काठमाडौं- योगी नरहरिनाथले लेख्नुभएका ऐतिहासिक महत्वका पुस्तकको राष्ट्रिय अभिलेखालयले अभिलेखीकरण सुरू गरेको छ। योगीले संग्रह गरेका हस्तलिखित ग्रन्थलगायत दस्तावेज भने संरक्षण गरेर स्क्यानिङसमेत गरिने अभिलेखालयले जनाएको छ।
पशुपति क्षेत्रस्थित मृगस्थलीको गोरक्षपीठमा रहेको आश्रममा अस्तव्यस्त पुस्तक संरक्षणका लागि अभिलेखीकरण सुरु गरिएको अभिलेखालयका अनुसन्धान अधिकृत मनिता न्यौपानेले जानकारी दिए। यहाँ योगी नरहरिनाथले लेखेका ५७१ वटा पुस्तक छन्। योगीलाई प्राप्त भएका पुस्तकसमेत पुस्तकालयमा राखिएको छ। पुस्तकालय माथिको कोठामा हस्तलिखित ग्रन्थलगायत महत्वपूर्ण दस्तावेज रहेको जनाइएको छ।
योगीको निधनपछि गुठी संस्थानले आश्रममा थुनेर राखेको भवन २०७२ वैशाख १२ गतेको भूकम्पले भत्किएपछि धेरै पुस्तक बिग्रिएका छन्। पुस्तक बिग्रन लागेपछि श्री बृहदाध्यात्मिक परिषद्ले योगी नरहरिनाथ स्मृति पुस्तकालय सङ्ग्रहालय शुरू गरेको थियो। त्यहाँ राखिएका पुस्तकको अभिलेखालयले तीन दिनदेखि अभिलेख राख्न सुरू गरेको हो।
वर्षौंदेखि थुनिएर राखिएका पुस्तकको धुलो झार्ने, मिलाउने सूचीकरण गर्नेलगायत काममा नेपाली सेनाले समेत सघाइरहेको पुस्तकालयमा स्वयंसेविका रुपमा काम गर्दै आएकी दीपा दाहालले बताइन्। पुस्तकालय सुरु गरिए पनि स्रोत र साधनको अभावमा व्यवस्थित हुन सकेको छैन। सेनाले आश्रममा भत्किएका संरचना बनाउनसमेत सहयोग गर्ने जनाइएको छ।
अभिलेखालयबाट खटिएकी सिर्जना भट्टराई पुस्तकको अवस्था कस्तो छ भनी हेरेर मिलाउन लागिएको बताउँछन्। हालसम्म पाइएका पुस्तक सुरक्षित पाइएको उनले बताए। पुस्तकालयमा योगी नरहरिनाथलाई प्राप्त भएका पुस्तकसमेत गरी ६ हजार वटाको सङ्ग्रह गरिएको छ। पुस्तकालयमा सन्धि सङ्ग्रह, हिमवत्खण्डलगायत महत्वपूर्ण पुस्तक छन्। नरहरिनाथका केही पुस्तक भने पुनः प्रकाशन भएका छन्। गोरक्ष साम्यवादलगायत उनका पुस्तकको माग अहिले बढिरहेको स्वयंसेवी दाहालले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771045886.png)
-1764146706.png)
-1770562345.jpg)
