फाइल तस्बिर
काठमाडौं- नेपाल कम्युनिस्ट पार्टीकी नेतृ अष्टलक्ष्मी शाक्यले राष्ट्रपतिले दलहरूको आन्तरिक मामिलामा हस्तक्षेप गर्न नहुने बताएकी छन्। शुक्रबार थापाथली इन्जिनियरिङ क्याम्पसमा आयोजित माधवकुमार नेपाल तथा पुष्पकमल दाहाल प्रचण्डपक्षका विद्यार्थीहरूको भेलाबाट बाहिरिने क्रममा नेतृ शाक्यले यस्तो बताएकी हुन्।
'पार्टीको आन्तरिक मामिलामा राष्ट्रपतिले हस्तक्षेप गर्नु हुँदैन,' पछिल्लो समय राष्ट्रपतिको भूमिका सक्रिय हुँदै गएको विषयमा पत्रकारहरूले राखेको जिज्ञासामा नेतृ शाक्यले भनिन्।
प्रधानमन्त्री केपी शर्मा ओलीलगायतका नेताहरूले पार्टीमा विवाद बढेपछि राष्ट्रपति विद्यादेवी भण्डारीसँग भेटघाट बाक्लो पार्ने गरेका छन्। यसअघि पनि अध्यक्षद्वय केपी शर्मा ओली र पुष्पकमल दाहाल प्रचण्डले राष्ट्रपतिलाई साक्षी राखेर भेट गरेका थिए।
यस्तै प्रधानमन्त्री केपी शर्मा ओली नेकपाको अध्यक्ष भएपनि पार्टीभन्दा माथि नभएको समेत उनले बताइन्। उनले अध्यक्ष ओली पार्टीका बैठकहरूबाट भाग्न नसक्ने समेत उल्लेख गरिन्। अबका पार्टीका बैठकहरूमा अध्यक्ष ओली सहभागी नभएपनि बैठकहरूलाई अघि बढाइनुपर्ने उनको भनाइ छ।
प्रधानमन्त्री ओलीले पार्टीका कमिटीहरूले गरेका निर्णय मान्नुपर्ने समेत उनको भनाइ छ। 'पार्टी कमिटीका निर्णय सबैले मान्नुपर्छ। बहुमतको निर्णय भएपनि मान्नुपर्छ। सँधै सहमति मात्र पार्टीको विधि होइन, बहुमत पनि पार्टीको विधि हो। ओली अध्यक्ष भएपनि पार्टीभन्दा माथि होइन,' उनले भनिन्।
शुक्रबारको भेला पार्टीको वर्तमान स्थितिबारेमा युवाहरूलाई जानकारी दिनका लागि आयोजना गरिएको समेत उनको भनाइ थियो। पार्टीमा सकारात्मक भूमिका खेल्नका लागि युवालाई प्ररित गर्न र पार्टी एकताका लागि युवाको भूमिका होस् भनेर भेला आयोजना गरिएको उनको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_dAAVqRhDaH-1773571207.jpg)
-1764146706.png)
