काठमाडौं- यस वर्षको त्रिभुवन विश्वविद्यालय (त्रिवि) को ४६औँ दीक्षान्त समारोहमा करिब २ सय जना मात्र सहभागी हुन पाउने भएका छन्। पुस ६ गते हुने समारोहमा पदक विजेताका साथै दर्शनाचार्य र विद्यावारिधि उपाधि प्राप्त गर्ने र अन्य अतिथिसहित करिब २ सय जनाको मात्र सहभागिता हुने गरी दीक्षान्त समारोह गर्न लागिएको समारोह समितिका सदस्यसचिव डा घनश्याम ठाकुरले जानकारी दिए। कोरोना संक्रमणको अवस्थालाई दृष्टिगत गरी कम विद्यार्थीको सहभागितामा समारोह गर्न लागिएको हो। गत वर्ष करिब १० हजार विद्यार्थी समारोहमा सहभागी भएका थिए।
डा ठाकुरका अनुसार समारोहमा यस वर्ष सात हजार ८७ जना विद्यार्थी दीक्षित हुँदैछन्। यसअघि पुल्चोकस्थित पुल्चोक इञ्जिनीयरिङ क्याम्पसमा हुँदै आएको दीक्षान्त समारोह यसपटक भने बल्खुस्थित परीक्षा नियन्त्रण कार्यालयको प्राङ्गणमा हुने भएको छ। त्रिवि परीक्षा नियन्त्रण कार्यालय (पनिका) का सहनियन्त्रकसमेत रहेका डा ठाकुरले समारोहमा विभिन्न ३१ वटा पदक र पुरस्कार प्रदान गरिने बताए।
त्रिविको ४६औँ दीक्षान्त समारोहमा चान्सलर पदक लिलाप्रसाद बगालेले प्राप्त गर्ने भएका छन्। बगालेले ४.० सिजिपिए प्राप्त गर्नुभएको छ। बगालेले चान्सलरसहित त्रिवि प्राध्यापक सङ्घ स्वर्ग पदक र रामप्रसाद मानन्धर स्वर्ग पदकसमेत पाउने भएका छन्।
इन्द्रभक्त श्रेष्ठ स्वर्ग पदक स्कुल अफ म्यानेजमेन्टबाट एमबिए तहमा सर्वोकृष्ट अङ्क प्राप्त गर्ने प्रतीक्षा रिजालले प्राप्त गर्ने भएकी छन्। उनले ३.९२ जिपिए प्राप्त गरेकी छन्।
समारोहमा पत्रकारिता तथा आमसञ्चार केन्द्रीय विभाग, केन्द्रीय क्याम्पसबाट २०७४ सालको स्नातकोत्तर तहको पत्रकारिता विषयमा सर्वोकृष्ट अङ्कका साथ सर्वप्रथम भएका शरच्चन्द्र भण्डारीले दुई वटा पदक पाउने भएका छन्। उनले त्रिवि दीक्षान्त पदक र नारायण शान्ति मिश्र पदक पाउने भएका हुन्।
यस्तै अङ्ग्रेजी केन्द्रीय विभाग, केन्द्रीय क्याम्पस कीर्तिपुरबाट ३.९४ अङ्क ल्याउनुभएका स्वर्णिमराज लम्सालले नरेन्द्रमणि आचार्य दीक्षित स्वर्ण पदक र मोहनप्रसाद लाखे स्वर्ण पदक पाउनेछन।
यसैगरी अर्थशास्त्र केन्द्रीय विभाग, केन्द्रीय क्याम्पसमा अध्ययनरत नरेन्द्रराज पनेरुले तारापद चौधरी पदक, खगेन्द्रमानसिं प्रधान पदक र चन्द्रराज ढुङ्गेल स्मृति पुरस्कार पाउनेछन्। उनी स्नातकोत्तर तहमा अर्थशास्त्र विषयमा ३.८५ सिजिपिए ल्याई सर्वप्रथम भएका हुन्।
यसैगरी रसायनशास्त्र केन्द्रीय विभाग, कीर्तिपुरबाट स्नातकोत्तर तह (एमएस्सी) मा सर्वप्रथम भएका रामलाल भुसालले अमृत पदक र पिएम सिंह पदक पाउनेछन्। व्यवस्थापन केन्द्रीय विभाग, कीर्तिपुरबाट स्नातकोत्तर तह (एमबिएस) परीक्षामा सर्वप्रथम भएकी पूजा भट्टराईले नेपाल बैंक लिमिटेड खरदार गुञ्जमानसिं स्वर्ण पदक र रामकृष्ण न्हुच्छे प्रधान पुरस्कार पाउनेछिन्।
यस्तै राजनीतिशास्त्र केन्द्रीय विभाग, केन्द्रीय क्याम्पस कीर्तिपुरबाट राजनीतिशास्त्रमा एमए गरेका चक्र बमले ललित चन्द पदक र बडाकाजी मरिचमानसिंह पदक पाउनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
