस गरेका थिए।
प्रहरीले उनीहरुलाई पक्राउ गर्दा खालबाट ३ लाख २३ हजार ३९० रुपैयाँ नगदसहित ३ बुक तास र तास खेल्न प्रयोग भएको नीलो रङको टेबलकभर बरामद गरेको थियो ।
प्रतिवादीहरुले हारजितका लागि जुवा, तास खेल्न जम्मा नभएको दाबी प्रस्तुत गरेका थिए । ‘खेल्ने तयारीसम्म गरेको हो, हामीहरूले जुवा, तास नखेलेको अवस्थामा प्रहरीले हामीहरूलाई पक्राउ गरी झुट्टा मुद्दा लगाएको हो,’ प्रतिवादीहरुले भनेका थिए, ‘तसर्थ हामीहरूले अभियोग दाबीबाट सफाइ पाउनुपर्छ ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
