प्रदेश–२ को तेस्रो चरणको स्थानीय तहको चुनावी परिणाममा संघीय समाजवादी फोरम दोस्रो शक्ति बनेको छ। वीरगञ्ज महानगरको मेयरमा फोरमका उम्मेद्वारले अग्रता लिइरहेका छन् भने, २५ स्थानीय तह जितिसकेको छ।
मधेसका विविध मुद्दाको सम्बोधन संविधान संशोधन मार्फत नभएसम्म चुनावमा भाग नलिने भन्दै दुई चरणका निर्वाचनमा सहभागी भएन, मधेसकै अर्को शक्ति राष्ट्रिय जनता पार्टी (राजपा)। तर, मधेस आन्दोलनकै एक सहयात्री दल समाजवादी फोरमले भने अघिल्ला २ चरणकै निर्वाचनमा सहभागिता जनायो। तेस्रो चरणको निर्वाचनमा पनि अरु दलभन्दा पहिले नै होमियो। कारण थियो, संघीय समाजवादी फोरमका अध्यक्ष उपेन्द्र यादवको दूरदर्शिता।
राजनीतिका यी चतुर खेलाडीले पहिल्यै बुझे कि, अहिलेको समीकरणबाट संविधान संशोधन सम्भव छैन, त्यसैले निर्वाचनमै होमिएर शक्ति बिस्तार गरी संघर्षको आधार तयार पार्नुपर्छ। प्रदेश–२ को चुनावी परिणामबाट हौसिएका छन्, उनी। पछिल्लो चुनावी परिणामलाई लिएर यादवसँग सरोजराज अधिकारीले गरेको संवादः
प्रदेश–२ को चुनावी परिणामलाई कसरी लिनुभएको छ?
राम्रो भएको छ। अझै राम्रो गर्न सकिन्थ्यो। तर, सत्ताको दुरुपयोग र पैसाको ठूलो चलखेल भयो। त्यसले हामीलाई केही ठाउँमा असर पार्यो। नत्र हामी अझै बढी स्थानमा जित्न सक्थ्यौं।
यो चुनावी परिणामले दिएको सन्देश के हो?
चुनावी परिणामले मधेस मुद्दाको अनुमोदन गरेको छ। संविधान संशोधन गरी मधेसका माग र मुद्दाहरुको सम्बोधन गर्नुपर्छ भन्ने शक्तिहरुकै जित भएको छ। यो परिणामको सन्देशलाई संसदका ठूला राजनीतिक शक्तिले मनन् गर्न सक्नुपर्छ। मधेसको जनमत अनुरुप अघि बढ्नुपर्छ।
संविधान संशोधनबिनै चुनावमा सहभागी भएर मधेस मुद्दाको अपमान गर्यो, मधेसको मुद्दा छाड्यो भन्ने आरोप तपाईंको दलमाथि थियो। हुन त परिणामले त्यो आरोप खण्डित गरेको छ, यसबारे तपाईंको प्रतिक्रिया के छ?
अहिले संसदको समीकरणबाट संविधान संशोधन हुने सम्भावना हामीले देखेनौं। सधैं संघर्षमै रहिरहँदा आर्थिक विकास र समृद्धिको कुरा ओझेलमा परेको देख्यौं। फेरि हामीसँग संविधान संशोधन गर्नसक्ने मत पनि थिएन। त्यसैले आर्थिक विकास, समृद्धिलाई केन्द्रमा राखेर चुनावमा होमिने निर्णय गर्यौं।
यसको मतलब हामीले मधेसका मुद्दा त्याग्यौं भन्ने होइन। जनमतको दबाव सिर्जना गरी संविधान संशोधन मार्फत मधेसका मुद्दा सम्बोधन गर्ने हाम्रो प्रयास निरन्तर जारी रहनेछ। मधेस आन्दोलनको सूत्राधार नै हामी भएकाले त्यो मुद्दा छाड्ने सवाल नै हुँदैन।
दुई चरणको स्थानीय तहको चुनावमा फराकिलो अग्रता बनाएको एमाले प्रदेश–२ को नतिजामा भने पाँचौं स्थानमा धकेलिएको छ। संविधान संशोधनको खिलाफमा रहेकाले खुम्चिएको हो?
एमाले ७० वर्ष बुढो पार्टी हो। उमेरसँगै एमालेको सोच पनि मक्किँदै गएको छ। कुनै स्पष्ट विचारधारा नै छैन। नाम कम्युनिस्ट छ, व्यवहार पुरै पुँजीवादी। सत्ता, कमिसन, ठेक्कापट्टामा रुची बढेको छ। त्यसैले उसको संगठन पनि क्षयीकरण हुँदै गएको छ।
अर्को कुरा, एमालेले मधेसको मिहिन मुद्दा बुझ्नै चाहेन। जनमतलाई बेवास्ता गर्यो। मधेसका मुद्दामा सकारात्मक भइदिएको भए यो स्थिति आउँदैनथ्यो। एमाले नेताहरुबाट आउने मधेसी जनताको अपमान गर्ने अभिव्यक्तिका कारण पनि जनता चिढिए।
त्यसो त मधेसलाई आफ्नो आधार क्षेत्र दाबी गर्ने कांग्रेसले पनि बलियो उपस्थिति देखाउन सकेन नि?
हो, यसपटक त कांग्रेस निकै रक्षात्मक अवस्थामा पुगेको छ। खासमा मधेस भनेकै कांग्रेसको हो नि। सधैं कांग्रेसले फराकिलो अग्रतासहित धेरै स्थानमा जित्दै आएको हो। कांग्रेसको प्रमुख आधार क्षेत्र नै मधेस हो। हाम्रो त निकै पछि जन्मेको पार्टी हो। अहिलेको नतिजाले कांग्रेसलाई गम्भीर भएर सोच्न बाध्य पार्नेछ। आगामी दिनमा मधेसमा कांग्रेस अझै खस्किँदै जाने निश्चित छ।
माओवादीले त स्थितिमा केही सुधार गरेजस्तो देखियो त?
यो क्षणिक हो। सत्ता र पैसाको खेलले ल्याएको परिणाम हो। सत्ता र पैसाको चरम दुरुपयोगबाटै यो परिणाम ल्याएको हो। नत्र भने माओवादीमा के छ? कुनै स्थिरता छैन। कहिले एमालेको बैशाखी टेकेको छ, कहिले कांग्रेसको। कहिले कमल थापाको बुई चढेको छ, कहिले कसको। सत्तामा टाँसिइरहने ध्येयमात्र छ उसको, त्यसैले निकै अस्थिर बनिरहेको छ।
वीरगञ्ज महानगरको मेयरमा तपाईंको पार्टीका उम्मेदवारले अग्रता लिइरहनुभएको छ। जित्नेमा कत्तिको ढुक्क हुनुहुन्छ?
हामी जित्छौं भनेर नै सुरुदेखि धाँधली गर्न थालियो। सिंगो सत्ता लाग्यो, स्थानीय प्रशासन लाग्यो। सरकारी स्रोतको दुरुपयोग गरेर मतदातालाई प्रभावित पार्ने काम भयो। मतदानपछि पनि मतगणनाका क्रममा विभिन्न लफडा झिकिरहेका छन्। अहिले पनि त्यो क्रम जारी छ। मतगणनामा जसै कांग्रेस पछाडि पर्यो, विभिन्न बखेडा सुरु भएको छ। वीरगञ्ज महानगरमा हामी ढुक्कले जितिरहेका छौं।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
